2 Samwelo 21 - Baibo Busansulushi Bwa Libuku Ili

Bamulunyungu lwakwe Saulo mbobakacaikwa

¹ Muciindi ca bwaami bwakwe Defedi kwakaba nsala iyo yakatola myaaka yotatwe. Mpeeke Defedi wakeepusha Mwaami Lesa pacikani ico. Mwaami Lesa wakaamba ayi, “Nceebo cakwe Saulo alimwi abamuŋanda yakwe bacite mulandu wakutila bulowa. Saulo wakacaya bene Gibyoni.”

² Mpomunyaawo Defedi wakeeta bene Gibyoni akubandikaabo. Bene Gibyoni abo tebakalinga lubasu kubene Isilaeli, sombi mbobakapuluka pabene Amoli. Ono bene Isilaeli bakashomesha cakulumbila ayi teshi bakabacaaye. Nacibi boobo Saulo lakwe mukusunishisha bene Isilaeli abene Juda, wakalinga kusuni kumana kubanyonyoola.

³ Lyalo Defedi wakabeepusha ayi, “Ino inga ndamucitilanshi? Ntooyanda kusonsola cilubo cakacita Saulo kuli ndimwe kwaamba ayi mwebo musengele coolwe bantu ba Mwaami Lesa.”

⁴ Mpeeke bene Gibyoni bakakumbula ayi, “Mulandu uli pakati kesu aSaulo pantu pomwi abamulunyungu lwakwe tookoonshi kumanishikwa mukulipilwa silifa nabi golodi. Swebo tatukoonshi kucaya nabi womwi muno mucishi ca Isilaeli.” Mpeeke Defedi wakeepusha alimwi ayi, “Ino mulisuni kwaamba ayi mucitilenshi?”

⁵ Lyalo bakakumbula mwaami Defedi ayi, “Saulo wakalinga kuyanda kutucaya soonse cakutashiyaawo nabi womwi pakati kesu muno mucishi ca Isilaeli.

⁶ Aboobo amutupe bamulunyungu lwakwe basankwa bali bosanwe abobilo tuye tukabacaaye pameenso a Mwaami Lesa kuGibiya, ndabala yakwe Saulo, mwaami uyo Mwaami Lesa mwiine ngwaakasala.” Mpomunyaawo mwaami Defedi wakakumbula ayi, “Ncibotu, ntoobaaba mumaansaanu.”

⁷ Ono mwaami Defedi wakalekelela Mefibosheti mwanaakwe Jonasani, mwishikulu wakwe Saulo ceebo cakushomeshanya cakulumbila uko lakwe aJonasani, mwanaakwe Saulo, nkobakacita pameenso aMwaami Lesa.

⁸ Sombi wakabwesa Alimoni aMefibosheti umwi, baana basankwa bobilo Saulo mbwaakashalila muli Lisipa mwanaakwe Aiya, pantu pomwi abaana basankwa bosanwe ba mwanaakwe Saulo mwanakashi wiitwa ayi Melabu, abo mbwaakashala kuli Adiliyelo mwanaakwe Basilayi mwine Meola.

⁹ Mpeeke wakabaaba mumaansa a bene Gibyoni abalo bakaya mukubaangilila pameenso aMwaami Lesa, pakalundu. Lyalo bosanwe abobilo boonse abo bakafwita pantu pomwi. Bakacaikwa munshiku shitaanshi shakutalika kutebula, ciindi cakutebula bale kacilibo pafwaafwi.

¹⁰ Mpomunyaawo Lisipa mwanaakwe Aiya, kasuwa wakwe Saulo, wakabwesa lisaka akuliyala pamwaandami uko kwakalinga mituntu ya bantu abo. Wakalinga kusoola bayuni malumwi abanyama bamuluundu mashiku ayi batalyi mituntu ya bantu abo, kuswa ciindi cakutebula kushikila mfuula ndiyakaloka.

¹¹ Ono Defedi ndyaakalwiitikwa cakacita Lisipa mwanaakwe Aiya, kasuwa wakwe Saulo,

¹² wakaya mukubwesa mafuwa akwe Saulo alimwi aakwe Jonasani kuswa kubene Jabeshi Gilyadi. Mafuwa ayo, bene Jabeshi Gilyadi bakaabwesa cabushishi kuswa muBeti Shani, pamusena ucanika bantu baanji apo bene Filisiti mpobakaanjika mituntu, bushiku mbobakacaya Saulo paKalundu ka Gilubowa.

¹³ Kuswawaawo Defedi wakabwesa mafuwa akwe Saulo aJonasani mwanaakwe alimwi aabasankwa balya bosanwe abobilo bakaangililwa.

¹⁴ Mpeeke bakabika mafuwa akwe Saulo aJonasani mwanaakwe mucuumbwe cakwe Kishi ishi Saulo mundabala ya Sela mucishi ca bene Benjameni. Bakacita shoonse mwaami nshaakaamba, lyalo Mwaami Lesa wakakumbula mipailo njebakalinga kupailila cishi cabo.

Mbobakalwana bene Filisiti bapolomene

¹⁵ Ono kwakabuka nkondo pakati ka bene Filisiti alimwi abene Isilaeli. Defedi wakaya abashilumamba bakwe mukulwana bene Filisiti. Ono munkondo imwi Defedi wakalema cakukopoka.

¹⁶ Mpeeke musankwa upolomene wiitwa ayi Ishibibenobu, uyo wakalinga kuyumwite lisumo lya bulonse lyakalinga kulema makilogilamu ali 3.5 alimwi wakalinga kucite amupeeni upya, wakayeeya kucaya Defedi.

¹⁷ Sombi Abishayi mwanaakwe Seluiya wakesa wacafwa Defedi mukulwana musankwa uyo akumucaya. Kuswawaawo bashilumamba bakalengesha Defedi kushomesha cakulumbila ayi teshi akayaabo tubili kunkondo. Mpeeke bakaamba ayi, “Kulangila kwa bene Isilaeli kuli pali ndimwe, aboobo tatusuni kwaamba ayi tukabulwewobo.”

¹⁸ Kuswawaawo kwakabuka aimwi nkoondo pakati ka bene Isilaeli abene Filisiti kuGobu, uko Sibekayi wa kuUsha nkwaakacaila musankwa upolomene wiitwa ayi Safu.

¹⁹ Pesule kuGobu kwakabuka aimwi nkoondo pakati kabo. Mpeeke Eloanani mwanaakwe Jeya wa kuBetileemu wakacaya Laami mukwabo Golyati wa kuGati, uyo wakalinga kucite lisumo lyakalinga kucite mutika anga ngumungwala.

²⁰ Lyalo kwakabuka aimwi kuGati uko kwakalinga musankwa upolomene musembela kulwana. Musankwa uyo wakalinga kucite minwe yosanwe awomwi kulyaansa lyomwi lyomwi, tukumo tosanwe akomwi kucimpanta comwi comwi.

²¹ Musankwa uyo ndyaakanyansha bene Isilaeli Jonasani mwanaakwe Shimeya mukwabo Defedi, wakaya wamucaya.

²² Basankwa bapolomene bone aba bakalinga bamulunyungu lwa bantu bapolomene bene Gati. Ono boonse Defedi abashilumamba bakwe wakamana kubacaya.