2 Samwelo 1 - Baibo Busansulushi Bwa Libuku Ili

Defedi mbwaakeshiba ayi Saulo wakafwa

¹ Pesule lya kufwa kwakwe Saulo, Defedi wakaboola kuswa mukukoma bene Amaleki akwikalabo nshiku shobilo muSikilagi.

² Ingayi bwatatu musankwa wakapola kuswa kumisumba yakwe Saulo, kaafwete shakufwala shikwamookite alimwi abulongo mumutwi. Ndyaakashika kuli Defedi wakafukama cakushisha ciwa panshi mukumupa bulemu.

³ Mpomunyaawo Defedi wakamwiipusha ayi, “Waswa kuli?” Lakwe wakakumbula ayi, “Ndaloboka kumisumba ya bene Isilaeli.”

⁴ Mpeeke wakeepusha ayi, “Ndwiite, nciinshi cacitika?” Wakakumbula ayi, “Bashilumamba bene misheesu bakacica kunkondo, alimwi baanji bakacaikwa. Saulo aJonasani mwanaakwe boonse balifwite.”

⁵ Lyalo Defedi wakeepusha musankwa wakamuletela nkombe ayi, “Ino weshiba buyani ayi Saulo aJonasani mwanaakwe balifwite?”

⁶ Musankwa uyo wakakumbula ayi, “Nebo ndakacanikwaawo paKalundu ka Gilubowa. Ono ndakabonabo Saulo utooshimpila kulisumo lyakwe, beshikulwanina mushikoci sha maaki abeshikulwanina pamaaki bene Filisiti kabalibo pafwaafwi akumulimba.

⁷ Ndyaakacebuka akumbona, wakangolobesha, mpeeke anebo ndakeepusha ayi, ‘Mulisuni ayi ncite buyani nkambo?’

⁸ Lyalo wakanjipusha ayi, ‘Ino ndiwe ni?’ Nebo ndakakumbula ayi, ‘Ndi mwine Amaleki.’

⁹ “Mpeeke wakaamba ayi, ‘Kwesa kuno uncaaye. Ndacisikwa cibiibi alimwi ndi pafwaafwi akufwa.’

¹⁰ Aboobo ndakaya ndamucaya mukwiinga ndakalinga kumubwene ayi na awebo, utoofwa. Lyalo ndakabwesa mushini ngwaakalinga kufwete kumutwi wakwe ampatishi ya kumaansa akushileta kuli ndimwe nobaami bangu.”

¹¹ Mpomunyaawo Defedi abashilumamba bakwe boonse bakakwamoona shakufwala shabo kubuumba.

¹² Bakalila cakooloma akulikasha kulya kushikila macolesha ceebo ca lufu lwakwe Saulo aJonasani mwanaakwe alimwi alikoto lya bashilumamba ba Mwaami Lesa pantu pomwi amushobo wa bene Isilaeli. Bakacita boobo mukwiinga baanji bakacaikwa kunkondo.

¹³ Lyalo Defedi wakeepusha musankwa wakamuletela nkombe iyo ayi, “Ino ulaswa kuli?” Alakwe wakakumbula ayi, “Ndi mwanaamuswamashi, mwine Amaleki.”

¹⁴ Defedi wakamwiipusha alimwi ayi, “Ino webo cakuyumya moyo kwaamba ayi ucaye mwaami wakasalwa aMwaami Lesa nciinshi?”

¹⁵ Mpomunyaawo Defedi wakeetawo womwi pabasankwa bakwe akumwaambila ayi, “Koya umucaaye ulya!” Mpeeke wakaya wamucaya.

¹⁶ Defedi wakalinga wamwaambila kale ayi, “Ulu lufu waliletela omwiine. Walipa mulandu omwiine ndiwalyaambilila ayi wakacaya mwaami uyo Mwaami Lesa ngwaakasala kwiinda mukunanikwa mafuta.”

Lwiimbo lwakwe Defedi lwakulila Saulo aJonasani

¹⁷ Mpeeke Defedi wakeemba lwiimbo ulu lwakulila Saulo aJonasani mwanaakwe,

¹⁸ alimwi wakaamba ayi boonse basankwa bene Juda balyeelete kwiishikwa. Lwiimbo ulu lulembetwe mulibuku lyakwe Jasha.

¹⁹ “Nkombalume shako ocishi ca Isilaeli shamana katyenke patulundu twako. Maawe baya basankwa beene beene!

²⁰ “Cikani ici mutakashimikili bene Gati, nabi kucaambilisha mumikwakwa ya Ashikeloni, mukwiinga inga bakondwa balutundu bene Filisiti, ncakwiila inga basangalala balutundu abo bakunsengwe.

²¹ “Ee, patulundu twa Gilubowa, apakabule kulokelaawo mume nabi mfula, apakabule myuunda kweenga kwaswa cipo ca shili anga ngamaila. Ceebo mayawo a basankwa beene beene mpwaaselenkene apo. Mbulya ono liyawo lyakwe Saulo talitoonanikwa amafuta.

²² Buta bwakwe Jonasani bwalinga kununka lufu, amupeeni wakwe Saulo tewalinga kucite nkumbu, shalinga kooneka basankwa beshinkusu, shalinga kucaya balwani baanji.

²³ “Saulo aJonasani balinga bantu bakondelesha alimwi basunikwi, mubuumi bobilo akubulongo bobilo, basankwa bacabeene anga ngumumbankwashi, bacite nkusu shiinda nkusu sha nkalamu.

²⁴ “Nobanakashi bene Isilaeli amulile Saulo, wakalinga kumufwalika shisani shiteshimite shisalala, wakalinga kubotesha shakufwala shanu ashintu sha golodi.

²⁵ “Maawe baya basankwa beene beene! Bakacaikwa munkondo. Ee, Jonasani ulikampeme mutulundu.

²⁶ “Jonasani mukwesu wancisa abuumbi kumoyo, mukwiinga ndalinga kukusuni abuumbi. Lusuno lwako kuli ndime lwalinga kukondelesha abuumbi, lwalinga kukondelesha kwiinda aloolo lwa balutundu.

²⁷ “Maawe baya basankwa beene beene! Shakulwanisha shabo sha nkondo shaloba!”