2 Samwelo 5 - Baibo Busansulushi Bwa Libuku Ili

Defedi mbwaakaba mwaami wa Isilaeli

¹ Mpeeke mikowa yoonse ya bene Isilaeli yakaya kuli Defedi kuEbuloni akwaamba ayi, “Swebo amwebo tuli bulowa bomwi.

² Kale kale, Saulo kaacili mwaami wesu, ndimwe mwakalinga kutanjilila bashilumamba ba bene Isilaeli kuya kunkondo. Paciindi ico Mwaami Lesa wakamulwiita ayi, ‘Ulaakutanjilila bantu bangu bene Isilaeli akuba mwaami wabo.’ ”

³ Mpeeke bamaloba boonse bene Isilaeli ndibakashika kuli Defedi kuEbuloni, Defedi wakapanga cipangano ambabo uko pameenso aMwaami Lesa. Lyalo bakamunanika mafuta ayi abe mwaami wa bene Isilaeli.

⁴ Defedi wakalinga kucite myaaka makumi otatwe ndyaakaba mwaami, alimwi wakalela kwamyaaka ili makumi one.

⁵ Mundabala ya Ebuloni, wakalela bene Juda kwamyaaka yosanwe ayobilo alimwi amusa wa mwaaka. MuJelusalemu wakalela bene Isilaeli boonse pantu pomwi abene Juda kwamyaaka ili makumi otatwe amyaaka yotatwe.

⁶ Bumwi bushiku mwaami Defedi wakanyamuka abashilumamba bakwe kuya kuJelusalemu mukulwana bene Jebusi abo bakalinga kwikalaamo. Bene Jebusi bakaambila Defedi ayi, “Teshi ukonshe kwinjila muno. Ee, boofu nabi balema myeendo batookonsha kukutandaanya.” Balo bakalinga kuyeeya ayi Defedi taakoonshi kwinjila umo.

⁷ Sombi Defedi wakeekoma akubwesa ndabala ya Siyoni iyo yakalinga mulilinga. Lyalo wakeetumba ayi Ndabala yakwe Defedi.

⁸ Pabushiku ubo Defedi wakaamba ayi, “Uyo woonse usuni kukoma bene Jebusi, ulyeelete kwiinda mwiinda maanshi kwaamba ayi akonshe kushika pabete balwani bangu abo balema alimwi aboofu.” Nceceeco bantu ncebaambila ayi, “Boofu abalema teshi bakenjileemo muŋanda ya bwaami.”

⁹ Mpeeke Defedi wakaya mukwikala mundabala ya mulilinga iyo akwiitumba ayi Ndabala yakwe Defedi. Lyalo wakayaka ndabala ya Jelusalemu kushinguluka lilinga. Wakatalikila kuMilo akuya mukushika kulilinga.

¹⁰ Kuswawaawo bweendeleshi bwakwe bwakeendaawo kushimpa mukwiinga Mwaami Lesa Shinkusu shoonse wakalinga anguwe.

¹¹ Ono Ilamu mwaami wa cishi ca Taya wakatumya beshinkombe, pantu pomwi aminkulwa ya shisamu sha sida, babeseshi ba mapulanga alimwi abeshikuyakisha mabwe. Mpeeke bakayakila Defedi ŋanda ya bwaami.

¹² Mpomunyaawo Defedi wakeshiba ayi Mwaami Lesa wayumya bwaami bwakwe pabene Isilaeli akubusumpula ceebo ca bantu bakwe bene Isilaeli.

¹³ Ono Defedi ndyaakaswa muEbuloni akuya muJelusalemu, wakabwesa bakasuwa abamwi alimwi akweeba abamwi banakashi, abo bakamushalila baana abamwi basankwa abanakashi.

¹⁴ Baana bakashalilwa kooko nguShamuwa, Shobabu, Natani, Solomoni,

¹⁵ Ibali, Elishuwa, Nefegi, Jafiya,

¹⁶ Elishama, Eliyada alimwi aElifeleti.

Defedi mbwaakakoma bene Filisiti

¹⁷ Bene Filisiti ndibakanyumfwa ayi Defedi wakananikwa kuba mwaami wa bene Isilaeli, bakanyamuka abashilumamba babo boonse ayi bakamucate. Sombi Defedi wakanyumfwa cikani ico akuya kumusena ucite lilinga.

¹⁸ Bene Filisiti bakashika kuCinyika ca Lafaimu akucipaatabo coonse.

¹⁹ Mpeeke Defedi wakeepusha Mwaami Lesa ayi, “Sa bene Filisiti nje nkabalwaane? Sa mutoobaaba mumaansaangu ayi mbakoome?” Mwaami Lesa wakakumbula ayi, “Koya, mukwiinga bene Filisiti ndushinisho ntoobaaba mumaansaako ayi ubakoome.”

²⁰ Mpomunyaawo Defedi wakaya kuBaali Pelasimu uko nkwaakaya mukubakomena. Mpeeke wakaamba ayi, “Mwaami Lesa wasefukila balwani bangu bweenka maanshi mbwaasefuka mumulonga.” Ono mboboobo musena uyo mbwaakautumba ayi Baali Pelasimu.

²¹ Bene Filisiti bakashiya ashibumbwabumbwa shabo uko, lyalo Defedi abashilumamba bakwe bakashitolelela nkobakaya.

²² Ono bene Filisiti bakaboolela akupaatabo Cinyika ca Lafaimu.

²³ Ono Defedi wakeepusha Mwaami Lesa alimwi, alakwe wakakumbula ayi, “Ee, sombi mutabalulami. Mubeende kwisule akubashinguluka, lyalo mubalwaane kunembo lya shisamu sha balusamu.

²⁴ Na munyumfwebo coongo cakweenda kwa bashilumamba mwiculu lya shisamu isho, mweendeshe mukwiinga ingayi nebo neMwaami Lesa ndatanjila kunembo lyanu kwaamba ayi nkome likoto lya bashilumamba bene Filisiti.”

²⁵ Mpeeke Defedi wakacita kweelana abwakamwaambila Mwaami Lesa. Lyalo bene Filisiti wakabacaya kuswabo kuGibyoni kushikila akuGesa.