Abakuku 2 - Baibo Busansulushi Bwa Libuku Ili

¹ Nebo neAbakuku ndaakwiimikana anga ngushikulindilila paŋanda ilaamfu yakusompelaawo. Ndaakunoolindila kunyumfwa Mwaami Lesa nsheshi akandwiite ayi ŋambe akukumbula kwakwe pamatongooshi ngooncite.

Mwaami Lesa mbwaakakumbula abakuku

² Mpeeke Mwaami Lesa wakankumbula ayi, “Lemba maswi aya ngoontookuyubulwita. Waalembe cakubonekesha pamabwe apampamene kwaamba ayi muntu woonse akanookuubilwa pakwaabelenga.

³ Ee, waaleembe ceebo ciindi ca ngawo tacina kushikila. Nakubi boobo ciindi ca ngawo citoosa cakufwambaana. Ncakwiila alaakucitika cancinencine. Nabi aboneke kucelwa mukucitika, ukaalindilebo mukwiinga alaakucitika cancinencine alimwi teshi akacelwewo, sobwe.

⁴ Maswi ngaaya: ‘Uyo eshi akalisumpule ulaakucaikwa. Sombi uyo ululamikwa ceebo cakushoma, ulaakuba abuumi.’ ”

Bataluleme mbweshi bakanyonyoolwe

⁵ Waini ulacenjeeka! Balyabi balalisumpula alimwi tabakalikani. Tabakuti bweenka musena wa bafu mbootakuti. Nceceeco ncebakomena mishobo yoonse akutola busha bantu ba njiyo boonse.

⁶ Kuswawaawo abo batolwa busha balaakuseka baabo babatola ayi, “Mapensho kuli ndimwe nomubwesa buboni buteshi bwaanu akulilengesha kubila kwiinda mukukakatisha bantu kulipila nkongole shakubabekesha. Ino ishi shilaakutola ciindi cilaamfu buyani?”

⁷ Ono cakuteengashila abo mbomwakakongolaako balaakukupolela akusesa. Balwani banu balaakwisa akumulengesha kututuma. Balaakusaala shintu shanu shoonse.

⁸ Mwakasaala shintu sha bamumishobo iinji. Ono abo bakacaalaawo balaakumusaala amwebo mukwiinga mwakatila bulowa bwa bantu baanji alimwi mwakanyonyoola shishi shiinji, mandabala aanji pantu pomwi abantu ba mumo.

⁹ Mapensho kuli ndimwe nomubilisha bamumaandaanu munshila italuleme. Ee, mwebo nomweelesha kulengesha maandaanu kubula cakulisukama amapensho.

¹⁰ Mwakapinga kunyonyoola bantu ba mishobo iinji, sombi pakucita boobo mwalensha nsoni bamuŋanda yanu, ncakwiila mwakaliletela kunyonyooka nobeene.

¹¹ Mabwe a kulubumbu alaakunoolila ayalo mitanti ilaakunoobooshawo kulila kwanu.

¹² Mapensho kuli ndimwe nomwakaliyakila ndabala kwiinda mukutila bulowa ee, mwebo nomwakeemika ndabala kwiinda mubucayi.

¹³ Mwaami Lesa Shinkusu shoonse washinisha kwaamba ayi kusebensa kwa bantu kuli anga ninkuni shakusonselesha mulilo, ncakwiila bantu ba mishobo yoonse balilemyabo cakubula mpindu.

¹⁴ Sombi mucishi ca panshi coonse bantu balaakunooswitebo lushibo lwa bulemu bwa Mwaami Lesa bweenka lweenge mboluswite maanshi.

¹⁵ Mapensho kuli ndimwe nomulengesha babyaanu kunwa shikola, ee, kuli ndimwe nomulengesha babyaanu kutalantanta ayi mubabonene matakosha abo.

¹⁶ Ono mwebo nweenka mulaakulenshekwa nsoni mumusena wa bulemu. Ncakwiila mwebo nobeene mulaakukolwa akutalantanta. Mwaami Lesa ulaakumulengesha kunwa nkomeshi ya bukali bwakwe, lyalo bulemu bwanu bulaakusandulwa kuba musebaanyo.

¹⁷ Mwakatimboola shisamu mumusaansa wa kuLebanoni, ono bulya ndimwe mweshi mukatimboolwe. Mwakacaya banyama ba kuLebanoni, ono bulya banyama balaakumuyoosha. Ishi shilaakucitika ceebo mwakatila bulowa bwa bantu akucita shalunkutwe kushishi shiinji, kumandabala akubantu boonse bakalinga kwikalaamo.

¹⁸ Anu cibumbwabumbwa cilicite mpindunshi? Sa te ncintubo ico muntu ncaakapanga? Taaku nceenga muntu wacanaako kulekabo bubeshi. Ino nimpindunshi uyo wakacipanga njeenga wacanaako mukucinka manungo muli ncico? Amubone, cibumbwabumbwa ico tacikoonshi kwaamba!

¹⁹ Mapensho kuli ndimwe nomwaambila cisamu ayi, “Buka!” Nabi kwaambila libwe litayooyi ayi, “Nyamuka!” Sa cibumbwabumbwa inga camuyubulwitawo cintu cili coonse? Cilananikwa silifa agolodi, sombi tacicite buumi muli ncico.

²⁰ Mwaami Lesa uli muŊanda yakwe isalalite aboobo bantu boonse ba mucishi ca panshi aboomunebo tontolo kunembo lyakwe.