2 Samwelo 19 - Baibo Busansulushi Bwa Libuku Ili

Joabu mbwaakakalalila Defedi

¹ Ono Joabu wakalwiitikwa kwaamba ayi mwaami Defedi wakamulila abuumbi Abusalomu.

² Mpeeke kwiinda ayi bashilumamba bakwe Defedi basekelele kukoma kwabo, bakoongumana abuumbi bushiku ubo ceebo cakunyumfwa ayi mwaami Defedi utoomulila abuumbi mwanaakwe.

³ Bakaboolela mundabala inene ya Jelusalemu kaboomwitebo anga mbashilumamba bafwa nsoni ceebo bacica nkondo.

⁴ Lyalo mwaami wakalifweka pameenso akulila cakooloma ayi, “Omwanaangu musankwa! Omwanaangu Abusalomu! Abusalomu omwanaangu musankwa!”

⁵ Ono Joabu wakaya kuŋanda ya mwaami akuya mukumwaambila ayi, “Sunu mwabalensha nsoni bashilumamba banu abo bakafuna buumi bwanu, bwa bana banu basankwa abanakashi alimwi abwa bamakaanu pantu pomwi abwa bakasuwa banu.

⁶ Mwebo mulisuni bantu bamupatite akupata baabo bamusuni. Sunu mwacibika patuba kwaamba ayi bamatanjilili ba bashilumamba abasankwa babo taaku mbomubabona. Ono ndeshiiba kwaamba ayi nemwalinga kukondetwe abuumbi Abusalomu naalinga muumi sunu, swebo soonse katufwite.

⁷ Ono bulya amunyamuke muye muyumyeyumye bashilumamba banu, mukwiinga na mubule kucita boobo, ndalumbila muliina lya Mwaami Lesa ayi kushika mashiku aya taaku nabi womwi pakati kabo eshi acaale kulubasu lwanu. Nkokwaamba ayi pashinkunka shoonse nshemwakeendaamo kuswa kubwanike bwanu, ici cilaakwiindaawo kubica.”

⁸ Mpomunyaawo mwaami wakanyamuka waya wekala kufwaafwi amwinjililo wa ndabala inene ilya. Mpeeke basankwa bakwe bakanyumfwa kwaamba ayi nkwaabete uko, lyalo boonse bakaya babungana kweenka uko. Paciindi ico bantu bakwe Abusalomu bakacica akuya umwi aumwi kuŋanda yakwe.

Defedi mbwaakaboolela kuJelusalemu

⁹ Mpeeke koonse koonse mumishi bakatalika kunokwaambana beene abeene. Bakalinga kwaambilana ayi, “Mwaami Defedi wakatupulusha kubene Filisiti akubalwani bamwi boonse. Ono mbulya waloonda Abusalomu akuswa mucishi cino.

¹⁰ Twakananika Abusalomu kuba mwaami wesu, sombi wacaikwa kunkondo. Ino ono nceebonshi kwabula muntu utoolikumbooshawo shakweelesha kuboosha mwaami Defedi?”

¹¹ Lyalo mwaami Defedi wakatumya maswi kuli Sadoki aAbyata bapailishi akwaamba ayi, “Mwiipushe bamatanjilili ba bene Juda ayi, ‘Ino nceebonshi mwebo mwaba bacaalishi mukucafwa ndime nemwaami kuboola kuŋanda yangu ya bwaami? Makani oonse ngobatokwaamba bene Isilaeli boonse akashika kuli ndime.

¹² Mwebo muli bamakwesu, ee, bulowa bomwi. Ino nceebonshi mwebo mwaba bacaalishi mukucafwa ndime nemwaami kuboola?’

¹³ Amasa lakwe mumulwiite ayi, ‘Webo tuli bulowa bomwi. Ono Mwaami Lesa ampe mulandu nabi unene cili buyani na kuswa sunu webo teshi ube mutanjilili wa likoto lya bashilumamba bangu mumusena wakwe Joabu.’ ”

¹⁴ Maswi akwe Defedi akakonda basankwa boonse bene Juda. Mpeeke abalo bakamutumina maswi akwaamba ayi, “Amuboole abashilumamba banu boonse.”

