2 Pita 2 - Baibo Busansulushi Bwa Libuku Ili

Bafundishi babeshi

¹ Kwakalinga balaluki babeshi pakati ka bene Isilaeli, alimwi mbweekoobo apakati kanu palaakuba bafundishi babeshi. Cabushishi, balaakuleta njiisho shifulungene alimwi shinyonyoola, akukaka Mwaami wabo wakabalubula. Mukucita boobo, balaakuliletela kunyonyoolwa kwalubilo.

² Bashomi baanji balaakukonkela micito yabo iyo ibiibi. Ono bakunsengwe pakubona boobo, balaakucobola Nshila ya lushinisho.

³ Ceebo cakusuna bubile, balaakusebensesha makani akubeca. Mulandu wabo utoobalindilila kuswabo kale kale alimwi kunyonyoolwa kwabo kulibambitwe kale.

⁴ Mukwiinga Lesa taakwe kulekabo baanjelo bakabisha, sombi wakabawaala kumusena wa bafu, mumunshinshe umo mobaangitwe kushikila Bushiku bwakoomboloshekwa.

⁵ Alimwi Lesa taakwe kulekabo bantu bakulukulu abo ndyaakaleta muyoba pabantu batakalinga kumunyumfwila. Sombi wakapulushabo Nowa, uyo wakalinga kushimikila shabululami, alimwi abamwi bali bosanwe abobilo.

⁶ Abalo bantu ba mumandabala anene a Sodoma aGomola Lesa wakaboombolosha akubapa mulandu. Wakabanyonyoola amulilo. Ici cakaba citondesho ca sheesho sheshi shikacitike kubantu beshi bakabule kumunyumfwila kunembo.

⁷ Lesa wakapulusha Loti, muntu ululeme uyo wakalinga kupenshekwa abuumbi ceebo ca buumi butaluleme, bwa bamucita shibi abo.

⁸ Muntu ululeme uyu ndyaakalinga kwikalaabo, inshiku shoonse wakalinga kupenshekwa abuumbi mumoyo ceebo ca micito yabo ibiibi njaakalinga kubona akunyumfwa.

⁹ Nkokwaamba ayi Mwaami Lesa ulishi bwakupulusha bantu baluleme kumasunko alimwi abwakulama bamucita shibi kwaamba ayi bakapekwe mulandu paBushiku bwakoomboloshekwa,

¹⁰ bunene bunene abo bakonkela lunkumbwa lwa mibili yabo akusuula bulemu ankusu shakwe Lesa. Bafundishi babeshi aba tabaloondi balalisumpula alimwi tabaloondiiwo abalemekwa ba kwiculu, sombi balabacobola.

¹¹ Nakubi kwaamba ayi baanjelo balicite bulemu alimwi ankusu kwiinda mbabo, tabatoonti camucobwe balemekwa ba kwiculu pameenso akwe Lesa.

¹² Sombi bantu aba balibo anga mbanyama batacite maano, bakalengelwa kucatwa akucaikwa. Balacobola shintu shoonse nshibatanyumfwishi. Balaakunyonyoolwa bweenka bunyonyoolwa banyama ba muluundu.

¹³ Balaakupenshekwa ceebo bakalengesha bamwi kupenshekwa. Cibabotela balo nkucita shintu shisangalasha mibili yabo lumwi lubala. Bali anga ngamatombe mukwiinga ndibalya amwebo, balasangalala mububeshi bwabo.

¹⁴ Tabalangibo mwanakashi cakutamukumbwa, balisunibo kucita bufuule lyoonse. Balalengesha bateshi bayumu mulushomo kubisha. Bakeshibila kuyandishisha buboni. Lesa ulaakubapa mulandu!

¹⁵ Bantu aba bakashiya nshila iluleme, basoweka akukonkela cakacita Balamu, mwanaakwe Bewoli, uyo wakalinga kusuni kucana maali kwiinda mukucita shibiibi.

¹⁶ Lakwe wakakalalilwa ceebo ca shibiibi shakwe. Mbongolo ngumunyama utaambi, sombi yakaamba bweenka mbuli muntu akukasha mulaluki uyu kucita shabuluya.

¹⁷ Bantu aba bali anga ntuntupu tutacite maanshi alimwi anga ngushikunku utolaanishikwabo amuuwo. Lesa wakababambila musena ushiyabo mbi.

¹⁸ Balaamba maswi akulisumpula atacite ncito alimwi kwiinda mulunkumbwa lwa bufuule, balalengesha kubisha abo batooya cilubuka pakati ka bamucita shibi.

¹⁹ Balashomesha babyaabo lwaanguluko, sombi balo beene mbasha ba shintu shinyonyoola buumi. Mukwiinga muntu ulaba musha wa cintu cili coonse camukoma.

²⁰ Bantu balapulushikwa mushintu shibiibi sha mucishi ca panshi kwiinda mukwishiba Mwaami Jesu Klistu, Mupulushi wesu. Sombi na baboola mushintu isho akukomwa, ncakwiila bwikaalo bwabo bulabica kwiinda mbuli mbobakalinga pakataanshi.

²¹ Naakwiinga cakabota kuli mbabo kuteshibaawo nshila ya bululami, kwiinda kwaamba ayi beshibe, sombi alimwi pesule baalookile mulawo usalalite wakabapa Lesa.

²² Mukucita boobo, balabonesha kwaamba ayi tushimpi utu ntwalushinisho twakwaamba ayi, “Kabwa ulaboola mukulya nshaaluka,” alimwi ayi, “Nkumba njebasansha, ilaboola mukwaalabangana mumatipa.”