3 Joni 1 - Baibo Busansulushi Bwa Libuku Ili

¹ Nebo nemutanjilili ntoolembela mweensuma Gayasi ngoonsuni abuumbi.

² Oosunikwi, ntoosenga kwaamba ayi shintu shoonse kasheenda kabotu kuli ndiwe alimwi akunoobukila buumi. Ndishinishite kwaamba ayi ulibo kabotu mumuuya.

³ Mukwiinga ndakasangalala abuumbi bamwi bashominyineesu ndibakesa mukundwiita kushomeka kwako mukukonkela lushinisho, kweelana ambuli mbookala lyoonse.

⁴ Taaku cimwi cinsangalasha abuumbi kwiinda kunyumfwa ayi bana bangu muMushimu batookonkela shalushinisho.

Gayasi mbwaakalumbaishikwa

⁵ Oosunikwi, ulashomeka abuumbi mumulimo uli woonse ngoocita kubashominyoko, nakubi kwaamba ayi toona kubabonawo kale.

⁶ Bashomi aba bakalwiita coonde ca kokuno mbuli mbowakabacafwa calusuno. Utoocita kabotu kunoobacafwa munshila isangalasha Lesa kwaamba ayi batolelele mulweendo lwabo.

⁷ Mukwiinga bakatalika lweendo lwabo ceebo cakwe Klistu, akukaka kutambula lucafwo kuswa kubakunsengwe.

⁸ Anu swebo tulyeelete kubacafwa kwaamba ayi tusebensele pantu pomwi mumulimo wakushimikila shalushinisho.

Diyotilefesi alimwi aDemitilyasi

⁹ Ndakalemba nkalata ifwaafwi kucoonde ca kooko, sombi Diyotilefesi uyo ulipa butanjilili, taasuni kunyumfwila.

¹⁰ Aboobo, na nkese, ndaakuyubulula shoonse nshaacita. Ulaya cibisha liina lyangu akumbekesha shikani. Teshi sheesho sheenka, sombi ulakaka akutambula bashomi alimwi ulakasha baabo basuni kubatambula akubatanda mucoonde.

¹¹ Oosunikwi, utakonkeli micito ibiibi, sombi ibotu. Uyo woonse ucita shiluleme ngumwanaakwe Lesa. Sombi uyo ucita shibiibi, tamwishiiwo Lesa.

¹² Boonse bantu balaamba ayi Demetiliyasi uli kabotu, alwalo lushinisho mbomunya. Aswebo tutoopa bukamboni pali nguwe alimwi ulishi kwaamba ayi bukamboni bwesu mbwancinencine,

Maswi akweelaako

¹³ Ndicite shintu shiinji shakukulwiita, sombi nshisuni kushilemba munkalata, sobwe.

¹⁴ Ntooyeeya kwisa mukukubona onoono, lyalo tulaakubandika katulangene.

¹⁵ Luumuno lube awebo. Babyo bali kokuno boonse bakwaansha. Waanshe babyeesu bali kooko boonse womwi awomwi.