¹⁵ Lyalo pakuboolela, mwaami Defedi wakakumanishikwa abasankwa bene Juda abo bakalinga besa kuGilugala kwaamba ayi bamucafweeko pakusubuka Mulonga wa Joodani.

¹⁶ Paciindi ncemunya ico Shimeyi mwanaakwe Gela wa mumukowa wakwe Benjameni wa kuBayulimu alakwe wakapola abasankwa bene Juda ayi bakumanye mwaami Defedi.

¹⁷ Shimeyi wakalinga abasankwa bene Benjameni bali 1,000. Alakwe Siba, musebenshi wakwe Saulo ulya, wakesaabo kaali abana bakwe basankwa bali likumi abosanwe alimwi abasebenshi bakwe bali makumi obilo. Bakeendesha kushika kuJoodani mwaami Defedi kaatana.

¹⁸ Bakasubuka mulonga kwaamba ayi bashindikile bamuŋanda yakubwalo akucita cili coonse mwaami Defedi ncaakalinga kusuni. Mpeeke mwaami Defedi ndyaakalinga kuyanda kusubuka, Shimeyi wakaya waliwaala kunembo lyakwe

Defedi mbwaakafwita nkumbu Shimeyi

¹⁹ akwaamba ayi, “Ndaseenga nobaami bangu ayi mutambikilili mulandu pacilubo ncendakacita nebo nemusebenshi wanu kuli ndimwe nobaami bangu bushiku mbomwakaswa muJelusalemu. Mucilubeeko cakutaciyeeyawo tubili nkambo.

²⁰ Nebo nemusebenshi wanu ndeshiiba kwaamba ayi ndakabisha. Paceebo ceeco, nkambo nobaami bangu, ncendabeta mutaanshi kwisa mukumukumanya kuswa kumikowa ya kumatwa.”

²¹ Mpomunyaawo Abishayi mwanaakwe Seluiya wakaponsomoka ayi, “Shimeyi ulyeelete kucaikwa! Wakacobola mwaami uyo Mwaami Lesa ngwaakasala.”

²² Sombi Defedi wakakumbula ayi, “Mwebo nobana bakwe Seluiya tamubeteko lubasu kumakani aya. Ndime ndaba mwaami wa Isilaeli sunu alimwi taaku mwine Isilaeli eshi acaikwe sunu.”

²³ Mpomunyaawo wakaambila Shimeyi ayi, “Teshi ufweewo,” akumushomesha cakulumbila.

Defedi mbwaakafwita nkumbu Mefibosheti

²⁴ Mpeeke Mefibosheti, mwishikulu wakwe Saulo, wakesa alakwe mukukumanya mwaami Defedi. Musankwa uyo, mwaami Defedi mbwaakaswita muJelusalemu, taakwe kusambawo kumyeendo, kucesawo ndesu nabi kucapawo shakufwala kushikila mwaami Defedi ndyaakakoma akupiluka.

²⁵ Mefibosheti ndyaakaswa kuJelusalemu mukukumanya mwaami, mwaami wakamwiipusha ayi, “Ino webo Mefibosheti tookwe kuyitanshi anebo?”

²⁶ Alakwe wakakumbula ayi, “Nkambo nobaami bangu, mbweeke mbomwishi kale ayi ndi mulema myeendo, ndakaambila musebenshi wangu ayi ambikileko cakwikalaawo pambongolo yangu kwaamba ayi nyendeleewo nooya amwaami. Sombi Siba musebenshi wangu nkunyinda kumaano

²⁷ akwisa mukubisha liina lyangu nemusebenshi wanu kuli ndimwe nobaami bangu. Ono mwebo nkambo busongo mbomucite bulibo anga mbwa munjelo wakwe Lesa, anu amucite cili coonse ceshi cimukoonde.

²⁸ Amubone nkambo, bamulunyungu lwa bakaapa boonse bakalinga kweelete kucaikwa kuli ndimwe nobaami bangu, sombi nebo nemusebenshi wanu mwakampa nkusu shakulita patebulu yomwi amwebo. Aboobo nshicitewo nkusu shakunoocisenga lucafwo alumwi kuli ndimwe nkambo nobaami bangu.”

²⁹ Mpomunyaawo mwaami Defedi wakaamba ayi, “Mbubo ono. Nebo ndayeeya kale kwaamba ayi buboni bwakwe Saulo mububaane mwebo nobilo aSiba.”

