2 Samwelo 16 - Baibo Busansulushi Bwa Libuku Ili

Defedi aSiba

¹ Mpeeke Defedi ndyaakeendakobo paniini kuswa peculu lya kalundu palya, wakabonabo Siba musebenshi wakwe Mefibosheti ngooyu utoomulindila ayi amwaanshe. Wakalinga kucite mbongolo shobilo shakalinga kubikitwe shakukalaawo, kashiyumwite shinkwa uli myaanda yobilo, shisankata shili mwaanda sha minyansa yakuyanika asha nkuyu alimwi ankomwe ya cipaya iswite waini.

² Ono Defedi wakeepusha ayi, “Ino ishi shintu washiletelanshi?” Siba wakakumbula ayi, “Mbongolo ndaletela bamuŋanda yanu nobaami ayi beendeleewo, shinkwa ashisepo ndaletela bashilumamba banu ayi balye, alimwi abo boonse beshi baleme muluyanga ndabaletela waini kwaamba ayi ubaboosheshemo nkusu.”

³ Mpeeke mwaami Defedi wakeepusha ayi, “Ino Mefibosheti mwishikulu wakwe Saulo mwaami wako uli kuli?” Siba wakakumbula ayi, “Ulekala muJelusalemu mukwiinga ulishomete kwaamba ayi bulya bene Isilaeli balaakumubooshesha bwaami bwakalinga bwa bankambiyakwe baSaulo.”

⁴ Mwaami Defedi wakaambila Siba ayi, “Ono bulya shoonse shakalinga shakwe Mefibosheti, nshaako.” Siba wakaamba ayi, “Ndaalaala nemusebenshi wanu. Kamumfwita nkumbu lyoonse nkambo nobaami bangu.”

Shimeyi mbwaakacita kuli Defedi

⁵ Ono Defedi ndyaakashika kuBayulimu shikamukowa wakwe Saulo wakesa mukumukumanya. Liina lyakwe wakalinga nguShimeyi mwanaakwe Gela. Wakalinga kwisa cicobola.

⁶ Mpeeke wakawaala amabwe kuli Defedi abacinenenene bakwe cakutabombaawo, nakubi kwaamba ayi bashilumamba abeshikulindilila bakwe Defedi bakalinga kumushingulukite.

⁷ Shimeyi wakacobola Defedi akwaamba ayi, “Swa! Swa! Omucayi webo, Satana wa muntu!

⁸ Utoocinyumfwa, Mwaami Lesa wakupa mulandu pabamuŋanda yakwe Saulo boonse mbowakacaya peculu lya kubwesa bwaami bwakwe. Mwaami Lesa waaba bwaami bwako mumaansa amwanaako Abusalomu. Ono webo bulya wanyonyooka ceebo ca bucayi bwako!”

⁹ Mpomunyaawo Abishayi mwanaakwe Seluiya wakaambila mwaami Defedi ayi, “Nkambo mutoolekelanshi kabwa uyu kunoomucobola nobaami bangu? Amunsuminishe nje musutule mutwi peenka palya.”

¹⁰ Sombi mwaami wakaamba ayi, “Mwebo nobana bakwe Seluiya tamubeteko lubasu kumakani aya. Na utooncobola ceebo cakwaamba ayi Mwaami Lesa wamulwiita boobo, ngani ucite nkusu shakumwiipusha ncaatoocitila boobo?”

¹¹ Lyalo Defedi wakaambila Abishayi abacinenenene bakwe bamwi boonse ayi, “Amubone, mwanaangu musankwa utoopinga kuncaya, ino inga ceela kuli pawooyu mwine Benjameni! Amumuleeke mwiine ancobole ceebo Mwaami Lesa mbwaamulwiita.

¹² Mpashi Mwaami Lesa inga wanyumfwila nkumbu akuncitila shibotu ceebo cakucobolwa uku kwa sunu.”

¹³ Mpeeke Defedi wakatolelela kunooya munshila, Shimeyi alakwe kaainda kantalamukila mweela kalundu alimwi kaaya cicobola, kuwaala mabwe akumutukwita lusuko.

¹⁴ Mwaami Defedi abaabo mbwaakalingaabo bakashika kuMulonga wa Joodani kabalemete abuumbi. Mpomunyaawo mwaami wakookesha uko.

Abusalomu abeshikumupandako maano muJelusalemu

¹⁵ Paciindi ncemunya ico, Abusalomu abashilumamba bamwi boonse bene Isilaeli wakaya muJelusalemu alakwe Ayitofelo kaali akwe.

¹⁶ Ushayi mwine Aki, mubye Defedi ushomeka, ndyaakakumana aAbusalomu wakoolobesha ayi, “Koendela buumi omwaami! Koendela buumi omwaami!”

¹⁷ Mpeeke Abusalomu wakeepusha Ushayi ayi, “Sa ono bulya ingayi ndusuno ulu nduwatondesha kumubyo Defedi? Ino tookwe kuyitanshi anguwe?”

¹⁸ Ushayi wakakumbula Abusalomu ayi, “Sobwe, nebo ndaakwikala awooyo usalwa kuMwaami Lesa, bashilumamba aba alimwi abamwi boonse bene Isilaeli kuba mwaami. Ndaakuba waakwe alimwi ndaakunoolibo anguwe.

¹⁹ Alimwi ndishi kwaamba ayi taaku aumwi ngoonjelete kusebensela kuleka mwanaamwaami wangu. Ono bulya bweenka mbondakalinga kusebensela baishiwanu, mbweshi nkanoomusebensela amwebo.”

²⁰ Ono Abusalomu wakaambila Ayitofelo ayi, “Tulwiiteeko, inga twacita buyani?”

²¹ Ayitofelo wakakumbula ayi, “Amukumanebo abakasuwa bakashiya baishiwanu ayi balame ŋanda ya bwaami iyi. Lyalo bene Isilaeli balaakunyumfwa ayi mwalipatisha cakutalyatana kuli baishiwanu. Munshila iyo beshikumukonkela baanji balaakuyuminishikwa.”

²² Mpeeke bakayaka tente peculu lya ciluli. Lyalo Abusalomu wakakumana abakasuwa ba baishi, bene Isilaeli baanji kababweneeko.

²³ Munshiku isho Ayitofelo wakalinga kucita na wapanda maano umwi muntu, cakalinga kubabo anga weepusha kuMwaami Lesa. Mboboobo Defedi aAbusalomu boonse bobilo mbobakalinga kulabilite Ayitofelo ubo.