Amosi 1 - Baibo Busansulushi Bwa Libuku Ili

¹ Aya ngomaswi akaamba Amosi mweembeshi wakaswa kundabala ya Tekowa. Myaaka yobilo citentanshi kacitana kucitika, Usiya kaali mwaami wa bene Juda alakwe Jeloboamu mwanaakwe Jeoyashi kaali mwaami wa bene Isilaeli, pabene Isilaeli Lesa wakayubulula makani aya kuli Amosi.

² Amosi wakaamba ayi, “Mwaami Lesa utoobuluma kuKalundu ka Siyoni akululuma kundabala inene ya Jelusalemu. Mafulo amana kuyuma. Bwiisu bwa peculu paKalundu ka Kamelo bwayuma.”

Lesa mbwaakapa mulandu shishi shishingulukite Isilaeli

³ Mwaami Lesa waamba ayi, “Bene Damasikasi bakalinga kubisha lyobilo lyobilo, aboobo ndushinisho ndaakubapa mulandu. Bakacita shintu shalunkutwe kubene Gilyadi.

⁴ Ndaakutuma mulilo paŋanda ya bwaami yakwe Asayelo akutenta shiyubilo shakwe Benadadi.

⁵ Ndaakutyoloola minjililo ya ndabala inene ya Damasikasi. Ndaakunyonyoola mwaami wa muCinyika ca Afeni, ncakwiila uyo ulela mundabala ya Beti Edeni. Bene Silya balaakuya mubusha kuKili. Nebo neMwaami Lesa ndaamba.”

⁶ Mwaami Lesa waamba ayi, “Bene Gasa bakalinga kubisha lyobilo lyobilo, aboobo ndushinisho ndaakubapa mulandu. Bakatola busha mishobo yoonse ya bantu akuya mukuboolisha kubene Edomu.

⁷ Ndaakutuma mulilo palubumbu lwa ndabala ya Gasa akutenta shiyubilo sha njiyo.

⁸ Ndaakunyonyoola mwaami wa bene Ashidodi, ncakwiila uyo ulela mundabala ya Ashikeloni. Ndaakupa mulandu ndabala inene ya Ekiloni kushikila abene Filisiti bakamane kufwa. Nebo neMwaami Lesa Shinkusu shoonse ndaamba.”

⁹ Mwaami Lesa waamba ayi, “Bene Taya bakalinga kubisha lyobilo lyobilo, aboobo ndushinisho ndaakubapa mulandu. Bakoolisha mishobo ya bantu yoonse mubusha kubene Edomu. Ncakwiila tabakwe kuyeeyawo cipangano cakunyumfwana.

¹⁰ Ndaakutuma mulilo palubumbu lwa ndabala ya Taya, akutenta shiyubilo sha njiyo.”

Shabene Edomu

¹¹ Mwaami Lesa waamba ayi, “Bene Edomu bakalinga kubisha lyobilo lyobilo, aboobo ndushinisho ndaakubapa mulandu. Bakatandaanya bamakwababo, bene Isilaeli amupeeni cakubula kubanyumfwila nkumbu. Bukali bwabo bwakafula, ee, bwakafula cakwaamba ayi bakaalilwa kulicata.

¹² Ndaakutuma mulilo pandabala inene ya Temani uyo weshi ukanyonyoole malinga ene Bosila.”

Shabene Amoni

¹³ Mwaami Lesa waamba ayi, “Bene Amoni bakalinga kubisha lyobilo lyobilo, aboobo ndushinisho ndaakubapa mulandu. Mukulwanina kukomenesha cishi cabo, bakalinga kupasula banakashi bakalinga kucite mafumo bene Gilyadi.

¹⁴ Ndaakutuma mulilo kumalinga a kuLaba, uyo weshi ukanyonyoole malinga. Kulaakuba ciyobeyobe ca nkondo pabushiku ubo. Nkondo ilaakukalalabo anga nimfula ya muuwo pabushiku ubo.

¹⁵ Mwaami wa ndabala iyo ulaakutolwa busha, pantu pomwi abacinenenene bakwe boonse. Nebo neMwaami Lesa ndaamba.”