³⁰ Mefibosheti wakakumbula ayi, “Sobwe nkambo, amuleke Siba abubweese boonse. Mukwiinga mwebo nobaami bangu mbomwesa kamulibo kabotu, kuli ndime cakwana.”

Defedi mbwaakafwita nkumbu baSilayi

³¹ Mpeeke Basilayi wa kuGilyadi alakwe wakesa kuswa kuLogelimu ayi asubuke Mulonga wa Joodani pantu pomwi amwaami akumushindikilaako mushinso uniini kuswa kooko.

³² Basilayi wakalinga wacembela abuumbi, kaacite myaaka ili 80. Ono wakalinga kubilite abuumbi alimwi ngowakalinga kupa shakulya mwaami Defedi ndyaakalinga kwikala kuMaanaimu.

³³ Lyalo mwaami Defedi wakamwaambila ayi, “Tiya soonse kuJelusalemu, ndaakunookulama.”

³⁴ Sombi Basilayi wakakumbula ayi, “Nebo nshiiku shaya kumateelo cakwaamba ayi inga ndayaanu kuJelusalemu nkambo.

³⁵ Amubone nebo ndicite kale myaaka ili 80 alimwi taaku acicimbotela. Nsheendya nabi nsheenwa shoonse nshishinyumfwiiwo akubota mukanwa lyangu, alimwi nabi beshikwiimba batokwiimba mbuli waawa, nshinyumfwiiwo maswi abo. Ncakwiila inga ndaya mukumupenshabo nobaami bangu.

³⁶ Nsheeleteewo kupekwa cilambu cinene mbuli ceeco. Aboobo ntoomushindikilabo mushinso uniini kuswa paMulonga wa Joodani.

³⁷ Lyalo inga mwandeeka ndapiluka kumisheesu nemusebenshi wanu kwaamba ayi nkafwite pafwaafwi acuumbwe ca bamashali bangu. Sombi Kimuamu mwanaangu musankwa ngooyu muyaakwe nkambo. Ulaakunoomusebensela alimwi inga mwamucitila cili coonse nceenga mwasuna nobeene.”

³⁸ Mwaami Defedi wakakumbula ayi, “Ndalumba ntooyaakwe alimwi ndaakumucitila cili coonse ncoosuni ayi nkamucitile. Awebo ndaakukucitila coonse nceshi ukasune kuli ndime.”

³⁹ Kuswawaawo bantu boonse bakasubuka Mulonga wa Joodani, lyalo mwaami alakwe wakasubuka. Mpeeke mwaami wakafyonta Basilayi mukulashanya akumupa coolwe. Mpomunyaawo Basilayi wakaboolela kumishaabo.

Bene Juda abene Isilaeli mbobakapikishanya pamwaami Defedi

⁴⁰ Lyalo mwaami Defedi ndyaakasubuka wakaya kuGilugala alakwe Kimuamu wakasubuka anguwe. Bashilumamba ba bene Juda amusa wa babene Isilaeli, abalo bakashindikila mwaami.

⁴¹ Ono bene Isilaeli bakaya kumwaami Defedi akwiipusha ayi, “Ino nceebonshi bamakwabesu bene Juda ncibayeeyela ayi balicite nkusu shakumutola kumishaanu mwebo nobaami, ashakushindikila ndimwe, bamuŋanda yanu alimwi abasankwa banu boonse pakusubuka Mulonga wa Joodani?”

⁴² Lyalo basankwa bene Juda bakabakumbula ayi, “Swebo twacita bobulya mukwiinga ndiswe bashikamukowa ba mwaami beene beene. Ino mwebo inga camucisa buyani? Sa twalyaawo shakulya shamwaami na kuli ncitwabwesa ayi ncesu?”

⁴³ Abalo bene Isilaeli bakakumbula bene Juda ayi, “Swebo tulicite sheebo shiinda kufula pashaanu mankanda ali likumi shakwaamba pamwaami Defedi. Ino sunu mutooyanda kutunaamininanshi? Mutalubiiko kwaamba ayi ndiswe bataanshi kuyeeya shakupilusha mwaami kuŊanda yakwe.” Nakubi boobo basankwa bene Juda bakeendaawo kukumbula cabukali.