2 Samwelo 20 - Baibo Busansulushi Bwa Libuku Ili

Sheba mbwaakaalookila Defedi

¹ Ono muGilugala mwakalinga cikwapululwa ca muntu wiitwa ayi Sheba mwanaakwe Bikili wamumukowa wakwe Benjameni. Sheba uyo wakalisha lupeenga akoolobesha ayi, “Taaku ceesu kuli Defedi, Tatubeteeko lubasu kumwanaakwe Jese! Nobene Isilaeli, musankwa womwi awomwi aaboolele kuŋanda yakwe!”

² Mpomunyaawo basankwa bene Isilaeli boonse bakapilukaamo akukonkela Sheba mwanaakwe Bikili. Sombi boonse bene Juda bakacaala aDefedi mwaami wabo kuswa kuMulonga wa Joodani tibili akuJelusalemu.

³ Defedi ndyaakashika kuJelusalemu wakabwesa bakasuwa bakwe abo mbwaakalinga washiya ayi banoolama ŋanda ya bwaami akubabika muŋanda yakalinga kulamwa abeshikulindilila. Wakalinga kubapa shoonse shiyandika sombi taakwe kukumanaabo tubili. Bakalinga kulamwa umo abeshikulindilila kushikila kukufwa kwabo. Ncakwiila bakalinga kwikalabo anga mbamukalubinje.

⁴ Lyalo mwaami Defedi wakalwiita Amasa ayi, “Koya ukeete bene Juda boonse. Balyeelete kupola kuno munshiku shotatwe alimwi awebo ulyeelete kubaako.”

⁵ Sombi Amasa wakeendilisha panshiku nshaakapekwa ndyaakaya mukwiita bene Juda.

⁶ Mpeeke mwaami Defedi wakaambila Abishayi ayi, “Ono Sheba mwanaakwe Bikili utokwiindaawo kutupensha pali Abusalomu. Bwesa bashilumamba bangu umukonkele. Kwabula boobo atooya acane mandabala anene acite malinga, lyalo utootulobokelabo limwi.”

⁷ Mpomunyaawo bashilumamba bakwe Joabu, beshikulindilila ba kubwalo pantu pomwi abashilumamba beshinkusu boonse bakaswa muJelusalemu akukonkela Sheba mwanaakwe Bikili. Wakabatanjilila nguAbishayi.

⁸ Ndibakashika pamwaandami unene kuGibyoni, Amasa wakapola kwisa mukubakumanya. Paciindi ico Joabu wakalinga kufwete shakufwala shakwe sha nkondo. Mubukome wakalinga kwaangiteemo laamba kamukobeketwe acipokolo ca mupeeni. Ono ingayi atanunebo mweendo kuya kunembo, mupeeni wakaloka mucipokolo ca nguwo.

⁹ Kuswawaawo Joabu wakaansha Amasa ayi, “Uli kabotu mukwabo?” Lyalo wakacata Amasa kundesu kwaamba ayi amufyoonte.

¹⁰ Amasa taakalinga kulitabilite kumupeeni wakalinga kucite Joabu mulyaansa limwi. Mpeeke Joabu wakayasa Amasa mulifumo mpomunyaawo mala akalokela panshi. Amasa wakafwa peenka apo cakutamuyasaawo alimwi. Kuswawaawo Joabu aAbishayi mukwabo bakakonkela Sheba mwanaakwe Bikili.

¹¹ Ono womwi pakati ka bashilumamba bakwe Joabu wakesa weemikana kufwaafwi amubili wakwe Amasa akoolobesha ayi, “Uyo woonse uli kulubasu lwakwe Joabu aDefedi, aakonkele Joabu!”

¹² Mubili wakwe Amasa wakalinga kwaalabanganabo mubulowa pakati ka nshila. Mpeeke shilumamba wakwe Joabu wakabona ayi muntu womwi awomwi wakalinga kwiimikana na washika pakalinga mubili wakwe Amasa. Aboobo wakaukwelela mucisuwa akuufweka cakufwala.

