2 Samwelo 3 - Baibo Busansulushi Bwa Libuku Ili

¹ Ono kulwana pakati ka baabo bakalinga kwiimikanina bamuŋanda yakwe Saulo abaabo bakalinga kwiimikanina Defedi, kwakatola ciindi cilaamfu abuumbi. Sombi lubasu lwakwe Defedi mbuli mbolwakalinga kuya ciindaawo kuyuma, lwalo lumwi lwakalinga kuya ciindaawo kulefuka.

Bana bakwe Defedi basankwa

² Mpeeke Defedi wakashala bana basankwa kaali muEbuloni. Wakwiiya wakalinga Amunoni ngwaakashalila muli Ainoamu mwine Jesiliilu,

³ wakaboolaawo nguKilyabu muli Abigelo mwanakashi wakashiya Nabali mwine Kamelo. Watatu nguAbusalomu muli Maaka mwanaakwe Talumayi mwaami wa Geshuli,

⁴ Wane nguAdonija muli Agiti, wasanu nguShefatiya muli Abitali,

⁵ wasanu awomwi nguItilimu muli Egila. Boonse baana basankwa aba Defedi wakabashalila muEbuloni.

Abina mbwaakaba kulubasu lwakwe Defedi

⁶ Nkoondo ndiyakalinga kuciya pakati ka baabo bakalinga kwiimikanina bamuŋanda yakwe Saulo abaabo bakalinga kwiimikanina Defedi, Abina wakeendaawo nkusu abulemu pakati ka baabo bakalinga kulubasu lwakwe Saulo.

⁷ Ono Saulo wakalinga kucite kasuwa wakalinga kwiitwa ayi Lisipa mwanaakwe Aya. Bumwi bushiku Ishibosheti wakabekesha Abina ayi wakakumana aLisipa uyo.

⁸ Abina wakashimba kubukali ceebo ca cikani ico cakaamba Ishibosheti akukumbula ayi, “Sa nebo ndi kabwa kulubasu lwa bene Juda? Kuswa lyeelyo kushikila asunu, ndalinga kushomeka kubaabo bali kulubasu lwa baiso baSaulo akubamuŋanda yabo, pantu pomwi ababyaabo. Nshina kukwaabaawo webo mumaansaakwe Defedi ayi akucaaye. Sombi sunu wesa mukumpa mulandu pamwanakashi uyu!

⁹ Ono Mwaami Lesa aampe mulandu nebo neAbina, nabibo unene, na mbule kucitila Defedi ico Mwaami Lesa ncaakamushomesha cakulumbila.

¹⁰ Ntoolonsha bwaami kuswa kulubasu lwakwe Saulo akubupa Defedi. Cishi coonse ca Isilaeli aJuda ulaakuceendelesha kuswa kuDani tibili akuBiyasheba.”

¹¹ Mpomunyaawo Ishibosheti taakwe kukushawo liswi alimwi kuli Abina mukwiinga wakalinga kumuloonda abuumbi.

¹² Kuswawaawo Abina wakatuma beshinkombe kuEbuloni kuli Defedi amaswi akwaamba ayi, “Anu cishi cino nca baani? Amupange cipangano anebo, lyalo ndaakumucafwa kuleta cishi coonse ca Isilaeli mumaansaanu.”

¹³ Defedi wakakumbula ayi, “Cabota, ntoopanga cipangano awebo. Ono ntookusenga cintu comwi. Tooelete kushika muliimfwa lyangu citobo ukalete Mikali mwanaakwe Saulo waakunoosa mukumbona.”

¹⁴ Lyalo Defedi wakatuma nkombe kuli Ishibosheti ayi, “Mpe Mikali mukaangu ngondakamamikila amweelo wa shikanda sha kunembo kubusankwa sha bene Filisiti shili mwaanda.”

¹⁵ Mpeeke Ishibosheti wakaambila bantu ayi bamukusheeko kuli Palutiyelo ibaye, mwanaakwe Laishi.

¹⁶ Ndibakalinga kumutola, Palutiyelo wakalinga kuya cikonkela pesule kaaya cilila buumpute nshila yoonse tibili akundabala ya Bayulimu. Lyalo Abina wakamwaambila ayi, “Webo boolela we.” Mpomunyaawo alakwe wakaboolela kumishaabo.

¹⁷ Pesule Abina wakabandika abamaloba ba bene Isilaeli akubaambila ayi, “Kwaciindi cilaamfu mwalinga kuyanda ayi Defedi abe Mwaami wanu.

¹⁸ Anu ici ceenka nceciindi canu. Na muliibalukite, Mwaami Lesa wakaamba pali Defedi ayi, ‘Kwiinda mumusebenshi wangu Defedi, ndaakufuna bantu bangu kuswa kubene Filisiti akubalwani babo bamwi boonse.’ ”

¹⁹ Abina wakabandika abantu ba mumukowa wakwe Benjameni. Lyalo wakaya kuEbuloni mukwaambila Defedi shoonse ba mucishi ca Isilaeli coonse aba mumukowa wakwe Benjameni boonse nshebakalinga basumina kucita.

²⁰ Abina abashilumamba bali makumi obilo abo mbwaakalingaabo ndibakashika kuli Defedi kuEbuloni, Defedi wakababambila kusekelela.

