2 Timoti 3 - Baibo Busansulushi Bwa Libuku Ili

Inshiku shakweelaako

¹ Ono shiba kwaamba ayi munshiku shakweelaako kulaakuba shiindi shiloondesha.

² Ceebo bantu balaakuba beshikulisuna, beshikuyandisha buboni, beshikulilumbaisha, beshikulisumpula, beshimatushi, batanyumfwili bashali, bataluumbi, batasalalite,

³ batacite lusuno, batalekelelani, beshikubekesha shikani, batalitibuki, bakali, batasuni shintu shibotu.

⁴ Balaakuba bacenjeshi, batasakamani, baswitebo kulisumpula, basuni shakulikondelesha kwiinda kusuna Lesa,

⁵ bantu bacite mbonekelo ya bushomi, sombi nkusu sha mbubo balashikaka. Bantu ba mushobo wooyo ubasoonoke.

⁶ Bamwi balenjila mumaanda a bantu akwiinda kumaano banakashi balefukite, abo balemenetwe mikuli ya shibiibi shabo alimwi beendeleshekwa alunkumbwa lwa mushobo uli woonse.

⁷ Banakashi aba bakakatila kwiiya lyoonse, sombi balaalilwa kunyumfwishisha shalushinisho.

⁸ Mbweeke Janesi aJambulesi mbobakapikisha Mose, abalo balapikisha shalushinisho.

⁹ Sombi taaku kulaale nkobatooya ceebo muntu woonse ulaakubona buluya bwabo bweenka mbocakaba pali Janesi aJambulesi.

Milasho yakweelaako

¹⁰ Ono webo ulishi kabotu mboonjiisha, micito yangu, muyeeyo wangu, lushomo, bushimoyonteeka, lusuno, kutaboola pesule,

¹¹ makatasho amapensho angu. Webo ulishi shintu shoonse shakancitikila muAntyoki, Ikoniyamu aLisitila. Ndakapenga abuumbi, sombi Mwaami Lesa wakamfuna mushintu shoonse isho.

¹² Ncakwiila uyo woonse usuni kwikala mubuumi bwabuLesa muli Klistu Jesu ulaakupenshekwa.

¹³ Bantu bacita shibiibi abaamba nshebataciti bananoobicilakobo. Bananoobeca bamwi akubecekwa.

¹⁴ Sombi webo tolelela mushalushinisho nshewakeeishikwa akushoma cankusu. Bakakwiisha ulibeshi

¹⁵ alimwi uleebaluka kwaamba ayi kuswa kubwanike ulishi Malembo akwe Lesa asalalite, ayo akonsha kukupa busongo bweenga bwakuletela lupulusho kwiinda mukushoma Klistu Jesu.

¹⁶ Malembo akwe Lesa oonse akayubululwa anguwe mwiine alimwi alayandika mukwiisha shalushinisho, kukasha shilubo, kululika shitaluleme amukupa milasho iyandika mukwikala buumi bululeme.

¹⁷ Nkokwaamba ayi muntu utoosebensela Lesa abe wooyo ukonsha kucita micito ibotu ili yoonse.