Agayi 1 - Baibo Busansulushi Bwa Libuku Ili

Mulawo wakuyakulula Ŋanda yakwe Lesa

¹ Mumwaaka wabili wa bwaami bwakwe Dalyasi mwaami wa bene Pesha, bushiku butaanshi mumweenshi wasanu awomwi, Mwaami Lesa wakaamba kwiinda muli ndime neAgayi kuli Selubabelo mwanaakwe Sheyalutyelo uyo wakalinga mweendeleshi wa cishi ca Juda alimwi akuli Joshuwa mwanaakwe Jeosadaki, mupailishi munene.

² Mwaami Lesa Shinkusu shoonse wakaamba ayi, “Bantu aba batokwaamba ayi, ‘Ciindi cino tacishi ciindi cakuyakulula Ŋanda yakwe Lesa.’ ”

³ Lyalo Mwaami Lesa wakaamba maswi aya kubantu kwiinda muli ndime neAgayi ayi,

⁴ “Mwebo nobantu bangu, inga kamwikala buyani mumaandaanu ngomwakayaka kabotu, sombi Ŋanda yangu keelibo matongo?

⁵ “Sa tamutoobona shitoocitika kuli ndimwe?

⁶ Mwakalima shili anga ngamaila shiinji, sombi mwakatebulamobo shiniini. Mulicite shakulya, sombi tashikwani ayi mukute. Mulicite waini, sombi nyotwa taimaani. Mulicite shakufwala, sombi teshi shiinji cakumukasaasha. Muntu uyo usebensa taafoli amaali akwana kulyaamo.

⁷ “Sa inga tamuboni shintu ishi mboshitoocitika kuli ndimwe?

⁸ Ono bulya kamuyabo mutulundu mukutimbula mapulanga akwisa mukutalika kuyakulula Ŋanda yangu. Lyalo ndaakukondwa muli njiyo akulemekwa bweenka mboonjelete. Nebo neMwaami Lesa ndaamba.

⁹ “Mwakayeeya ayi twatebula shakulya shiinji, sombi mwakatebula shiniini. Ndimwakaleta shakulya isho kumishaanu, nebo ndakashitola amuuwo. Ino ndakacitilanshi boobo? Ici cakacitika mukwiinga Ŋanda yangu icili matongo, sombi mwebo noonse mutooyuwaanabo kumilimo ya pamaandaanu.

¹⁰ Nceececo liculu talitoolosha mfula abwalo bulongo tabutoomupa shakulya.

¹¹ Ndaleeta cilanga pacishi canu, mutulundu, mumyuunda ya shili anga ngamaila, mumyuunda ya minyansa, mumyuunda ya shisamu sha maolifi, pasheesho shoonse shimena mubulongo, pabantu abanyama boonse alimwi apashintu shoonse nshemulima.”

Bantu mbobakakonkela mulawo wa Mwaami Lesa

¹² Kuswawaawo Selubabelo mwanaakwe Sheyalutyelo, Joshuwa mwanaakwe Jeosadaki mupailishi munene abantu bamwi bakacaalaawo, boonse bakasumina kukonkela mulawo wa Mwaami Lesa, Lesa wabo. Bantu abo bakalinga kuloonda akunyumfwila maswi angu neAgayi mukwiinga Mwaami Lesa, Lesa wabo ngowakantuma.

¹³ Lyalo nebo neAgayi ndakapa maswi a Mwaami Lesa kubantu ayi, “Ndaakunooli amwebo, uko nkokushomesha kwangu.”

¹⁴ Ono Mwaami Lesa wakasonkomona muuya wakwe Selubabelo mwanaakwe Sheyalutyelo, mweendeleshi wa cishi ca Juda, muuya wakwe Joshuwa mwanaakwe Jeosadaki, mupailishi munene, amuuya wa bantu abo bakalinga bacaalaawo. Aboobo bakatalika kuyakulula Ŋanda ya Mwaami Lesa Shinkusu shoonse, Lesa wabo.

¹⁵ Bakatalika kuyakulula pabushiku bwamakumi obilo anshiiku shone mumweenshi wasanu awomwi mumwaaka wabili wa bwaami bwakwe Dalyasi.