2 Samwelo 13 - Baibo Busansulushi Bwa Libuku Ili

Amunoni aTama

¹ Ono Abusalomu mwanaakwe Defedi musankwa wakalinga kucite nankashi yakwe wakalinga kwiitwa ayi Tama, mubotu alimwi watakalinga kweebetwe. Amunoni mwanaakwe Defedi musankwa wa muŋanda imwi, wakamukumbwa.

² Wakalinga kufwabo pali nguwe cakuciswaako akuciswa, ceebo cakalinga kuboneka kuyuma kucita cili coonse kuli nguwe. Tama wakalinga moye, aboobo taakalinga kusuminishikwa kukumana amusankwa.

³ Amunoni wakalinga kucite mubye wakalinga kwiitwa ayi Jonadabu mwanaakwe Shimeya mukwabo Defedi. Jonadabu uyo wakalinga mwanamanumpa kubusongo.

⁴ Mpeeke wakeepusha Amunoni ayi, “Anu webo, omwanaamwaami nalyo, ncooungumanina bwaca abwaca nciinshi?” Amunoni wakakumbula ayi, “Nebo ndafwabo pali Tama nankashi yakwe Abusalomu mukwesu.”

⁵ Lyalo Jonadabu wakamwaambila ayi, “Becabo kuciswa akuya mukoona. Na baiso bese mukukubona, ubalwiite ayi, ‘Ndisuni Tama nankashi yangu ese ampewo cakulya. Inga wesa wabambila kokuno kwaamba ayi noomubwene alimwi antebete mwiine.’ ”

⁶ Aboobo Amunoni wakabeca kuciswa. Mwaami Defedi ndyaakesa mukumubona, Amunoni wakaamba ayi, “Ndisuni Tama nankashi yangu ese ampangileko shinkwa ubotu kuno kaamubwene alimwi antebete mwiine.”

⁷ Mpeeke Defedi wakatumina Tama nkombe kuŋanda ya bwaami ayi, “Koya kuŋanda ya nandumi yako Amunoni uye umubambile cakulya.”

⁸ Lyalo Tama wakaya kuŋanda yakwe Amunoni nandumi yakwe. Amunoni wakalinga kulete pabulo. Mpomunyaawo Tama wakabwesa fulaulo waukanda, wabumba shinkwa akuubika mucitofu ayi upye Amunoni kaabweneeko.

⁹ Kuswawaawo Tama wakabwesa cikaye ca shinkwa waya wamutambika shinkwa uyo, sombi wakakaka kulya. Mpeeke Amunoni wakaamba ayi, “Baambile bantu boonse basweemo muno.” Aboobo bantu bakaswaamo.

¹⁰ Lyalo Amunoni wakaambila Tama ayi, “Leta cakulya ico kuno kubulo kwaamba ayi noolya webo koocicatite.” Tama alakwe wakabwesa shinkwa ngwaakalinga wapangila Amunoni nandumi yakwe akumutolela kucipinda nkwaakalinga koona.

¹¹ Ono cilya Tama ncaakaamba ayi atambike shinkwa kuli nguwe ayi alye, Amunoni wakamucata palyaansa akumwaambila ayi, “Kwesa nkumane awebo nankashi yangu.”

¹² Sombi Tama wakaamba ayi, “Sobwe onandumi yangu! Utankakatishi kucita boobo. Cintu ca mushobo uyu taceelete kucitika mucishi ca Isilaeli! Utaciti cintu cibiibi bobulya.

¹³ Ino nebo utoonjeyela buyani? Utooyeeya ayi musebaanyo inga ndaumana mushobonshi pamubili wangu? Alimwi awebo omwiine inga wasebaana abuumbi muIsilaeli. Na ulisuni waambebo abaami, inga tabakukashiiwo kunjeba.”

¹⁴ Nakubi boobo Amunoni taakwe kumunyumfwila. Ono ceebo cakwaamba ayi wakamwiinda nkusu, wakakumanaakwe cakumukakatisha.

¹⁵ Kuswawaawo Amunoni wakapata Tama cilensha bunyengele. Nkokwaamba ayi wakamupata kwiinda ambwaakalinga kumusuni. Mpeeke Amunoni wakamwaambila ayi, “Buka, uswe unooya!”

¹⁶ Tama wakakumbula ayi, “Sobwe! Kuntanda citooba cilubo cinene kwiinda ceeci nciwacita kale kuli ndime.” Sombi taakwe kumunyumfwila.

¹⁷ Mpomunyaawo wakeeta musebenshi wakwe mwiine akumwaambila ayi, “Kusha walutundu uyu muŋanda muno, wamana ucaleeko kumulyango.”

¹⁸ Mpeeke musebenshi uyo wakakusha Tama muŋanda iyo akucalaako kumulyango. Tama wakalinga kufwete cakufwala cilaamfu cicite maansa alaamfu mukwiinga ubo banaabaami banakashi batana kukumanaawo kale amusankwa mbobakalinga kufwala.

¹⁹ Lyalo Tama wakalibika milota mumutwi akukwamuna cakufwala ico ncaakalinga kufwete. Mpeeke wakalikumbata kumutwi akuya cilila cakooloma nshila yoonse.

