2 Samwelo 6 - Baibo Busansulushi Bwa Libuku Ili

Libokoshi lya Cipangano mbolyakaletwa kuJelusalemu

¹ Kuswawaawo Defedi wakabunganya bashilumamba bene Isilaeli bakusaloola, bakalinga 30,000 pantu pomwi.

² Defedi wakanyamuka abashilumamba boonse mbwaakalingaabo akuya kuBaala muJuda ayi bakaleteeko Libokoshi lya Cipangano ca Mwaami Lesa. Libokoshi ilyo lyeenka ndyeliitwa liina lya Mwaami Lesa Shinkusu shoonse uyo ukala pakati ka shintu shicite mapapaminwa shiitwa ayi bakelebu peculu lya ndilyo.

³ Lyalo bakalibwesa kuswa muŋanda yakwe Abinadabu iyo yakalinga pakalundu, akulibika mucikoci cipya. Bakalinga kuya ceenda acikoci ico cakalinga kucite Libokoshi lya Cipangano ca Mwaami Lesa nguUsa aAiyo bana bakwe Abinadabu basankwa.

⁴ Aiyo ngowakalinga kutanjite kunembo.

⁵ Defedi abene Isilaeli boonse bakalinga kusekelela cankusu shabo shoonse mukupa bulemu Mwaami Lesa. Bakalinga kwiimba, kulisha tulumbu tuniini atunene, misebe ipusenepusene alimwi atusenke twakulisha.

⁶ Ono ndibakashika palubansa lwakulupwitaawo lwakwe Nakoni, basune bakalinga kuyanda kuwa. Mpeeke Usa wakatambika lyaansa akucatilila Libokoshi lya Cipangano ca Mwaami Lesa.

⁷ Mpomunyaawo Mwaami Lesa wakakalalila Usa ceebo cakutalemeka Libokoshi ilyo. Paceebo ceeco wakamucaya kufwaafwi aLibokoshi lya Cipangano ca Mwaami Lesa.

⁸ Lyalo Defedi wakakalala abuumbi kubona bukali bwa Mwaami Lesa mbobwakafuumukila Usa. Paceebo ceeci musena uyo abobulya uciitwa ayi Pelesi Usa.

⁹ Lyalo Defedi wakaloonda Mwaami Lesa bushiku ubo akwaamba ayi, “Ono bulya inga ndatola buyani Libokoshi lya Cipangano ca Mwaami Lesa kuŋanda yangu?”

¹⁰ Taakalinga kusuminite kulitola ayi anooli alyo muNdabala yakwe Defedi. Aboobo wakaseesha akulitola kuŋanda yakwe Obedi Edomu mwine Gati.

¹¹ Lyalo lyakekala muŋanda yakwe Obedi Edomu mwine Gati kwamyeenshi yotatwe. Mpeeke Mwaami Lesa wakamupa coolwe pantu pomwi abamuŋanda yakwe boonse.

¹² Pesule mwaami Defedi wakalwiitikwa ayi, “Mwaami Lesa wapa coolwe Obedi Edomu ashintu shaakalinga kucite shoonse ceebo ca Libokoshi lya Cipangano.” Lyalo Defedi wakaya walikushaako kuŋanda yakwe Obedi Edomu akulitola muNdabala yakwe Defedi cakusangalala.

¹³ Bakalinga kuliyumwite ndibakeendakobo ntaamwa shosanwe ayomwi, Defedi wakabeemika akubenga mulambu wa mucende amoombe wiinite.

¹⁴ Mpeeke Defedi wakashana ankusu shakwe shoonse mukupa bulemu Mwaami Lesa, kaafwetebo nsalu iteshimite mubukome.

¹⁵ Munshila iyo lakwe abene Isilaeli boonse bakaleta Libokoshi lya Cipangano muJelusalemu kabesa coolobesha akulisha mapeenga.

¹⁶ Ono Libokoshi lya Cipangano ca Mwaami Lesa ndilyakalinga kwinjishikwa muNdabala yakwe Defedi, Mikali mwanaakwe Saulo wakalinga kweebela pambwelyo. Lyalo ndyaakabona mwaami Defedi kaashana akusotooka mukulemeka Mwaami Lesa, wakamucima abuumbi mumoyo.

¹⁷ Mpeeke bakashisha Libokoshi lya Cipangano akulibika mumusena wa ndilyo mutente yakayaka Defedi ayi likakaleemo. Lyalo Defedi wakabenga milambu yakutenta aya bwanabwankashi kunembo lya Mwaami Lesa.

¹⁸ Ndyaakamana kubenga milambu iyo, wakapa coolwe bantu boonse muliina lya Mwaami Lesa Shinkusu shoonse.

¹⁹ Kuswawaawo bantu boonse, nkokwaamba ayi bene Isilaeli boonse, basankwa abanakashi wakabaabila shinkwa womwi womwi, cipumputa ca nyama yakutenta acisankata ca minyansa yakuyanika comwi comwi. Lyalo bantu boonse bakaya mwabo mwabo.

²⁰ Ono Defedi ndyaakaboola kuŋanda ayi ape coolwe bamuŋanda yakwe, Mikali mwanaakwe Saulo wakaswa ayi amukumanye akwaamba ayi, “Ee, sunu kwalingaanka mwaami wa cishi ca Isilaeli kupanga liina, mbomwalinga kuliyaloola pameenso abasebenshi banakashi ba bacinenenene banu anga ngumuntu muntubo! Ne, lushinisho cilensha ansooni.”

²¹ Defedi wakakumbula Mikali ayi, “Ndalinga kushana mukulemeka Mwaami Lesa uyo wakansala kuleka baiso abamuŋanda yabo, kwaamba ayi mbe muleli wa bantu bakwe bene Isilaeli. Ndaakunoosekelela mukulemeka Mwaami Lesa,

²² alimwi ndaakwiindaawo apa kulisebaanya. Webo inga wambona ayi taaku mboombete, sombi banakashi basebenshi balya balaakunoondemeka.”

²³ Kuswawaawo Mikali mwanaakwe Saulo wakafwitaamobo kutashalawo mwaana.