¹³ Lyalo mubili wakwe Amasa ndiwakakushikwa munshila akufwekwa, bantu boonse abo bakakonkela Joabu kwaamba ayi bakonkele Sheba mwanaakwe Bikili.

¹⁴ Ono Sheba wakeenda mucishi coonse ca mikowa ya bene Isilaeli akuya mundabala ya Abelo Beti Maaka. Bamucipani cakwe Bikili boonse bakabungana akumukonkela mundabala inene yeenka iyo.

¹⁵ Mpeeke bashilumamba bakwe Joabu bakanyumfwa kwaamba ayi bakalinga mundabala inene iyo. Mpeeke bakaya beeshinguluka akupanga cakutantilaawo ca bulongo ceelene alilinga. Lyalo bashilumamba bakwe Joabu bakatalika kuuma lilinga kwaamba ayi balimwaaye.

¹⁶ Mpomunyaawo walutundu musongo umwi mukati mundabala inene iyo wakoolobesha ayi, “Amukutike! Amukutike! Amulwiite baJoabu bese kuno. Ndisuni kwaambaabo.”

¹⁷ Mpeeke Joabu wakaya, lyalo walutundu uyo wakeepusha ayi, “Sa ndimwe baJoabu?” Joabu wakakumbula ayi, “Ee, ndime.” Mpeeke walutundu wakaamba ayi, “Amunkutike.” Joabu wakaamba ayi, “Ntookutika.”

¹⁸ Walutundu wakaamba ayi, “Kalekale bantu bakalinga kwaamba ayi, ‘Koya ukakumbulwe kundabala ya Abelo.’ Ncakwiila abalo mbobakalinga kucita.

¹⁹ Ndabala yesu ino nindabala inene abuumbi, ndabala icite luumuno alimwi icite bantu banyumfwila bweendeleshi muno muIsilaeli. Ino nceebonshi mutooyanda kwiinyonyoola? Sa mutooyanda kunyonyoola buboni bwa Mwaami Lesa?”

²⁰ Joabu wakakumbula ayi, “Sobwe, nshikoonshi kunyonyoola ndabala yanu napaceyi.

²¹ Teshi ngomuyeeyo wesu uyo sobwe. Makani ali bobulya, musankwa wiitwa ayi Sheba mwanaakwe Bikili, wa mucishi ca tulundu ca Efuleemu, wayungoola bantu kubukila mwaami Defedi. Ono amwaabe musankwa eenkabo uyo mumaansa esu, lyalo tutooboolela.” Walutundu wakaambila Joabu ayi, “Ncibotu, tutowaala mutwi wakwe kuli ndimwe peculu lya lilinga.”

²² Mpeeke walutundu uyo wakaya kubantu bamwi boonse amuyeeyo wakwe wa busongo. Lyalo bakatimbula mutwi wakwe Sheba mwanaakwe Bikili akuuwaalila Joabu. Mpomunyaawo wakalisha lupeenga, mpeeke bashilumamba bakwe boonse bakapalangana akuboolela mwabo mwabo. Alakwe Joabu wakaboolela kumwaami Defedi muJelusalemu.

Bacinenenene bakwe Defedi

²³ Muciindi ico Joabu wakalinga ngomutanjilili wa bashilumamba boonse bene Isilaeli. Wakalinga munene wa beshikulindilila Defedi nguBenaya mwanaakwe Jeoiyada.

²⁴ Adonilamu wakalinga kweendelesha beshikucatwa busha munkondo, Jeoshafati mwanaakwe Ayiludi kaali ngoshikulemba makani a buleelo.

²⁵ Shefa wakalinga ngomulembi wa kubwalo. Bapailishi bakalinga Sadoki aAbyata,

²⁶ alimwi aIla mwine Jaiya uyo wakalinga wa mulikoto lya bapailishi bakwe Defedi alakwe.