Agayi 2 - Baibo Busansulushi Bwa Libuku Ili

Bulemu bwa Ŋanda yakwe Lesa ipya

¹ Pabushiku bwamakumi obilo abomwi bwa mweenshi wasanu ayobilo wa mwaaka weenka uyo, Mwaami Lesa wakaamba kwiinda muli ndime neAgayi. Wakandwiita ayi,

² “Aambila Selubabelo mwanaakwe Sheyalutyelo, mweendeleshi wa cishi ca Juda, Joshuwa mwanaakwe Jeosadaki, mupailishi munene, alimwi abantu abo bakalinga bacaalaawo. Ubeepushe ayi,

³ ‘Ngani wacaala pakati kanu uyo wakabona bulemu bwa Ŋanda yakwe Lesa mbobwakalinga kalekale? Ino sunu itooboneka buyani? Sa teetooboneka anga taaku mboibete?

⁴ Sombi yuma webo Selubabelo. Yuma awebo Joshuwa mwanaakwe Jeosadaki, mupailishi munene. Amuyume amwebo nobantu nobene cishi. Amusebense noonse ceebo nebo ndi amwebo.

⁵ Mutaloondi mukwiinga Mushimu wangu uli andimwe bweenka mbondakamushomesha ndindakamukusha mucishi ca Ijipiti. Nebo neMwaami Lesa Shinkusu shoonse ndaamba.’

⁶ “Ono nebo neMwaami Lesa Shinkusu shoonse ndaamba ayi, ‘Paakwiinda ciindi ciniinibo ndaakutenkaanya liculu acishi ca panshi, lweenge anshi iyumu nta.

⁷ Ndaakutenkaanya mishobo yoonse abuboni bwa njiyo bulaakuletwa kuno. Lyalo ndaakususha Ŋanda yangu abulemu.

⁸ Silifa woonse ngwaangu agolodi woonse ngwaangu.

⁹ Bulemu bwa Ŋanda yangu iyi bulaakwiinda bulemu bwa Ŋanda itaanshi. Lyalo mumusena uyu ndaakupa bantu bangu luumuno. Nebo neMwaami Lesa Shinkusu shoonse ndaamba.’ ”

Agayi mulaluki mbwaakeepusha bapailishi

¹⁰ Pabushiku bwamakumi obilo abone mumweenshi wasanu ayone mumwaaka wabili wa bwaami bwakwe Dalyasi, Mwaami Lesa Shinkusu shoonse wakaamba alimwi kuli ndime neAgayi.

¹¹ Wakaamba ayi, “Ipusha bapailishi na mulawo ulaamba ayinshi?

¹² Aŋambe ayi umwi wabwesa nyama isalalite yakabengwa kuswa pacipaililo akwiiyumuna mumungaanjo wakwe. Ino na mungaanjo wakwe wakumya shinkwa uli woonse, shilyo shakatelekwa kale, waini, mafuta a olifi nabi shakulya shimwi shili shoonse, sa inga nyama iyo yalengesha shakulya isho kuba shisalalite?” Mwiipusho ndiwakeepushikwa bapailishi bakakumbula ayi, “Sobwe.”

¹³ Mpeeke anebo neAgayi ndakeepusha ayi, “Aŋambe ayi musankwa taasalalite mukwiinga wacata mutuntu. Ino na wacata shakulya isho, sa inga shaba shitasalalite?” Abalo bapailishi bakakumbula ayi, “Ee.”

¹⁴ Lyalo nebo neAgayi ndakaamba ayi, “Mwaami Lesa waamba ayi mbocibete kubantu ba mishobo iyi. Shintu shoonse nshebacita ashintu shoonse nshebabenga kuli ndime pacipaililo tashisalaliteewo.”

Mwaami Lesa mwaakashomesha kupa coolwe bantu bakwe

¹⁵ Mwaami Lesa wakaamba ayi, “Sa tamubwene shintu mboshacitika kuli ndimwe? Kamutana kutalika kuyakulula Ŋanda yangu,

¹⁶ na umwi waya kumulwi wa shili anga ngamaila kaayeeya kucanaako makilogilamu ali 200, wakalinga kucanaakobo makilogilamu ali 100. Na umwi waya mukutekula waini kaayeeya kucanaako malita ali 100, wakalinga kucanaakobo malita ali 40.

¹⁷ Ndakanyonyoola milimo yanu ndindakayumya shishango shanu mukutuma muuwo uyoosha amfuula ya mabwe, sombi mwebo tamukwe kusanduka kuswa kushibiibi shanu.

¹⁸ Sunu bulya mbushiku bwamakumi obilo anshiiku shone mumweenshi wasanu ayone. Bushiku buno lwiimbi lwa Ŋanda yangu lwamana kuyakululwa. Ono amulindile mubone ceshi cicitike kuswa ciindi cino.

¹⁹ Nakubi kwaamba ayi taaku shili anga ngamaila shacaalaako alimwi minyansa, nkuyu, mapomegilaneti amaolifi isho shitana kucata, kuswa kubushiku bwa sunu, nebo ndanoomupa coolwe.”

Mwaami Lesa mbwaakashomesha Selubabelo

²⁰ Pabushiku bweenka ubo bwamakumi obilo anshiiku shone bwa mweenshi, Mwaami Lesa wakaamba alimwi kuli ndime neAgayi ayi,

²¹ “Lwiita Selubabelo mwaami wa bene Juda kwaamba ayi ndaakutenkaanya liculu acishi ca panshi.

²² Ndaakunyonyoola bamaami amalelo a bakunsengwe akumanisha nkusu sha ngawo. Ndaakusandamuna shikoci shabo abaabo beshikusheensha. Maaki abo alaakumana kufwa abalo abeshikwaatanta balaakucayana beene abeene.”

²³ “Pabushiku ubo, ndaakukubwesa webo Selubabelo mwanaakwe Sheyalutyelo omusebenshi wangu. Ndaakukubika ayi ukanoolela muliina lyangu ceebo nebo ndime ndakusala. Nebo neMwaami Lesa Shinkusu shoonse ndaamba.”