2 Pita 3 - Baibo Busansulushi Bwa Libuku Ili

Kushomesha shakwisa kwa Mwaami

¹ Nomusunikwi, nkalata iyi njentoomulembela njabili. Mumakalata oonse obilo ndalinga kweelesha kumwiibalusha makani aya kwaamba ayi mutolelele kuba amiyeeyo iluleme.

² Ndisuni ayi mwiibaluke maswi akaamba balaluki bakulukulu basalalite kale kale alimwi amulawo wa Mwaami Mupulushi wesu, uyo batumwi ngobakamupa.

³ Cinene ncemweelete kwishiba ncakwaamba ayi munshiku shino shakweelaako, kulaakwisa bantu beshikumuseka abo beendeleshekwa alunkumbwa lwa mibili yabo.

⁴ Balaakwaamba ayi, “Te Klistu wakashomesha ayi ulaakwisa? Ino uli kuli? Bamashali besu bakulukulu bakafwabo kale kale, sombi shintu shoonse shicilibo bweenka mboshakalinga kumatalikilo a cishi!”

⁵ Balakaka kashanga kushoma ayi kale kale Lesa, kwiinda mumaswi akwe wakalenga liculu alimwi acishi. Wakalenga inshi kuswa mumaanshi ndyaakapansaanya inshi amaanshi.

⁶ Alimwi kwiinda mumaanshi ngomunya, bantu ba mucishi ca panshi cikulukulu bakanyonyoolwa.

⁷ Sombi kwiinda mumaswi akwe ngomunya aya, Lesa utoolama liculu alimwi acishi ca panshi ncetubona bulya, kwaamba ayi ulaakushinyonyoola amulilo. Ulishibambite kushikila pabushiku mbweshi akoomboloshe alimwi akunyonyoola bantu batakonkeli kuyanda kwakwe.

⁸ Anu mutalubiiko cintu comwi ici nomusunikwi, cakwaamba ayi taaku bupusano Mwaami Lesa mbwaabona pabushiku bomwi alimwi amyaaka ili cuulu comwi. Kuli nguwe shobilo ishi shilyeelenebo.

⁹ Teshi kwaamba ayi Mwaami wacelwa kucita kweelana ambwaakashomesha, kweelana ambobayeeya bamwi. Sombi ucimukalikila moyo mukwiinga taasuni muntu nabi womwi kunyonyoolwa. Ncakwiila ulisuni kwaamba ayi boonse basanduke kuswa kushibiibi shabo.

¹⁰ Sombi Bushiku bwakwisa kwa Mwaami, bulaakwisa anga ngumwiipi. PaBushiku ubo, liculu lilaakumana acoongo cinene, shintu shoonse sha kwiculu shilaakupya akunyonyoolwa, acalo cishi ca panshi ashintu shoonse shiliimo shilaakupya.

¹¹ Ono na shintu shoonse shilaakunyonyooka boobo, ino mulyeelete kuba bantu bali buyani? Ncakwiila mulyeelete kuba bantu basalalite bakonkela kuyanda kwakwe Lesa.

¹² Mutoolindilila Bushiku bwa Mwaami Lesa alimwi musebense cankusu kwaamba ayi bufwambaane kwisa. PaBushiku ubu, liculu lilaakupya akunyonyoolwa, ashalo sha kwiculu shilaakusunguluka kucikasaashi ca mulilo.

¹³ Sombi swebo tutoolindila liculu lipya alimwi acishi ca panshi cipya, kweelana aLesa mbwaakashomesha, umo mweshi mukanoolibo bululami.

¹⁴ Paceebo ceeco nomusunikwi, pakunoolindila kwisa kwa Bushiku ubu, amusebense cankusu kwaamba ayi mukacanike kamuli muluumuno, kamusalalite alimwi kamutacite kampenda pameenso akwe Lesa.

¹⁵ Mulyeelete kwishiba ayi kukalika moyo kwa Mwaami wesu, ncoolwe ncaatoomupa kwaamba ayi mupulushikwe. Alakwe Paulo, mukwabesu usunikwi, wakamulembela shamakani ngomunya aya kwiinda mubusongo bwakamupa Lesa.

¹⁶ Aya ngomakani ngaambaawo mumakalata akwe oonse. Mumakalata akwe muli shintu shimwi shiyumu kunyumfwa. Bantu batacite lushibo alimwi abatana kuyuma mulushomo tabaasansululi kabotu, kweelana ambobacita Malembo akwe Lesa amwi. Mukucita boobo, balalinyonyoola beene.

¹⁷ Paceebo ceeco mwebo nomusunikwi mukwiinga mulishi kale shintu ishi, mucenjele kwaamba ayi mutatanjililwi kuswa munshila ibotu ashilubo sha bantu aba bamucita shibi, akuwa kuswa kumusena wanu uli kabotu.

¹⁸ Sombi mwebo amutolelele kukula muluse alimwi alushibo lwa Mwaami Jesu Klistu, Mupulushi wesu. Bulemu bube kuli nguwe bulya alimwi amuyayaya! Ameni.