2 Samwelo 24 - Baibo Busansulushi Bwa Libuku Ili

Defedi mbwaakabelenga bashilumamba bakwe

¹ Ono Mwaami Lesa wakakalalila bene Isilaeli. Mpeeke wakalengesha Defedi kubapensha ndyaakaamba ayi, “Kamuya mukabelenge bantu bene Isilaeli abene Juda.”

² Mpomunyaawo Defedi wakaambila Joabu abamatanjilili ba bashilumamba bamwi abo mbwaakalingaabo ayi, “Kamuya mumishobo yoonse ya bene Isilaeli, nkokwaamba ayi kuswa kuDani kushikila akuBiyasheba, mukabelenge basankwa bakonsha kuya kunkondo kwaamba ayi nshibe mweelo mbobabete.”

³ Sombi Joabu wakatongookila mwaami Defedi ayi, “Mwaami Lesa, Lesa wanu aafushe bantu abo mankanda ali mwaanda kwiinda mbobabete bulya nobaami bangu kamuciliiwo. Ino ono nkambo nobaami bangu nceebonshi ncemusunini ayi bantu babelengwe?”

⁴ Nakubi boobo maswi a mwaami Defedi taakwe kupilululwa. Lyalo Joabu abamatanjilili ba bashilumamba bakaswaako kumwaami akuya mukubelenga bene Isilaeli.

⁵ Mpeeke bakasubuka Mulonga wa Joodani akuyaka misumba kufwaafwi andabala ya Alowa kumalenge, ndabala iyo ili pakati ka cinyika ca kuGadi, lyalo mbaabo nkululama kuJasa.

⁶ Kuswa kooko bakaya kuGilyadi, mbaabo kuKadeshi mucishi ca bene Iti. Lyalo bakaya kuDani, kuswa kooko bakashoomokela kuSidoni kumbo.

⁷ Mpeeke bakaya kulubasu lwa kumalenge kundabala ya Taya yakalinga mulilinga. Lyalo bakeenda amumandabala oonse abene Ifi alimwi abene Kenani. Mukumanisha bakaya mukweela kuBiyasheba kulubasu lwa kumalenge a cishi ca Juda.

⁸ Bakamanisha kwiinda mucishi coonse akuboola kuJelusalemu kapeendite myeenshi yosanwe ayone alimwi anshiiku makumi obilo.

⁹ Mpomunyaawo bakaluula mweelo wa basankwa boonse beelete kuya kunkondo. Mucishi ca Isilaeli bakalinga 800,000, mucishi ca Juda kamuli bali 500,000.

¹⁰ Pesule bantu ndibakamana kubelengwa, Defedi wakapenshekwa mumoyo abuumbi. Lyalo wakapaila kuMwaami Lesa ayi, “Ndabiisha abuumbi kucita cintu ici. Ono noBaami baLesa ndaseenga kwaamba ayi mulekelele cibiibi cangu nebo nemusebenshi wanu, mukwiinga ndaciita cintu cabuluya.”

¹¹ Ono Defedi kaatana kubuka bushiku bwakaboolaawo, Mwaami Lesa wakaamba kuli Gadi mulaluki wakwe Defedi ayi,

¹² “Koya ulwiite Defedi ayi, ‘Mwaami Lesa waamba ayi kuli shintu shotatwe nshooelete kusalaawo comwi nceshi ncite kuli ndiwe.’ ”

¹³ Lyalo Gadi wakaya kuli Defedi akumwaambila ayi, “Ono amusaleewo, kuba nsala kwamyaaka yotatwe mucishi canu? Kucica balwani abalo kabesa cimuyandoola kwamyeenshi yotatwe nabi kuba amwaalu mucishi canu kwanshiku shotatwe. Ono muyeeye pashintu ishi, lyalo mundwiite bukumbulo bwanu mboonjelete kutola kuMwaami Lesa.”

¹⁴ Mpomunyaawo Defedi wakaamba ayi, “Nebo ndi mumapensho anene abuumbi. Ono inga cabota kwaabwa mumaansa a Mwaami Lesa mukwiinga ngushinkumbu, kwiinda kwaabwa mumaansa a bantu.”

¹⁵ Aboobo Mwaami Lesa wakatuma mwaalu pakati ka bene Isilaeli kuswa macuunsa ayo kushika ciindi cakalinga kweelete. Lyalo basankwa bali 70,000 bakafwa kuswa kuDani kuya mukushika akuBiyasheba.

¹⁶ Mpeeke munjelo wakalinga kunyonyoola bantu ndyaakanyamuna lyaansa ayi anyonyoole Jelusalemu, Mwaami Lesa wakayeeya bumbi akukasha munjelo uyo ayi, “Mbubo ono! Cileke.” Lyalo wakacileka. Munjelo uyo wakalinga kwiimfwi palubansa lwakulupwitaawo lwakwe Alauna mwine Jebusi.

¹⁷ Ono Defedi ndyaakabona munjelo uyo wakalinga kunyonyoola bantu, wakaambila Mwaami Lesa ayi, “Ndime ndakabisha. Ino balo bacitanshi? Nebo abamuŋanda yangu ndiswe twakalinga kweelete kupekwa mulandu.”

¹⁸ Bushiku bweenka ubo Gadi wakashika kuli Defedi akumwaambila ayi, “Kamuya muyakile Mwaami Lesa cipaililo palubansa lwakulupwitaawo wakwe Alauna mwine Jebusi ulya.”

¹⁹ Lyalo Defedi wakaya kulubansa ulo kweelana abwakamwaambila Mwaami Lesa kwiinda muli Gadi.

²⁰ Mpeeke Alauna ndyaakabona mwaami Defedi abacinenenene bakwe, wakaya wafukama cakushisha ciwa panshi mukumulemeka.

²¹ Mpomunyaawo Alauna wakeepusha ayi, “Ino nkambo nobaami bangu mweenda buyani kuli ndime nemusebenshi wanu?” Lyalo Defedi wakakumbula ayi, “Ndesa mukuula lubansa lwakulupwitaawo kwaamba ayi njakile Mwaami Lesa cipaililo ingaawo mwaalu umane pakati ka bantu.”

²² Alauna wakaambila Defedi ayi, “Ncibotu, nobaami inga mwaciita cili coonse cimusangalasha kubenga kuMwaami Lesa. Abasune mba ba mulambu wakutenta. Ishi shileyi amajoko aya shibebo nkuni.

²³ Shintu shoonse ishi nebo neAlauna ndamupabo nobaami.” Alauna wakaambila Defedi alimwi ayi, “Mwaami Lesa, Lesa wanu aatambule mulambu wanu.”

²⁴ Sombi mwaami Defedi wakaamba ayi, “Ndyeelete kuula shintu ishi. Nshikoonshi kubenga mulambu wakutenta kuMwaami Lesa, Lesa wangu kwakubula kuloshawo lipepe, sobwe.” Aboobo Defedi wakoola lubansa lwakulupwitaawo ulo pantu pomwi abasune abo amaali a silifa ali makumi osanwe.

²⁵ Mpomunyaawo Defedi wakayakila Mwaami cipaililo uko akubenga milambu yakutenta alimwi aya bwanabwankashi. Mpeeke Mwaami Lesa wakakumbula mupailo wakwe, lyalo mwaalu wakamana pakati ka bene Isilaeli.