2 Timoti 4 - Baibo Busansulushi Bwa Libuku Ili

¹ Pameenso akwe Lesa aKlistu Jesu, uyo eshi akoomboloshe boomi abafu alimwi ceebo cakwaamba ayi ulaakwisa mubwaami, ntoosenga cankusu ayi

² unooshimikila maswi akwe Lesa, muciindi bantu ndibasuni kukutika nabi tau. Kobalulika, kubakalalila alimwi akubayumya mukubeeisha camoyonteeka.

³ Ciindi cilaakushikila bantu ndyeshi bakakake kunyumfwa kwiisha kwalushinisho, sombi balaakukonkela shiyanda myoyo yabo kwiinda mukulibunganishisha bafundishi baanji abo beshi bakanokwaamba nshebasuni kunyumfwa.

⁴ Balaakufutata kwaamba ayi batanyumfwi shalushinisho akukonkela tulabi.

⁵ Sombi webo lilame mushiindi sha mushobo uli woonse, koyuma mumakatasho, cita mulimo wakushimikila Makani Abotu akucita milimo yako yoonse kweelana amusebenshi wakwe Lesa.

⁶ Kwaamba pali ndime, ciindi cangu cashikila ayi mbengwe pacipaililo, nciindi cakushiya buumi buno.

⁷ Ndalwana nkondo ibotu akumanisha kucica lubilo alimwi ndasunga lushomo lwangu.

⁸ Bulya mushini wa bululami utoonindilila uyo Mwaami Lesa, moomboloshi ululeme, ngweshi akampe pabushiku ubo. Nakubi boobo teshi ukapekwebo ndime, sombi abaabo boonse balindila kwisa kwakwe mulusuno.

Maswi amwi

⁹ Elesha cankusu kwisa kuli ndime cakufwambaana,

¹⁰ Ceebo Dimasi wakanshiya mukwiinga wakasunisha shacishi ca panshi cino. Paceebo ceeco wakaya kuTesalonika. Kilesensi wakaya kuGalatiya alakwe Taitasi kuDalumatiya.

¹¹ Luka eenka ngooli anebo. Ukabwese Maako akwisaakwe ceebo ulakonsha kuncafwa mumulimo.

¹² Taikikasi ndakamutuma kuEfeso.

¹³ Waakunoosa ukandeteleeko acakufwala ca peculu ncindakashiya kuli Kapasi kuTulowasi alimwi amabuku angu, bunene bunene ayo a shipaya.

¹⁴ Alekisanda shikufula sheela wakambishisha abuumbi. Mwaami Lesa ulaakumupa mulandu weelete kweelana ancaakacita.

¹⁵ Awebo ulyeelete kucenjela amuntu uyo ceebo makani ayo ngootushimikila, wakaapikisha abuumbi.

¹⁶ Paciindi ndindakataanguna koomboloshekwa, taaku wakesa mukuncafwaako. Boonse bakampalangana. Lesa abalekelele!

¹⁷ Sombi Mwaami wakalinga anebo akumpa nkusu kwaamba ayi nshimikile makani akwe cakumaninina ayi baswamashi bakunsengwe boonse banyumfwe. Aboobo ndakapuluka mukanwa ka nkalamu.

¹⁸ Mwaami Lesa ulaakumfuna kuswa kububi boonse akundama ayi nkenjile muBweene bwakwe bwa kwiculu. Kuli nguwe akube bulemu lyoonse alyoonse! Ameni.

Kwaansha kwakweelaako

¹⁹ Waanshe Pulisila aAkwila alimwi abamuŋanda yakwe Onesifolasi.

²⁰ Elasitasi wakacaala muKolinto, alakwe Tulofimasi ndakamushiya muMiletusi ceebo wakalinga mulwashi.

²¹ Weeleshe cankusu kwisa mupewo kootana kushikila. Yubulasi, Pudensi, Linasi aKulodyasi bamwaansha pantu pomwi abashomi bamwi boonse.

²² Mwaami abe awebo. Luse lwakwe Lesa lube amwebo noonse.