2 Samwelo 7 - Baibo Busansulushi Bwa Libuku Ili

Makani akaamba mulaluki Natani kuli Defedi

¹ Ono mwaami Defedi wakakalikana muŋanda yakwe ya bwaami, Mwaami Lesa ndyaakamupa luumuno mukulengesha balwani bakwe boonse bakalinga kumushingulukite kubula luta.

² Mpeeke wakaambila Natani mulaluki ayi, “Nebo bona ntookala muŋanda ya bwaami yakayakwa kabotu ashisamu sha sida. Sombi Libokoshi lya Cipangano lilishiitebo mutente.”

³ Natani wakakumbula mwaami ayi, “Amucite cili coonse ncemutooyeeya mukalango kanu mukwiinga mwebo Mwaami Lesa ulyaanu.”

⁴ Sombi mashiku eenkaayo Mwaami Lesa wakaambila Natani ayi,

⁵ “Uye ulwiite musebenshi wangu Defedi ayi, ‘Teshi ndiwe weelete kunjakila Ŋanda ayi nookalaamo.

⁶ Kuswabo kuciindi ndindakafuna bene Isilaeli kuswa mucishi ca Ijipiti kushikila asunu, nshikwe kwikalaawo kale muŊanda. Ndakalinga kuya cilonga musena amusena atente keeli njeŋanda yangu.

⁷ Mukweenda kwangu koonse abantu bene Isilaeli nshina kwiipushawo kale mutanjilili wangu uli woonse, uyo ngondakalisalila ayi alame bantu bangu ncaatakwe kunjakila ŋanda ya shisamu sha sida.’

⁸ “Ono ulwiite Defedi musebenshi wangu alimwi ayi, ‘Mwaami Lesa Shinkusu shoonse waamba ayi ndakakukusha kumafulo, ee, kubweembeshi bwa mbelele, kwaamba ayi ube muleli wa bantu bangu bene Isilaeli.

⁹ Ndakalinga awebo kuli koonse nkowakaya alimwi ndakakoma balwani bako ayi baswe kunembo lyako. Ndaakulengesha liina lyako kupuka mbweeke mbuli nkumenkume shimwi sha mucishi ca panshi.

¹⁰ Ndapa musena bantu bangu bene Isilaeli akubekalika mumo kwaamba ayi babe amishaabo. Lyalo kubule ubanyonyonganya tubili. Nkokwaamba ayi bamucita shibi teshi bakatolelele kubapensha mbuli kukalekale

¹¹ alimwi akuswabo ciindi ndindakasala boomboloshi ayi batanjilile bantu bangu bene Isilaeli. Ono ndaakukupa luumuno mukulengesha balwani bako boonse bakushingulukite kubula luta. Nebo neMwaami Lesa ndaakukupa bamulunyungu.

¹² Webo waakufwa akubikwa kwakabikwa bamashali bako bakulukulu ndaakusala mwanaako wakushala omwiine kwaamba ayi akapyane bwaami bwako alimwi ndaakulengesha bwaami bwakwe kuyuma.

¹³ Mwanaako uyo ngweshi akanjakile ŋanda alimwi ndaakulengesha ayi bamulunyungu lwakwe bakanoolelabo kwalyoonse alyoonse.

¹⁴ Ndaakuba baishi alakwe ulaakuba mwanaangu. Na walubisha, ndaakunoomukwipa bweenka mushali mbwaakwipa mwanaakwe.

¹⁵ Nakubi boobo ndaakunoomusunibo lyoonse alimwi teshi nkamusuuleewo mbuli mbondakacita Saulo akumukusha munshila yako.

¹⁶ Bamulunyungu lwako balaakunoolikobo lyoonse alimwi ndaakulengesha bwaami bwako kwikala muyayaya. Buleelo bwako teshi bukamaneewo.’ ”

¹⁷ Natani wakaluula kuli Defedi shoonse isho Lesa nshaakamuyubulwita.

