2 Samwelo 8 - Baibo Busansulushi Bwa Libuku Ili

Defedi mbwaakakoma shishi shimwi shakalinga kushingulukite

¹ Mukuya kwanshiku Defedi wakalwana bene Filisiti alimwi, wakabakoma akukusha cishi coonse mumaansaabo.

² Mpeeke Defedi wakakoma abene Moabu. Bene Moabu wakabooneka panshi boonse akubapima alutambo. Lyalo abo bakalinga kukwana shipimo shobilo sha lutambo, wakabacaya akuleka baabo batakalinga kushika waawo. Munshila iyo bene Moabu bakaba basebenshi bakwe Defedi akutalika kumutolela misonko.

³ Kuswawaawo Defedi wakakoma Adadesa mwanaakwe Lewobu, mwaami wa cishi ca Soba, Adadesa ndyaakalinga kuya mukuboosha cishi ca muya Mulonga wa Yufuletisi mumaansaakwe.

⁴ Defedi wakacata busha bashilumamba balwanina mushikoci sha maaki bali 1,700, bapanshibo bali 20,000. Mpeeke Defedi wakatyoloola myeendo ya maaki oonse akushiyabo akwana shikoci shili mwaanda.

⁵ Bene Silya ba muDamasikasi ndibakesa ayi bacafwe Adadesa mwaami wa Soba, Defedi wakabalwana akucayaawo bashilumamba bali 22,000 pakati lyabo.

⁶ Mpomunyaawo Defedi wakayakaamo misumba ya bashilumamba mucishi ca bene Silya bamuDamasikasi. Lyalo bakaba basebenshi bakwe Defedi akutalika kumutolela misonko. Ncakwiila Mwaami Lesa wakalinga kulengesha Defedi kukoma kuli koonse nkweenga waya.

⁷ Defedi wakabwesa mayawo agolodi ayo bacinenenene bakwe Adadesa ngobakalinga kunyamuna akwaatola kuJelusalemu.

⁸ Wakabwesa abulonse uunji abuumbi kuswa muBeta amuBelotayi, mandabala anene akalinga kweendeleshekwa aAdadesa.

⁹ Ono Toyi mwaami wa Amati wakanyumfwa ayi Defedi wakakoma boonse bashilumamba bakwe Adadesa.

¹⁰ Mpeeke wakatumako Jolamu mwanaakwe ayi akaanshe mwaami Defedi akumusunsa mumaansa ceebo cakukoma Adadesa, uyo mwaami Toyi ngwaakalwana kwashiindi shiinji. Jolamu wakatolelela ashipo sha shintu shakapangwa asilifa, golodi alimwi abulonse.

¹¹ Shintu isho Defedi wakashibika palubasu ayi nshakusebensesha pakulambila, pantu pomwi asilifa alimwi agolodi ngwaakabwesa kuswa kumishobo imwi iyo njaakakoma.

¹² Shintu isho shakaswa kubene Edomu, bene Moabu, bene Amoni, bene Filisiti, bene Amaleki alimwi acipansha ca sheesho nshaakasaala kuli Adadesa mwanaakwe Lewobu mwaami wa cishi ca Soba.

¹³ Lyalo Defedi wakeendawobo kupuka ndyaakaswa mukucaya bene Edomu bali 18,000 muCinyika ca Mwiinyo.

¹⁴ Mucishi cabo wakashiya wayakamo misumba ya bashilumamba. Mpeeke bene Edomu boonse bakaba basebenshi bakwe Defedi. Ncakwiila Mwaami Lesa wakalinga kulengesha Defedi kukoma kuli koonse nkweenga waya.

Bacinenenene bakwe Defedi

¹⁵ Mboboobo Defedi mbwaakaba mwaami wa cishi ca Isilaeli coonse, alimwi wakeendelesha bantu boonse cabululami.

¹⁶ Joabu mwanaakwe Seluiya wakalinga ngomutanjilili wa bashilumamba, Jeoshafati mwanaakwe Ayiludi kaali ngoshikulemba makani amwi oonse.

¹⁷ Bapailishi bakalinga Sadoki mwanaakwe Aitubu aAimeleki mwanaakwe Abyata. Selaya ngowakalinga ngomulembi wa kubwalo.

¹⁸ Wakalinga munene wa beshikulindilila Defedi nguBenaya mwanaakwe Jeoiyada. Beshikupandako maano mwaami Defedi bakalinga mbana bakwe basankwa mwiine.