2 Samwelo 10 - Baibo Busansulushi Bwa Libuku Ili

Defedi mbwaakakoma bene Amoli

¹ Mukuya kwanshiku Naashi mwaami wa bene Amoni wakafwa. Lyalo Anuni mwanaakwe musankwa wakapyana bwaami bwakwe.

² Mpeeke Defedi wakaamba ayi, “Ndyeelete kutondesha bushicibusa kuli Anuni mwanaakwe Naashi, bweenka bwakacita baishi kuli ndime.” Lyalo wakatuma beshikumwiimikaninaako ayi bakalishaanisheko Anuni pakufwa kwa baishi. Basankwa bakwe Defedi ndibakashika kuAmoni,

³ bamaloba ba bene Amoni bakaambila Anuni mwaami wabo ayi, “Sa mutooyeeya ayi ndushinisho nceebo cakupa bulemu baishiwanu Defedi ncaatumina basankwa bakwe ayi bese bamulishaanisheeko pakufwa kwabo? Sa taakwe kubatumabo kuli ndimwe ayi babonebone ndabala inene mbweebete akwiisensa, lyalo akese akeekoome?”

⁴ Mpomunyaawo Anuni wakacata basankwa bakwe Defedi abo, wabacesa ndesu lubasu, watimbula shakufwala shabo kuswa mucibuno kuya panshi, akubaambila ayi banooya.

⁵ Basankwa abo bakalinga kuloonda kuboola kumishaabo mukwiinga bakalinga kufwite nsoni abuumbi. Defedi ndyaakanyumfwa, wakatuma beshinkombe ayi baye babakumanye akubalwiita ayi bekale muJeliko kushikila ndesu shikakule.

⁶ Bene Amoni ndibakeshiba ayi Defedi wabacimwa anga ncintu cibolete, bakabweleka bashilumamba bene Silya bapanshi bali 20,000 kuswa muBeti Lewobu aSoba, mwaami wa cishi ca Maaka abashilumamba bakwe bali 1,000 pantu pomwi abashilumamba bali 12,000 kuswa kuTobu.

⁷ Defedi ndyaakanyumfwa cikani ico, wakatuma Joabu abashilumamba boonse ayi bakabalwaane.

⁸ Mpeeke bene Amoni bakaswa mundabala yabo inene akulibambila kulwana kumwinjililo wa ndabala iyo. Balo bashilumamba bene Silya abo bakaswa kuLewobu aSoba, pantu pomwi abashilumamba bene Tobu alimwi abene Maaka, bakalibambilila muluundu kumusena utacite shisamu.

⁹ Ono Joabu wakabona kwaamba ayi kunembo akwisule kuli bashilumamba balibambite kulwana. Lyalo wakasala bashilumamba bakalinga kwiinditeewo mucishi ca Isilaeli coonse akubalansha kwakalingila bene Silya.

¹⁰ Bamwi boonse bakacalaawo wakababika mumaansa akwe Abishayi mukwabo uyo wakabalansha kwakalingila bene Amoni.

¹¹ Mpeeke Joabu wakaambila Abishayi ayi, “Na bene Silya banjumine kubakoma, webo inga wesa wamfunaako. Sombi na bene Amoni bakuyumine kubakoma, ingayi nebo ntoosa mukukufunaako.

¹² Uyume alimwi tulwane cakubula boowa kwiimikanina bene misheesu amandabala anene akwe Lesa wesu. Mwaami Lesa aacite kweelana akuyanda kwakwe.”

¹³ Mpomunyaawo Joabu abashilumamba mbwaakalingaabo bakanyamuka kuya mukulwana bene Silya. Mpeeke bene Silya bakacica.

¹⁴ Lyalo bene Amoni ndibakabona ayi bene Silya bacica, abalo bakacica kuloonda Abishayi akwinjila mundabala inene iyo. Lyalo Joabu wakapiluka kuswa mukulwana bene Amoni akuboolela kuJelusalemu.

¹⁵ Bene Silya ndibakaciyeeya akubona kwaamba ayi bakomwa kubene Isilaeli, bakabunganya bashilumamba babo boonse alimwi.

¹⁶ Mpeeke Adadesa wakatuma bantu ayi baye balete bene Silya bakalinga kwiindilila Mulonga wa Yufuletisi. Lyalo bakaya kuElamu, kabali mumaansa akwe Shobaki mutanjilili wa bashilumamba bakwe Adadesa mwaami wa cishi ca Soba.

¹⁷ Defedi ndyaakanyumfwa cikani ico, wakabunganya bene Isilaeli boonse, basubuka Mulonga wa Joodani akuya kuElamu. Bene Silya bakalibambila mindando yabo ya nkondo akulwana Defedi.

¹⁸ Sombi bakacica kuloonda bene Isilaeli. Mpeeke Defedi wakacayaawo bashilumamba beshikulwanina mushikoci sha maaki bali 700 alimwi abapanshibo bali 40,000. Shobaki mutanjilili wa bashilumamba babo alakwe bakamuyasa akufwa peenka apo.

¹⁹ Lyalo bamaami, abo bakalinga basebenshi bakwe Adadesa, ndibakabona ayi bakomwa kubene Isilaeli, bakabasenga luumuno. Mpeeke bakaba basebenshi kubene Isilaeli. Kuswawaawo bene Silya bakalinga kuloonda kucafwa tubili bene Amoni.