²¹ Mpeeke Abina wakalwiita Defedi ayi, “Nkambo nobaami bangu, amunsuminishe nyamuke bulya bweenka nooya nkamubunganyishile bene Isilaeli, kwaamba ayi bakapange cipangano amwebo alimwi ayi mukabeendeleshe. Lyalo calinga kuyanda moyo wanu mulaakucicana.” Aboobo Defedi wakasuminisha Abina kuya muluumuno.

Joabu mbwaakacaya Abina

²² Kapatana kwiindaawo aciindi cilaamfu, Joabu abashilumamba bakwe Defedi wakapola kuswa mukulwana. Bakaleta shintu nshebakasaala shiinji. Sombi ico ciindi Abina kaali wapansaana kale aDefedi muEbuloni mukwiinga Defedi wakamusuminisha kuya muluumuno.

²³ Mpeeke Joabu abashilumamba mbwaakalingaabo ndibakashika, wakalwiitikwa ayi, “Abina mwanaakwe Na walingaako kumwaami, alimwi mwaami wamusuminisha kuya muluumuno.”

²⁴ Mpomunyaawo Joabu wakaya kumwaami akwiipusha ayi, “Mwacitilanshi bobulya nkambo? Abina walingaako kuno kuli ndimwe, ino mwamulekelanshi ayi aye? Ncakwiila bulya wasakana!

²⁵ Mwebo mulishi Abina mwanaakwe Na mbwaabete. Wesa mukumucenjeeka ayi abone mbomweenda akwishiba shoonse nshemutoocita.”

²⁶ Mpeeke Joabu wakaswaako kuli Defedi akutuma beshinkombe ayi bacinshe Abina. Lyalo bakamubooshesha kumukalo wa Sila. Nakubi boobo Defedi taakalinga kweeshi makani ayo.

²⁷ Ono Abina ndyaakaboola kuEbuloni, Joabu wakamutola kulubasu kumwinjililo anga ulisuni kubandikaakwe cabushishi. Mpeeke kweenka uko wakamuyasa mulifumo, wafwa. Joabu wakacita boobo kwaamba ayi abooshe cishole cakucaya Asayelo mukwabo.

²⁸ Pesule Defedi ndyaakeshiba cikani ico, wakaamba ayi, “Nebo abamubweene bwangu tatucite mulandu palufu lwakwe Abina mwanaakwe Na pameenso a Mwaami Lesa.

²⁹ Mulandu wa bulowa bwakwe Abina aukabe pali Joabu abamuŋanda ya baishi! Pakati ka bamulunyungu lwakwe munshiku shoonse shili kunembo, apakacanike lyoonse pali mulwashi kasele, ucite manata, utacite nkusu shakusebensa ncito iyumu, weenga wacaikwa munkondo, nabi upengete cakulya!”

³⁰ Mboboobo Joabu aAbishayi mukwabo mbobakacaya Abina ayi babooshe cishole cakucaya Asayelo mukwababo kunkondo ya Gibyoni.

Abina mbwaakabikwa

³¹ Lyalo Defedi wakaambila Joabu abantu boonse mbwaakalingaabo ayi, “Amukwamoone shakufwala shanu, mufwale masaka munooya cilila kunembo lyakwe Abina.” Mwiine mwaami Defedi wakalinga kuya cilila pesule lya libokoshi.

³² Abina bakamubika muEbuloni alimwi mwaami wakalila cakooloma kucuumbwe cakwe Abina. Bantu bamwi boonse abalo bakalila abuumbi.

³³ Mpeeke mwaami Defedi wakeemba lwiimbo lwakulila ayi, “Ino Abina wakafwitanshi bufwa muluya?

³⁴ Maansaakwe taakalinga kwaangitweewo, ayalo myeendo yakwe teyakalinga kwaangitwe. Wafwabo anga ngumuntu wakacaikwa kubakapondo!” Mpomunyaawo bantu boonse bakalila Abina alimwi.

³⁵ Bantu bakaya basenga Defedi cankusu ayi alyeewo cimwi cintu kalicili malumwi, sombi wakashomesha cakulumbila ayi, “Mwaami Lesa ampe mulandu, nabibo unene, na ndyeewo shinkwa nabi cakulya cimwi cili coonse lisuba kalitana kwipila!”

³⁶ Bantu boonse bakalabilila cikani ico alimwi cakabasangalasha. Ncakwiila shintu shoonse shakacita mwaami shakabasangalasha.

³⁷ Mpeeke pabushiku ubo bantu bakwe Defedi abene Isilaeli boonse bakeshiba ayi mwaami Defedi taacitemo lubasu mukucaikwa kwakwe Abina mwanaakwe Na.

³⁸ Lyalo mwaami Defedi wakaambila bashilumamba bakwe ayi, “Sa tamubwene kwaamba ayi bushiku bwa sunu muno mucishi ca Isilaeli mwafwa musankwa mwiine mwiine alimwi mulemu?

³⁹ Sunu nakubi kwaamba ayi ndime mwaami wakasalwa aMwaami Lesa kwiinda mukunanikwa mafuta, ndalinyumfwa kuuba, alimwi bana bakwe Seluiya aba banjumina abuumbi. Mwaami Lesa aalambule bakapondo aba kweelana amicito yabo ibiibi!”