2 Samwelo 17 - Baibo Busansulushi Bwa Libuku Ili

Ushayi mbwaakalubya Abusalomu

¹ Lyalo Ayitofelo wakaambila Abusalomu ayi, “Amunsuminishe nsale bashilumamba bali 12,000 kwaamba ayi nkonkele Defedi mashiku.

² Inga ndaya ndamulwana paciindi ndyaalefukite. Mpomunyaawo inga waloonda abalo bashilumamba bakwe inga bacica. Lyalo inga ndacayabo Defedi

³ akuboosha bantu bakwe boonse kuli ndimwe bweenka mwanakashi mbwaaboola kuli ibaye. Nkokwaamba ayi kufwa kwakwe nkuboola kwa boonse. Balo bantu abo boonse taaku eshi akacisikwe.”

⁴ Uyu muyeeyo wakaboneka kabotu kuli Abusalomu akubamaloba ba bene Isilaeli.

⁵ Nakubi boobo Abusalomu wakaamba ayi, “Ushayi mwine Aki amumwiite kwaamba ayi tunyumfwe mbweshi aambe alakwe.”

⁶ Ushayi ndyaakashika, Abusalomu wakaamba ayi, “Ayitofelo wapa kale muyeeyo wakwe. Sa tucite mbwaayeeya? Na sobwe, utupeko muyeeyo wako.”

⁷ Ushayi wakakumbula Abusalomu ayi, “Sunu muyeeyo wapa Ayitofelo teshi ubotu.

⁸ Mwebo mulibeshi baishiwanu abashilumamba babo mbobabete. Mbeshi nkondo alimwi mbakali anga ngubeya wabweselwa baana. Kuteshibo boobo bweenka, baishiwanu mbantu bacishi kulwana abuumbi, alimwi mashiku tabooni pantu pomwi abashilumamba babo.

⁹ Ndishi kwaamba ayi bulya baliyubite mucimfwengo nabi mumusena umwi. Ono na bataangune kumulwana mwebo, uli woonse weshi akanyumfwe ulaakwaamba ayi bashilumamba bakwe Abusalomu bakakomwa.

¹⁰ Lyalo nabibo shilumamba uyo ushomwa, mukali anga ninkalamu, ulaakuloonda mukwiinga beene Isilaeli boonse balishi kwaamba ayi baishiwanu mbasankwa kunkondo, abalo abo mbobali abo tabaloondi.

¹¹ Nebo muyeeyo wangu ngwakwaamba ayi mubunganyebo beene Isilaeli boonse kuswa kuDani tibili akuBiyasheba, kwaamba ayi bafule anga ngumuseese wa kuloombe lwa lweenge. Lyalo mwebo nobeene mubatanjilile kuya kunkondo.

¹² Defedi tulaakumulangoola kuli koonse nkwaabete akumulwana kaatana kwishiba citoocitika bweenka mbuli mume mbooloka. Lyalo taaku nabi womwi pakati ka bashilumamba bakwe eshi akacaale kaali muumi.

¹³ Ono na wacicila mundabala inene imwi, swebo soonse inga twabwesa ntambo akwiikwelela mucinyika. Lyalo taaku nabi libwe lyeshi likacaaleeko kalicatite.”

¹⁴ Mpomunyaawo Abusalomu abene Isilaeli bamwi boonse bakaamba ayi, “Muyeeyo wapa Ushayi mwine Aki weendaawo kubota pawakwe Ayitofelo.” Ono cakacitika boobo mukwiinga Mwaami Lesa wakalinga weelibalabo kunyonyonganya muyeeyo ubotu wakwe Ayitofelo kwaamba ayi alete libona pali Abusalomu.

Defedi mbwaakacenjeshekwa akuloboka

¹⁵ Mpeeke Ushayi wakaya walwiita Sadoki aAbyata bapailishi, muyeeyo wakapa Ayitofelo angwaakapa lakwe kuli Abusalomu abamaloba ba bene Isilaeli.

