2 Samwelo 12 - Baibo Busansulushi Bwa Libuku Ili

Natani mbwaakaambila Defedi ayi wabisha

¹ Mpomunyaawo Mwaami Lesa wakatuma Natani mulaluki kuli Defedi. Ndyaakashika kuli Defedi, wakaamba ayi, “Amubone, kwakalinga basankwa bobilo bakalinga kwikala mundabala yomwi. Womwi wakalinga mubile, umwi kaali mukandu.

² Mubile wakalinga kucite mbelele aŋombe shiinji,

³ sombi mukandu wakalinga kucitebo mwanaambelele mwanakashi womwi uyo ngwaakoola, alimwi wakakulila muŋanda yakwe. Wakalinga kumusanina ashakulya shaakwe mwiine akumusuminisha kunwa munkomeshi yakwe. Wakalinga kumulela pamyeendo yakwe. Ncakwiila mwanaambelele uyo wakalingabo anga ngumwaana mwanakashi kumusankwa uyo.

⁴ “Bumwi bushiku mubile wakapolelwa mweensu. Ono mukubamba cakulya ca mweensu taakwe kucaya pambelele nabi ŋombe shakwe. Sombi wakaya wabwesa mwanaambelele mwanakashi wa mukandu akubambila cakulya mweensu wakapolela nguwe mwiine.”

⁵ Mpomunyaawo Defedi wakakalala abuumbi ceebo ca mubile uyo akwaambila Natani ayi, “Bweenka mbocibete lushinisho ayi Mwaami Lesa ngumuumi, ncakwiila musankwa uyo ulyeelete kucaikwa!

⁶ Mukulipila ulyeelete kwiilikawo shone pamwanaambelele mwanakashi uyo ceebo cakucita cintu ca mushobo uyo akubula nkumbu.”

⁷ Mpeeke Natani wakaambila Defedi ayi, “Muntu uyo ndimwe! Amukutike! Mwaami Lesa, Lesa wa bene Isilaeli waamba ayi, ‘Ndakakusala kuba mwaami wa bene Isilaeli kwiinda mukukunanika mafuta akukufuna ayi Saulo atakucaayi.

⁸ Ndakakupa bamuŋanda yakwe akubika bamakaakwe mumaansaako. Ndakakupa bwaami bwa bene Isilaeli abene Juda. Na ishi shoonse shakaceya naakwiinga ndakwiilikilaawo ashimwi.

⁹ Ino wanyanshilanshi maswi angu nebo neMwaami Lesa kwiinda mukucita cintu cibiibi mumeenso angu? Wakacaisha Uliya mwine Iti munkondo. Wakamucaisha kubene Amoni akubwesa mukaakwe wamweeba.

¹⁰ Paceebo ceeco inkondo teshi ikamaneewo pabamuŋanda yako mukwiinga wanyaansha mukubwesa muka Uliya mwine Iti akumweeba.

¹¹ Ntookulwiitilisha kwaamba ayi ndaakulengesha womwi pakati ka bamuŋanda yako kuleta mapensho pali ndiwe. Ndakubwesa bamakaako akubapa shikamukobonyoko, mpeeke ulaakukumanaabo lumwi lubala webo omwiine koobweneeko.

¹² Webo wakacicita mubushishi, sombi nebo ndaakucita shintu ishi lumwi lubala pameenso a bene Isilaeli boonse.’ ”

¹³ Mpomunyaawo Defedi wakaambila Natani ayi, “Ncakwiila ndabiisha pameenso aMwaami Lesa.” Mpeeke Natani wakakumbula ayi, “Mwaami Lesa walekelela cibiibi cako, aboobo teshi ukafwe.

¹⁴ Nakubi boobo, ceebo cakwaamba ayi wanyansha Mwaami Lesa, mwaana musankwa ngoocitileemo utoofwa.”

Mwanaakwe Defedi mbwaakafwa

¹⁵ Mpeeke Natani ndyaakaboolela kuŋanda yakwe, Mwaami Lesa wakalengesha mwaana uyo Defedi ngwaakashalila mumuka Uliya kuciswa.

¹⁶ Defedi wakakombelela kuli Lesa ayi mwaana uyo abe kabotu. Wakalikasha kulya alimwi lyoonse mashiku wakalinga kunjila muŋanda yakwe akoona panshibo.

