2 Samwelo 18 - Baibo Busansulushi Bwa Libuku Ili

Abusalomu mbwaakafwa

¹ Ono Defedi wakabunganya bantu abo mbwaakalingaabo akusala bamatanjilili ba bashilumamba bali shuulu aba bali myaanda.

² Pakubatuma, likoto lyomwi paotatwe wakalibika mumaansaakwe Joabu, limwi mumaansaakwe Abishayi mukwabo Joabu alimwi mwanaakwe Seluiya, lyalo lyakweelaako muli Itayi mwine Giti. Mpomunyaawo mwaami Defedi wakaambila bashilumamba ayi, “Anebo ntooyaanu.”

³ Sombi bashilumamba bakaamba ayi, “Mwebo tamweelete kuya aswebo. Swebo na tweecica nkondo balo inga tababikiiko maano. Nakubi kwaamba ayi pakati kesu musa bafwa, inga tababikiiko maano. Sombi mwebo mulyeelenebo abantu bali 10,000 pakati kesu. Anu inga cabota mwebo kuboola kundabala inene kwaamba ayi munootutumina lucafwo.”

⁴ Mpeeke mwaami wakakumbula ayi, “Nebo ndilibambite kucita cili coonse nceshi mubone nobeene ayi ceendaawo kubota.” Lyalo wakeemikana kulubasu lwa mwinjililo bashilumamba ndibakalinga kwiinda mumakoto a bantu bali myaanda aabali shuulu.

⁵ Kuswawaawo Defedi wakaambila Joabu, Abishayi alimwi Itayi ayi, “Ceebobo ca ndime Abusalomu mutamuciisi.” Mpeeke bashilumamba boonse bakanyumfwa mwaami kaalwiita mutanjilili womwi awomwi pacikani cakutacisa Abusalomu.

⁶ Lyalo likoto lya bashilumamba lyakaya muluundu mukulwana abene Isilaelinyinaabo bamwi alimwi nkoondo yakabeta mumusaansa wa bene Efuleemu.

⁷ Bashilumamba bakwe Abusalomu bakakomwa kubakwe Defedi nkomunya uko. Bushiku ubo bantu baanji bakacaikwa. Kwakafwa bali 20,000.

⁸ Mpeeke nkondo yakaliyalabo luundu loonse. Lyalo bantu bakafwa mumusaansa bakeenda baabo bakacaikwa kumipeeni.

⁹ Ono cakuteengashila Abusalomu wakakumana abashilumamba bakwe Defedi. Abusalomu wakalinga kutantite pacifubwa cili anga nimbongolo. Mpeeke cifubwa ico ndicakeenda munshaacisamu ca mubanga, mutwi wakwe Abusalomu wakacatwa palusanda. Wakacaala kaaleleelabo calo cifubwa ncaakalinga kutantiteewo kaciyabo.

¹⁰ Lyalo umwi musankwa ndyaakabona boobo, wakaya walwiita Joabu ayi, “Abusalomu ndamubona utoolelela kucisamu ca mubanga.”

¹¹ Joabu wakakumbula ayi, “Utokwaamba ayinshi? Sa utooshinisha wamubona? Ino ceebonshi tookwe kumuyasa cakumulosha mpomunyaawo ndiwamubona? Mukwiinga niwacita boobo naakwiinga ndakupa maali a silifa ali likumi alaamba wa bushilumamba.”

¹² Sombi musankwa uyo wakakumbula ayi, “Nakubi kwaamba ayi cilaamba kupekwa maali a silifa ali cuulu, nebo nshikoonshi kucita boobo kumwanaamwaami. Swebo soonse twakalinga kunyumfwite mwaami ndyaakalinga kwaambila ndimwe, baAbishayi alimwi abaItayi ayi, ‘Ceebobo ca ndime Abusalomu mutamuciisi.’

¹³ Shikani shoonse mwaami Defedi ulashinyumfwa alimwi taaku shimwiinda. Ono nintakwe kunyumfwila mwaami akucaya Abusalomu, naakwiinga mwebo nweenka mwandekela cikani ico.”

¹⁴ Mpomunyaawo Joabu wakaamba ayi, “Teshi mane ciindi kwaamba awebo!” Mpeeke wakabwesa masumo otatwe akukulunga Abusalomu mucaamba kaacili muumi mucisamu ca mubanga mulya.

¹⁵ Mpeeke beshikunyamuna shakulwanisha shakwe Joabu bali likumi bakesa bashinguluka Abusalomu, bamuyasa akumucaya.

¹⁶ Lyalo Joabu wakalisha lupeenga lwakumana nkondo, abalo bakacileka kuya citandaanya bashilumamba bakwe Abusalomu.

¹⁷ Kuswawaawo bakabwesa Abusalomu akumukulukisha mucilindi cilaamfu mumusaansa umo akupanga mulwi unene abuumbi wa mabwe pali nguwe. Paciindi ico bashilumamba bakwe Abusalomu bakacica akuya kumaandaabo.

