Abakuku 3 - Baibo Busansulushi Bwa Libuku Ili

Abakuku mbwaakapaila

¹ Uyu ngumupailo wangu neAbakuku kwiinda mumukumo wa Shigiyonoti.

² NoBaami baLesa ndakanyumfwa sheesho nshemwakacita. Nebo ndamulemeka abuumbi ceebo ca shintu isho nshemucita. Ono amushicite alimwi munshiku shesu shino. Ee, amushipukishe muciindi cesu cino. Kamutunyumfwila nkumbu nabi mwakalala.

³ Lesa wakesa kuswa kuEdomu, Lesa usalalite wakesa kuswa kuKalundu ka Palani. Bulemu bwakwe bwakafwekelesha liculu alimwi bamucishi ca panshi boonse bakamulumbaisha.

⁴ Bulemu bwakwe bwakalinga anga ndisuba litooswa. Mibengebenge yakaswa mumaansaakwe umo mwaakashisa nkusu shakwe.

⁵ Kunembo lyakwe kwakalinga mwaalu, pesule lyakwe pakalinga bulwashi buyoosha.

⁶ Cishi coonse catenkaana ndyaakeemikana. Lyalo ndyaakalangilisha, mishobo ya bantu yakatutuma. Tulundu tukulukulu twakasekemuka. Atwalo tulundu tuniini tukulukulu twakawa ndyaakeenda munshila shakwe shikulukulu.

⁷ Ndakabona bene Kushani kabaloonda alimwi abene Midyani kabatutuma.

⁸ NoBaami baLesa, sa njiimilonga yakamukalasha? Sa ndweenge lwakamulengesha kukalala? Ncakwiila mwebo mwakeendela mumakumbi, likumbi lya mfula lyakaba ncecikoci canu ndimwakalengesha bantu banu kukoma.

⁹ Mwakalibambila kusebensesha buta bwanu, alimwi mwakalibambila kuwaala mifwi yanu. Kalumba kanu kakalila akupasula cishi.

¹⁰ Tulundu nditwakamubona twakatalika kutenkaana. Mfula yakaloka abuumbi. Lweenge lulaamfu lwakawoota aalo maaba akakomena abuumbi.

¹¹ Lisuba amweenshi shakacileka kweenda ndishakabona kubekooka kwa mifwi yanu akubekabeka kwa lisumo lyanu.

¹² Mubukali bwanu mwakeenda kucilingana cishi ca panshi. Ncakwiila mubukali bwanu buyoosha mwakalyatoola bantu bamumishobo yoonse.

¹³ Mwakesa mukufuna bantu banu, ee, akupulusha baabo mbomwakasala. Mwakapwayoola mutanjilili wa bamucita shibi akunyonyoola bantu bakwe boonse.

¹⁴ Mwakayasa mutanjilili wa bamucita shibi alisumo lyakwe mwiine. Mwakamuyasa ciindi likoto lyakwe lya bashilumamba ndilyakesa anga nkapupuulwa kwaamba ayi litupalanganye. Wakalinga kusangalala anga wesa mukunyonyoola bakandu cabushishi.

¹⁵ Mwebo mwakalyatooka lweenge amaaki anu. Aalo maanshi ayo acite nkusu akatukuka lyoofu.

¹⁶ Ndindakanyumfwa shintu ishi, mubili wangu wakatutuma ayalo milomo yangu yakatutuma kuboowa. Ncakwiila mubili wangu woonse wakalefuka. Ee, amyeendo yangu yakabukuma kuboowa. Nakubi boobo ndaakulindilila camoyonteeka ciindi ico Lesa aakwisa mukupa mulandu bantu batulwana.

¹⁷ Nakubi kwaamba ayi mikuyu teecite maluba, nabi myuunda ya minyansa teekwe kucata shisepo, nabi shisamu sha maolifi tashikwe kucata, nabi myuunda yoonse teekwe kukusha shilyo nabi taamu mbelele mushimpati alimwi aŋombe mushimpati sha nshisho

¹⁸ ndaakusekelela muMwaami Lesa, ndushinisho ndaakusangalala muli Lesa, Mupulushi wangu.

¹⁹ Mwaami Lesa ngoompa nkusu shoonse. Ulanengesha kulyata panshi cakushimpa alimwi ulandama ciindi ndyeemba patulundu.