2 Timoti 1 - Baibo Busansulushi Bwa Libuku Ili

¹ Ndime Paulo mutumwi wakwe Klistu Jesu kwiinda mukuyanda kwakwe Lesa, wakatumwa kushimikila sha buumi mbotwashomeshekwa ubo mbotucite muli Klistu Jesu.

² Ntoolembela ndiwe Timoti omwanaangu usunikwi. Luse, nkumbu aluumuno shibe awebo kuswa kuli Lesa Ishiwesu aKlistu Jesu Mwaami wesu.

Kulumba akuyumyayumya

³ Ndalumba Lesa uyo ngoonsebensela amiyeeyo iluleme bweenka bwakalinga kucita bamashali bangu basankwa bakulukulu. Ndamulumba lyoonse ndinkuyeeya mumipailo yangu mashiku amalumwi.

⁴ Ndeebaluka kulila kwako alimwi ndisunishi kwisa mukukubona kwaamba ayi nkasangalale abuumbi.

⁵ Ndeebaluka lushomo lwako lwancinencine. Lushomo ulo lwakalinga muli bankambiyako banakashi baLoisi abanyoko baYunisi, alimwi ndishi kwaamba ayi moluli amuli ndiwe.

⁶ Paceebo ceeco ntookwiibalusha ayi ubikeko maano kucipo cakakupa Lesa ndindakabika maansa pali ndiwe.

⁷ Ceebo Mushimu Lesa ngwaakatupa tootulengeshi kuba aboowa, sombi ulatupa nkusu, lusuno akulitibuka.

⁸ Ono utanoonyumfwa nsoni kuba kamboni wa Mwaami wesu nabi kunyumfwa nsoni ceebo ca ndime nekaili mukwiinga wakwe Klistu. Sombi kopengela pantu pomwi anebo ceebo ca Makani Abotu kweelana ankusu shikupa Lesa.

⁹ Wakatupulusha akutwiita ayi tube bantu bakwe basalalite, kuteshi ceebo ca ceeco ncetwakacita, sombi kwiinda mukuyanda kwakwe mwiine alimwi aluse lwakwe. Luse ulo wakabaalo pali ndiswe kwiinda muli Klistu Jesu ciindi kacitana kutalika.

¹⁰ Sombi bulya Lesa wakatuyubulwita shintu ishi kwiinda mukwisa kwa Mupulushi wesu Klistu Jesu. Lakwe ngowakamanisha nkusu sha lufu akutondesha buumi butamaani kwiinda muMakani Abotu.

¹¹ Lesa wakansala kuba mutumwi amufundishi kwaamba ayi nshimikile Makani Abotu.

¹² Nceceeco ncentoopengela bobulya. Nakubi boobo nshinyumfwi nsoni ceebo ndimwishi uyo ngoonshoma. Aboobo ndishinishite kwaamba ayi ulakonsha kusunga isho shoonse nshaakabika mumaansa angu ayi ndame kushikila bushiku bwakoombolosha.

¹³ Catisha kukonkela maswi alushinisho ayo ngondakakwiisha kwaamba ayi abe citondesho cakukonkela. Kocita boobo mulushomo alusuno ulo ndotucite muli Klistu Jesu.

¹⁴ Kwiinda munkusu sha Mushimu Usalashi uyo ukala muli ndiswe, kobamba kabotu shintu shibotu isho nshewakapekwa ayi ulame.

¹⁵ Ulishi kale kwaamba ayi boonse mucishi ca Esha bakampalangana, pakati kabo pali Figelasi alimwi aEmojenesi.

¹⁶ Nkumbu shakwe Lesa shibe pabamuŋanda yakwe Onesifolasi, ceebo lakwe lyoonse wakalinga kunkusha buumba. Taakalinga kunyumfwa nsoni kwaamba ayi ndalinga muntolongo,

¹⁷ sombi ndyaakashikabo muLoma wakatalika kunangoola kushikila wancana.

¹⁸ Nkumbu shakwe Lesa shikabe anguwe pabushiku bwakoombolosha. Webo ulishi kale kabotu kufula kwa shintu nshaakancitila muEfeso.