2 Samwelo 9 - Baibo Busansulushi Bwa Libuku Ili

Defedi aMefibosheti

¹ Bumwi bushiku Defedi wakeepusha ayi, “Sa kuliwo ucaalite pabamuŋanda bakwe Saulo uyo ngweenga ndatondesha nkumbu ceebo cakwe Jonasani?”

² Ono pakalinga musebenshi uyo wakalinga wa bamuŋanda yakwe Saulo wakalinga kwiitwa ayi Siba. Wakalwiitikwa ayi aye abonane aDefedi. Ndyaakashika, Defedi wakamwiipusha ayi, “Sa ndiwe Siba?” Alakwe wakakumbula ayi, “Ndime nkambo nemusebenshi wanu.”

³ Lyalo mwaami wakeepusha ayi, “Sa kuliwo ucaalite pabamuŋanda yakwe Saulo uyo ngweenga ndatondesha nkumbu bweenka mbondakashomesha Lesa?” Siba wakakumbula mwaami ayi, “Nkwaali mwanaakwe Jonasani musankwa. Ngumulema myeendo yoonse yobilo.”

⁴ Mpomunyaawo mwaami wakeepusha ayi, “Ino uli kuli?” Siba wakakumbula ayi, “Uli kuŋanda yakwe Makiya mwanaakwe Amiyelo muLo Deba.”

⁵ Mpeeke Defedi wakatuma bantu ayi bamulete kuswa kuLo Deba, muŋanda yakwe Makiya mwanaakwe Amiyelo.

⁶ Lyalo Mefibosheti, mwanaakwe Jonasani mwishikulu wakwe Saulo, ndyaakashika kuli Defedi wakafukama kunembo lyakwe mukumupa bulemu. Mpomunyaawo Defedi wakamwiita liina ayi, “Mefibosheti!” Alakwe wakakumbula ayi, “Nkambo nemusebenshi wanu.”

⁷ Defedi wakaamba ayi, “Utaloondi mukwiinga ndushinisho ndyeelete kukutondesha nkumbu ceebo ca baiso baJonasani. Ndakubooshesha luundu loonse lwakalinga lwa bankambiyako baSaulo alimwi ulaakunoolya tebulu yomwi anebo.”

⁸ Mpeeke Mefibosheti wakafukama alimwi, akwaamba ayi, “Anu nkambo mpali mpweenga mwabeta boobo kabotu kuli ndime? Nebo ndyeelenebo akabwa ufwite!”

⁹ Lyalo Defedi wakatumina Siba musebenshi wakwe Saulo nkombe ayi ese. Mpomunyaawo wakamwaambila ayi, “Mushikulu wa mwaami wako ndamupa shintu shoonse shakalinga shakwe Saulo abamuŋanda yakwe.

¹⁰ Ono webo, bana bako abasebenshi bako, mulyeelete kunoomulimina akumutebwita shishango kwaamba ayi bamuŋanda ya mwaami wako banoolamwa. Sombi lakwe Mefibosheti, mwishikulu wa mwaami wako, ulaakunoolya tebulu yomwi anebo lyoonse.” Siba uyo wakalinga kucite baana basankwa bali likumi abosanwe alimwi abasebenshi bali makumi obilo.

¹¹ Mpomunyaawo Siba wakaambila mwaami ayi, “Nebo nemusebenshi wanu, ndaakucita cili coonse nceshi mukaambe ayi ncite nobaami bangu nomundela.” Munshila iyo Mefibosheti wakalya tebulu yomwi aDefedi bweenka mbuli baana ba mwaami.

¹² Mefibosheti wakalinga kucite mwaana musankwa womwi muniini wakalinga kwiitwa ayi Mika. Ono boonse bamuŋanda yakwe Siba bakaba basebenshi bakwe Mefibosheti.

¹³ Lyalo Mefibosheti, uyo wakalinga mulema myeendo yoonse yobilo, wakalinga kwikalabo muJelusalemu ceebo lyoonse wakalinga kulita kuŋanda ya mwaami Defedi.