2 Samwelo 11 - Baibo Busansulushi Bwa Libuku Ili

Cikani cakwe Defedi aBatisheba

¹ Kumatalikilo amupewo, ciindi ico bamaami ncebakalinga kuyitaamo kunkondo, Defedi wakatuma Joabu abacinenenene bakwe pantu pomwi abashilumamba bene Isilaeli boonse kuya kunkondo. Bakakoma bene Amoni akushinguluka ndabala inene ya Laba. Sombi Defedi wakalingabo muJelusalemu.

² Bumwi bushiku macolesha Defedi wakabuka pabulo bwakwe akuya ceendaana paciluli ca ŋanda yakwe ya bwaami. Ndyaakalinga waawo, wakabona mwanakashi kaasamba bulya. Mwanakashi uyo wakalinga mubotu abuumbi.

³ Aboobo Defedi wakatumaako muntu ayi aye amwiipusheepushe akumwishiba. Mpeeke Defedi wakalwiitikwa ayi nguBatisheba mwanaakwe Eliyamu alimwi ngumuka Uliya mwine Iti.

⁴ Mpomunyaawo Defedi wakatumaako beshinkombe ayi baye bamulete. Mwanakashi uyo wakesa kuli Defedi. Mpeeke wakakumanaakwe. Ono ciindi ico Batisheba ndyaakaswabo munsondo yakwe yakutanoosalalite kweelana aMilawo ceebo cakukubala. Lyalo wakaboolela kuŋanda yakwe.

⁵ Mwanakashi uyo wakeendwa nshiku, mpeeke wakatuma nkombe kumwaami Defedi ayi, “Nebo ndamiita.”

⁶ Mpomunyaawo Defedi wakatuma nkombe kuli Joabu yakwaamba ayi, “Tuma Uliya mwine Iti ese kuno.” Alakwe Joabu nkumutuma waya kuli Defedi.

⁷ Uliya ndyaakashika kuli Defedi, wakamwiipusha na Joabu abashilumamba boonse bali kabotu, kubikaawo ankoondo mboyakalinga kweenda.

⁸ Kuswawaawo Defedi wakaambila Uliya ayi, “Koya kuŋanda yako ukookeshe. Mpeeke Uliya wakaswa muŋanda ya bwaami iyo. Pesule mwaami Defedi wakatumina Uliya cipo.”

⁹ Nakubi boobo Uliya taakwe kuyawo kuŋanda yakwe, wakoonabo pamwinjililo wa ŋanda ya bwaami pantu pomwi abasebenshi ba mwaami wakwe.

¹⁰ Defedi ndyaakalwiitikwa ayi, “Uliya taakwe kuyaako kuŋanda yakwe,” wakamwiipusha ayi, “Ino nceebonshi ncootakwe kuyita kuŋanda bulya mbowakaswa mumushinso ulaamfu?”

¹¹ Uliya wakakumbula Defedi ayi, “Bashilumamba bene Isilaeli abene Juda boonse bali munkondo, Libokoshi lya Cipangano alyalo bali alyo. Joabu mutanjilili wangu abashilumamba bakwe bamwi boonse batokoona pampewo mumisumba. Ino nebo inga ndaya buyani kuŋanda mukulya, kunwa alimwi akukumana abakaangu? Bweenka mbocibete lushinisho ayi mwebo muli boomi, anebo ncakwiila teshi nkacite cintu ca mushobo wooyo napaceyi!”

¹² Lyalo Defedi wakamwaambila ayi, “Anu kalaako bushiku abumwi bomwi, nkokwaamba ayi ciilo ndaakukusuminisha ayi uboolele.” Mpeeke Uliya wakekala muJelusalemu ubo bushiku abwakaboolaawo.

¹³ Mpomunyaawo Defedi wakeeta Uliya ayi ese alyaakwe cakulya ca macolesha. Lyalo wakamukolesha bwalwa. Sombi abwalo bushiku ubo Uliya taakwe kuya kuŋanda yakwe, wakoona pampasa yakwe pakati ka basebenshi ba mwaami wakwe.

¹⁴ Lyalo macuunsa Defedi wakalembela Joabu nkalata akwiitumya kwiinda muli Uliya.

¹⁵ Ono munkalata iyo wakalembaamo ayi, “Ubike Uliya mumundando wa nkondo wa kunembo kulubasu uko nkondo nkoyalula. Lyalo muboole pesule akumushiya ayi bamuyase afwe.”

¹⁶ Paciindi ico bashilumamba bakwe Joabu kabashingulukite ndabala inene. Aboobo wakabika Uliya palubasu pakalinga balwani bayumu.

¹⁷ Basankwa bamundabala iyo ndibakaswa akulwana bashilumamba bakwe Joabu, bamwi bashilumamba bakwe Defedi bakacaikwa kubikaako aUliya mwine Iti uyo.

¹⁸ Kuswawaawo Joabu wakatumina Defedi busansulushi bwa nkondo mboyakalinga kweenda.

¹⁹ Mpeeke wakalasha beshinkombe ayi, “Mwaakumana kuluula nkondo mboitokweenda kumwaami,

²⁰ mpashi inga wakalala akwiipusha ayi, ‘Ceebonshi mwakasena kufwaafwi andabala inene iyo ayi mulwane? Sa temwakalinga kwishi ayi inga bamuwaala mifwi kabali peculu lya lilinga kwaamba ayi bamuyase?’

²¹ Sa tamwiibalukite Abimeleki mwanaakwe Gidyoni mbwaakacaikwa kuTebesi? Mwanakashi wakaloshabo libwe lyakupelelaawo kuswa peculu lya lilinga akumucaya. Ono ceebonshi mwakasena pafwaafwi alilinga? Na mwaami akamwiipushe boobo, mukaambebo ayi, ‘Alakwe Uliya musebenshi wanu wakacaikwa.’ ”

²² Mpomunyaawo shinkombe uyo wakanyamuka. Lyalo ndyaakashika wakalwiita Defedi shoonse shakamutuma Joabu ayi aluule.

²³ Shinkombe wakaambila Defedi ayi, “Bashilumamba abo bakalinga batwiinda nkusu cakutuboosha mumusena utacite shisamu. Nakubi boobo twakababoosha kumwinjililo wa ndabala alimwi.

²⁴ Lyalo beshimata bakatalika kutuwaala mifwi kuswa palilinga. Mpeeke bacinenenene banu bamwi nomulemekwa bakafwa. Alakwe musebenshi wanu Uliya mwine Iti ulifwite.”

²⁵ Mpeeke Defedi wakaambila shinkombe ulya ayi, “Joabu umulwiite ayi, ‘Muntu taakoonshi kwishiba weenga wafwa munkondo. Aboobo cikani ico citamulengeshi kulisukama.’ Umulwiite alwanishebo kushikila akome ndabala iyo. Umuyuminishe mukumulwiita boobo.”

²⁶ Ono muka Uliya ndyaakanyumfwa ayi ibaye wakafwa, wakamulila.

²⁷ Cililo ndicakeenda, Defedi wakatuma bantu ayi balete Batisheba kuŋanda yakwe. Lyalo wakamweeba akushalilamo mwaana musankwa. Sombi cikani cakacita Defedi cakacima Mwaami Lesa.