²⁰ Mpeeke Abusalomu nandumi yakwe wakamwiipusha ayi, “Sa Amunoni wakumana awebo cakukukakatisha? Ndaseenga onankashi yangu kwaamba ayi cikani ici citakukalashi bunene. Alakwe ngunandumi yako nabi teshi lifumo lyomwi. Utalwiiti muntu uli woonse cikani ici.” Kuswawaawo Tama wakatalika kwikala muŋanda yakwe Abusalomu cakuungumana.

²¹ Mwaami Defedi ndyaakanyumfwa cikani ico, wakakalala abuumbi.

²² Mpeeke Abusalomu wakapata Amunoni cakutaambooshanyaawo napaceyi ceebo cakusebaanya Tama nankashi yakwe.

Abusalomu mbwaakacaya Amunoni

²³ Ndipakeenda myaaka yobilo, Abusalomu wakalinga abantu bakwe bakalinga kucesa mbelele booya kuBaali Aso, pafwaafwi andabala ya Efuleemu. Ono wakatamba banaamwaaminyina basankwa boonse ayi babeeko.

²⁴ Abusalomu wakaya kumwaami Defedi waya waamba ayi, “Nomulemekwa, mbelele shangu shitooceswa booya. Ndaseenga mwebo abacinenenene banu mwise musekelele pantu pomwi aswebo.”

²⁵ Mwaami wakakumbula ayi, “Sobwe omwanaangu, inga kwaba kukushupa na soonse twesaako.” Abusalomu wakatolelela kusenga, sombi mwaami taakwe kusumina. Lyalo Defedi wakapa Abusalomu coolwe ayi anooya.

²⁶ Sombi Abusalomu wakaamba ayi, “Ono na mwebo tamusuni, amusuminishebo Amunoni mukwesu lakwe ese.” Mpomunyaawo mwaami wakeepusha ayi, “Ino nceebonshi?”

²⁷ Abusalomu wakakakatila kushikila mwaami Defedi wasuminisha bana bakwe basankwa bamwi boonse pantu pomwi aAmunoni kuyaakwe.

²⁸ Ono Abusalomu wakalwiita basebenshi bakwe ayi, “Na mubone Amunoni wakolwa alimwi na ŋambe ayi, ‘Amumuyase Amunoni,’ mumucaaye. Mutaloondi. Mulandu ngwaangu. Muyumye myoyo alimwi kutatonsha.”

²⁹ Mpeeke basebenshi bakwe Abusalomu bakacita kweelana ambwaakabaambila. Mpomunyaawo banaamwaami bamwi boonse bakatanta shifubwa shabo shili anga nimbongolo akuloboka.

³⁰ Ono kabaciya munshila, inkombe yakashika kumwaami Defedi ayi, “Abusalomu wacaya bana banu basankwa bamwi boonse. Taaku nabi womwi wacaala.”

³¹ Mpeeke mwaami Defedi wakanyamuka, wakwamoona shakufwala shakwe akuliwaala panshi. Abalo basebenshi bakwe mbwaakalingaabo bakakwamoona shakufwala shabo.

³² Sombi Jonadabu mwanaakwe Shimeya mukwabo Defedi wakaamba ayi, “Nobaami bangu, mutanyumfwili kwaamba ayi bana banu boonse bacaikwa. NguAmunonibo ufwite. Abusalomu wakalinga kubwenekete ayi ulicitile Amunoni mfundilishi kuswabo bushiku Amunoni mbwaakakumana aTama nankashi yakwe cakumukakatisha.

³³ Nkambo mutalisukamibo ayi bana banu basankwa bamwi boonse bafwa. NguAmunonibo eenka.”

³⁴ Paciindi ico Abusalomu kaali waloboka kale. Ono musankwa wakalinga pabulishi bwakulindilila ndyaakeenamuka, wakabonabo bantu baanji kabesa cikunkuluka kalundu pambo lyakwe munshila. Shikulindilila uyo wakacica waya walwiita mwaami ayi, “Ndaboona basankwa batoosa cikunkuluka kalundu kulubasu lwa kuOlonaimu.”

³⁵ Mpeeke Jonadabu wakaambila mwaami ayi, “Ncakwiila mbalya bana banu besa mbondaambila nemusebenshi wanu.”

³⁶ Lyalo ingayi amanebo kwaamba boobo abalo beene nkupola akutalika kulila cakooloma. Alakwe mwaami pantu pomwi abasebenshi bakwe boonse bakalila abuumbi.

³⁷ Ono Abusalomu wakalobokela kuli Talumayi mwanaakwe Amiyudi, mwaami wa cishi ca Geshuli. Nakubi boobo Defedi wakalinga kunoolilabo Amunoni mwanaakwe kwaciindi cilaamfu.

³⁸ Kuswa bushiku Abusalomu mbwaakalobokela kuGeshuli, wakekalaako myaaka yotatwe.

³⁹ Mpeeke mwaami Defedi wakamuyeeya abuumbi kumubonaawo mwanaakwe alimwi, mukwiinga ciindi ico wakalinga kulubitelubiteeko shalufu lwakwe Amunoni.