¹⁶ Lyalo wakabaambila ayi, “Amweendeshe mutume nkombe kuli Defedi ayi, ‘Mutooni muluyanga pakusubukila mulonga. Mulyeelete kusubuka Mulonga wa Joodani mukwiinga inga mwebo nobaami abantu banu bamana kucaikwa.’ ”

¹⁷ Jonasani alimwi aAyimaasi bakalinga kwikala kuEni Logelo. Ono mulindu musebenshi wakalinga kweelete kuya mukubalwiita kwaamba ayi baye mukulwiita Defedi, mukwiinga balo bakalinga kuloonda kubonwa kabanjila mundabala inene ya Jelusalemu.

¹⁸ Nakubi boobo cikula bwangu musankwa wakababona akulwiita Abusalomu. Babone boobo bakeendesha baya kuŋanda ya musankwa umwi mundabala ya Bayulimu. Musankwa uyo wakalinga kucite mukalo mulubansabo umo mobakaya mukuyuba.

¹⁹ Mpeeke muka musankwa uyo wakabwesa cakufwekaawo, waciyala pamulomo wa mukalo akupalanganishilawo shili anga ngamaila peculu ayi kubule ushiba ayi pali mukalo.

²⁰ Basankwa bakwe Abusalomu ndibakashika kumwanakashi uyo, bakeepusha ayi, “Ino Ayimaasi aJonasani bali kuli?” Mwanakashi uyo wakabakumbula ayi, “Basubuka kale mulonga.” Basankwa abo bakabalangoola, sombi tabakwe kubacana. Aboobo bakaboolela kuJelusalemu.

²¹ Basankwa abo ndibakaya, Ayimaasi aJonasani bakaswa mumukalo akuya mukushibisha Defedi. Bakamulwiita muyeeyo wakapa Ayitofelo mukupinga nguwe akumwaambila ayi, “Amunyamuke bulya onoono musubuke mulonga.”

²² Mpomunyaawo Defedi abaabo mbwaakalingaabo bakasubuka Mulonga wa Joodani. Lyalo kakutana kuca boonse bakamana kusubuka.

²³ Ono Ayitofelo ndyaakabona ayi muyeeyo wakwe wakakwa, wakabika cakwikalaawo pambongolo yakwe akuya kuŋanda yakwe mundabala ine mishaabo. Mpeeke ndyaakamana kubamba shakalinga kweelete muŋanda yakwe, wakalyaangilila. Aboobo wakafwa akubikwa mucuumbwe ca baishi.

²⁴ Abusalomu abasankwa bakwe bene Isilaeli ndibakalinga kusubuka Mulonga wa Joodani, Defedi kaashikite kundabala ya Maanaimu.

²⁵ Abusalomu wakalinga wasala Amasa kuba mutanjilili wa bashilumamba bakwe mumusena wakwe Joabu. Amasa wakalinga mwanaakwe Jeta mwine Ishimaeli uyo wakeeba Abigelo mwanaakwe Naashi alimwi nankashi yakwe Seluiya nyina Joabu.

²⁶ Bene Isilaeli bakalinga aAbusalomu bakayaka misumba mucishi ca Gilyadi.

²⁷ Ono Defedi ndyaakashika kuMaanaimu, Shobi mwanaakwe Naashi wa kuLaba mucishi ca bene Amoli, Makiya mwanaakwe Amiyelo wa kuLo Deba alimwi aBasilayi mwine Gilyadi wa kundabala ya Logelimu

²⁸ bakaletela Defedi abantu bakwe shakoonaawo, mbale shifongomene anongo shipusenepusene. Bakaleta awiti, bale, fulaulo, ciwaya, cilemba, nyangu,

²⁹ buuci, mabishi, mafuta aswa kumukupa alimwi ambelele. Bakacita boobo mukwiinga bakalyaamboosha ayi bantu balya balyeelete kufwa nsala, nyotwa alimwi balema ciine muluyanga.