¹⁸ Ono Abusalomu kaacili muumi wakayaka cintu cakwiibalukilwaawo muCinyika ca baMaami mukwiinga wakayeeya ayi, “Bulya mboontacitewo mwaana musankwa weenga wacaasha liina lyangu, lilaakuloba.” Cintu ico wakacitumba liina lyakwe alimwi abobulya ciciitwa ayi Cakwiibalukilwaawo cakwe Abusalomu.

Defedi mbwaakalwiitikwa lufu lwakwe Abusalomu

¹⁹ Mpeeke Ayimaasi mwanaakwe Sadoki wakasenga Joabu ayi, “Amunsuminishe nkaluule makani abotu aya kubaami akwaamba ayi Mwaami Lesa wabapulusha kubalwani babo.”

²⁰ Sombi Joabu wakamwaambila ayi, “Teshi ndiwe weelete kuya mukuluula makani ayo sunu. Na koosuni inga waya bumwi bushiku, sombi sunu uteeleshi mukwiinga tulyeelete kulila mwanaamwaami musankwa wafwa.”

²¹ Nakubi boobo Joabu wakalwiita mwine Kushi umwi ayi, “Koya ukaluule kumwaami nshewabona.” Mwine Kushi uyo wakafukamina Joabu mukumulemeka akutalika kunooya cicica.

²² Kuswawaawo Ayimaasi mwanaakwe Sadoki wakaambila Joabu alimwi ayi, “Coonse ceelete kucitika, kacicitikabo. Nebo amunsuminishebo nooya cicica pesule lya mwine Kushi ulya.” Sombi Joabu wakakumbula ayi, “Omwanaangu, ceebonshi utooyanda kuya awebo? Aya teshi makani aakwiinga ayi umane kuluula wapekwa cilambu.”

²³ Sombi Ayimaasi wakaamba ayi, “Nabi kube buyani nebo ndisunibo kuya.” Mpomunyaawo Joabu wakamwaambila ayi, “Anu koya!” Alakwe Ayimaasi wakacica akwiinda muCinyika ca Joodani. Aboobo wakamwiindila mwine Kushi ulya kushika.

²⁴ Ono Defedi ndyaakalinga kushiite pakati lya mwinjililo wa pansengwe awa mukati, shikulindilila wakatanta peculu lya ciluli ca mwinjililo kufwaafwi alilinga. Ingayi alangilishe kunembo, wakabona muntu keesa cicica eenka.

²⁵ Shikulindilila uyo wakoolobesha kumwaami ayi aluule. Mpeeke mwaami wakaamba ayi, “Na uli eenka, ingayi kuli makani abotu ngaaleta.” Lyalo muntu uyo wakalinga kwisa cishika pafwaafwi.

²⁶ Mpeeke shikulindilila uyo wakabona muntu aumwi keesa cicica akoolobesha kuli shikulama mwinjililo ayi, “Bona! Muntu aumwi waashika lubilo eenka!” Mwaami Defedi wakaamba ayi, “Alakwe ulyeelete waleta makani abotu.”

²⁷ Shikulindilila wakaamba ayi, “Nebo ntoobona anga mutaanshi utoocica anga nguAyimaasi mwanaakwe Sadoki.” Mwaami wakaamba ayi, “Ayimaasi ngumuntu kabotu, utooleta makani abotu.”

²⁸ Lyalo Ayimaasi wakoolobesha ayi, “Shintu sheendabo kabotu!” Mpeeke wakafukamina mwaami cakushisha ciwa panshi akwaamba ayi, “Aalumbwe Mwaami Lesa, Lesa wanu! Wamupulusha kuswa kubaabo boonse bakabukila ndimwe nkambo nobaami bangu!”

²⁹ Mpomunyaawo mwaami wakeepusha ayi, “Sa Abusalomu cikula bwangu ngumuumi?” Ayimaasi wakakumbula ayi, “Kwalo Joabu ndyaantuma nemusebenshi wanu, ndabona kupilingana kumwi, sombi nshikwe kwishiba calengesha.”

³⁰ Mpeeke mwaami wakamwaambila ayi, “Imikana kulubasu uku, ulindile.” Mpomunyaawo Ayimaasi wakeenda kulubasu akwiimikana nkuko.

³¹ Lyalo mwine Kushi alakwe wakapola akwaamba ayi, “Nkambo nobaami bangu amukutike makani abotu! Mwaami Lesa wamupulusha kuswa kubaabo boonse bakamubukila.”

³² Mpeeke mwaami wakeepusha mwine Kushi ayi, “Sa Abusalomu cikula bwangu ngumuumi?” Mwine Kushi uyo wakakumbula ayi, “Nicambotela cacitika kuli nguwe naakwiinga cacitika kubaabo boonse babukila ndimwe nkambo nobaami bangu.”

³³ Cikani ico mwaami Defedi cakamupula mumala abuumbi. Wakaya mucipinda cakalinga kunembo lya mwinjililo wa mukati akulila. Pakunooya moomo wakalinga kunooya caamba ayi, “Omwanaangu Abusalomu! Omwanaangu musankwa, Omwanaangu Abusalomu! Anu nikwafwabo ndime kuleka ndiwe Abusalomu, maawe mwanaangu, maawe mwanaangu!”