¹⁷ Bacinenenene ba kuŋanda ya mwaami bakeelesha kumubushaawo panshi apo, sombi wakakaka, alimwi taaku cakulya ncaakalinga kulyaabo.

¹⁸ Lyalo ndipakeendabo nsondo, mwaana uyo wakafwa, sombi bacinenenene bakwe Defedi bakaloonda kumulwiita cikani ico. Bakalyaamboosha ayi, “Amubone mwaana kaacili muumi, twalinga kumubandikila, sombi taalinga kutunyumfwila. Ino ono inga twacitalika buyani cikani ici. Sa te inga walicitabo cimwi cintu cibiibi?”

¹⁹ Ono Defedi wakabona bacinenenene bakwe kabatepeteshanya akwishiba ayi mwaana wafwa. Mpomunyaawo wakeepusha ayi, “Sa mwaana wafwa?” Abalo bakakumbula ayi, “Ee, wafwa.”

²⁰ Lyalo Defedi wakanyamukaawo panshi apo. Ndyaakamana kusamba, kunana mafuta akufwala shakufwala shiimbi, wakaya kumusena usalalite wa Mwaami Lesa akulambila. Mpeeke wakaya kuŋanda yakwe, wasenga ayi bamupe cakulya akucilya ingayi bamanebo kumubambila.

²¹ Kuswawaawo bacinenenene bakwe bakamwiipusha ayi, “Swebo ici catwaalila mwakucitola! Mwaana kaacili muumi, mwalinga kulikasha kulya akulila buumpute. Sombi mbulya mwaana ndyaafwa mwabuuka akutalika kulya!”

²² Mpomunyaawo Defedi wakabakumbula ayi, “Mwaana kaacili muumi ndakalikasha kulya akulila buumpute, mukwiinga ndakalinga kuyeeya ayi mpashi Mwaami Lesa inga waba aluse pali ndime, akulengesha mwanaangu ayi atafwi.

²³ Ono bulya mbwaafwa inga ndalikashishanshi kulya? Sa inga ndamubusha ayi abe muumi alimwi? Sobwe, nebo ndimenshi nkaye nkwaaya, sombi lakwe taakoonshi kuboola kuli ndime.”

Solomoni mbwaakashalwa

²⁴ Mpeeke Defedi wakoombulusha Batisheba mukaakwe. Lyalo Defedi wakakumanaakwe. Wakashala mwaana musankwa akumutumba ayi Solomoni. Mwaami Lesa wakasuna mwaana uyo abuumbi.

²⁵ Paceebo ceeco wakaambila Natani mulaluki ayi aye amupe liina lya Jedidiya, mukwiinga Mwaami Lesa wakamusuna abuumbi.

Defedi mbwaakakoma ndabala ya Laba

²⁶ Paciindi ico Joabu wakatolelela kulwana Laba ndabala inene ya bene Amoni alimwi wakalinga pafwaafwi akwiikoma.

²⁷ Mpeeke wakatuma beshinkombe kuli Defedi ayi bakaluule ayi, “Ndeelwana ndabala ya Laba akubwesa musena nkobakusha maanshi.

²⁸ Ono amubunganye bashilumamba banu bamwi boonse kwaamba ayi mwise mwiilwaane akwiibika mumaansaanu nobeene. Nshisuni kwiikoma ceebo inga bantu beetumba liina lyangu mukulumba ndime.”

²⁹ Aboobo Defedi wakabunganya bashilumamba bakwe, waya mukulwana ndabala ya Laba akwiikoma.

³⁰ Mpeeke Defedi wakabwesa mushini wa golodi wakalinga kumutwi wa cibumbwabumbwa cakwe lesa wa bene Amoni, uyo wakalinga kulema makilogilamu ali 34. Wakalinga kucite libwe lya makwebo. Mushini uyo wakabikwa kumutwi wakwe Defedi. Defedi wakasaala shintu shiinji kuswa mundabala iyo.

³¹ Bantu ba mumo wakabapa ncito yakusebensesha shakutimbusha mapulanga, mase, tweembe akubakakatisha kunokuuma ncelwa. Wakacita bweenka ubo akumandabala amwi a bene Amoni. Lyalo lakwe abashilumamba bakwe bakaboolela kuJelusalemu.