Mupailo wakwe Defedi

¹⁸ Mpomunyaawo Defedi wakenjila muTente lya Cipangano, waya wekala kunembo lya Mwaami Lesa akupaila ayi, “Anu nebo noBaami baLesa noBeshinkusu shoonse ndime ni? Abalo bamuŋanda yangu mbaani pameenso anu cakwaamba ayi inga mwanshisha mpoombete sunu?

¹⁹ Ono noBaami baLesa Beshinkusu shoonse, pasheeshi shoonse mweelikaawo akushomesha shabamulunyungu lwangu nemusebenshi wanu kuciindi citoosa. NoBaami baLesa Beshinkusu shoonse, sa mbweenga mwacitila muntu uli woonse bulya?

²⁰ “Anu nebo neDefedi inga ndaambanshi acimwi? Mukwiinga mwebo mulinshi kabotu nebo nemusebenshi wanu, noBaami baLesa Beshinkusu shoonse.

²¹ Mwakacita shintu ishi shinene kweelana akushomesha alimwi akuyanda kwanu kwaamba ayi nemusebenshi wanu nshibe.

²² “Ncakwiila mwebo noBaami baLesa noBeshinkusu shoonse mulalemekwa abuumbi! Taaku wiinda ndimwe alimwi taaku lesa aumwi, sombibo mwebo nweenka bweenka mbotunyumfwa amatwi esu.

²³ Sa pacishi ca panshi paliwo mushobo uli mbuli wa bene Isilaeli uyo wa bantu mbomwakafuna kuswa mubusha ayi babe bantu banu? Taapuuwo. Mwakabacitila shintu shikankamika isho shakalengesha liina lyanu kuya mpuwo mucishi ca panshi coonse. Mwakatanda mishobo imwi abalesa ba njiyo kuswa kunembo lya bantu banu. Ee, bantu abo mbomwakafuna kuswa mucishi ca Ijipiti ayi babe bantu banu.

²⁴ Ncakwiila mwakalisalila bene Isilaeli ayi babe bantu banu kwalyoonse, alimwi mwebo noBaami baLesa mwaba Lesa wabo.

²⁵ “Ono anu noBaami baLesa kushomesha kwanu uku, nkomwakashomesha pali ndime nemusebenshi wanu abamulunyungu lwangu, amukulaame kwanshiku shoonse shicisa. Amukacite kweelana ambomwakashomesha

²⁶ kwaamba ayi liina lyanu linokwiinditewobo bulemu kwanshiku shoonse. Lyalo bantu bakanokwaamba ayi, ‘Ee, Mwaami Lesa Shinkusu shoonse nguLesa weendelesha bene Isilaeli!’ Munshila iyo mulaakupa coolwe bamulunyungu lwangu nebo nemusebenshi wanu ayi bakanookweendelesha bene Isilaeli lyoonsebo.

²⁷ Ncakwiila noBaami baLesa noBeshinkusu shoonse, baLesa ba bene Isilaeli! Mwayubulula shintu shoonse kuli ndime nemusebenshi wanu, alimwi mwaamba ayi, ‘Ndaakukupa bamulunyungu beelete kuba mpyani sha bwaami bwako.’ Mpaceebo ceeci ncendabulila boowa kupaila mushobo uyu.

²⁸ “NoBaami baLesa Beshinkusu shoonse, muli baLesa! Mulashomeka mukwaamba kwanu, alimwi mbulya mwashomesha shintu shibotu kuli ndime nemusebenshi wanu.

²⁹ Ono ndamusenga ayi mupe coolwe bamulunyungu lwangu kwaamba ayi batolelele kwikala mulusuno lwanu. Mwebo nobeene noBaami baLesa Beshinkusu shoonse ndimwe mwashomesha kucita shintu shoonse ishi. Aboobo mulaakunoopa shoolwe bamulunyungu lwangu lyoonsebo.”