2 Pita 1 - Baibo Busansulushi Bwa Libuku Ili

¹ Ndime Simoni Pita, musebenshi alimwi mutumwi wakwe Jesu Klistu, nentoolembela baabo boonse bakatambula lushomo mbuli ndotucite kwiinda mubululami bwakwe Lesa abwa Mupulushi wesu Jesu Klistu.

² Luse aluumuno shikomene muli ndimwe lyoonse alyoonse, kwiinda mulushibo ndotucite pali Lesa alimwi aJesu Mwaami wesu.

Kwiita alimwi akusala kwakwe Lesa

³ Lesa kwiinda munkusu shakwe shabulemu, wakatupa shoonse shiyandika kwaamba ayi twikale buumi bwakupaila kwiine kwiine. Wakacita boobo kwiinda mulushibo ndotucite pali wooyo wakatwiita ceebo ca bulemu abubotu bwakwe.

⁴ Kwiinda muli nshisho, wakatupa shipo shinene alimwi shibotu abuumbi isho nshaakashomesha kwaamba ayi kwiinda mushipo ishi, mukapulushikwe kubunyonyooshi bwa lunkumbwa buli mucishi ca panshi akutambula buumi bwa buLesa.

⁵ Paceebo ceeco, amusebense cankusu kwaamba ayi mwiilike bwikaalo bubotu palushomo lwanu alimwi pabwikaalo bubotu, mwiilikewo lushibo.

⁶ Palushibo lwanu, mwiilikewo kulitibuka, apalo pakulitibuka, mwiilikewo kukomenya moyo, apakukomenya moyo mwiilikewo buumi bwakupaila kwiine kwiine.

⁷ Pabuumi bwakupaila kwiine kwiine, mwiilikewo lusuno lwa bwanabwankashi, apalo palusuno lwa bwanabwankashi ulo, mwiilikewo lusuno kubantu boonse.

⁸ Na mulicite shintu ishi alimwi akutolelela kuya cibikilaawo ashimwi, teshi mukabe batolo, batacite mpindu mulushibo lwa Mwaami wesu Jesu Klistu.

⁹ Sombi mushomi utacite sheeshi shintu uli anga ngumoofu. Wakalubaako ayi wakasalashikwa kuswa kushibiibi shakwe shikulukulu.

¹⁰ Paceebo ceeco nobamakwesu, amwiindilishe kusebensa cankusu ayi mushinishe kwaamba ayi kwiitwa alimwi akusalwa kwanu kwakaswa kuli Lesa. Na mwacita boobo, teshi mukaweewo,

¹¹ sombi ulaakumucalwita mulyango wa muBweene butamaani bwa Mwaami Jesu Klistu Mupulushi wesu.

¹² Aboobo teshi nkacilekeewo kumwiibalusha makani aya lyoonse nakubi kwaamba ayi mulyeeshi kale alimwi ayi mulashoma amoyo woonse mulushinisho ndomwakatambula.

¹³ Ndayeeya ayi ncibotu abuumbi kunoomwiibalusha makani aya kancili muumi.

¹⁴ Mukwiinga ndishi kwaamba ayi ciindi cakushiya mubili wangu uno cili pafwaafwi, kweelana abwakandwiita Mwaami wesu Jesu Klistu.

¹⁵ Alimwi ntokweelesha kumucanina nshila yakunokwiibalukilamo shintu ishi, nabi nebo nkafwe.

Bakamboni ba bulemu bwakwe Klistu

¹⁶ Nditwakamwishibisha ayi Mwaami wesu Jesu Klistu ulaakwisa munkusu, tatukwe kukonkela shakupangabo bantu shabucenjeshi, sombi nkusu shakwe twakashibona ameenso esu.

¹⁷ Ndyaakatambula bulemu alimwi akulemekwa kuswa kuli Lesa Ishi, wakanyumfwa liswi kuswa kuBulemu Bwiindaawo lyakwaamba ayi, “Uyu ngoMwanaangu ngoonsuni alimwi muli nguwe ndakondwa.”

¹⁸ Swebo sobeene twakanyumfwa liswi ili lyakaswa kwiculu nditwakalinga anguwe pakalundu kasalalite.

¹⁹ Aboobo tweshiba cancinencine ono ayi maswi akaamba balaluki bakulukulu ngalushinisho. Nkokwaamba ayi inga cabota na mwaakonkela mukwiinga ali anga ndilampi litoonyaka mumusena muli munshinshe kushikila bwaca alimwi kushikila mumuni wakwe Klistu ukamunike mumyoyo yanu anga ngwa ntanda,

²⁰ Sombi cinene ncemweelete kwishiba ncakwaamba ayi taaku muntu weenga wasansulula maswi a balaluki bakulukulu ali muMalembo akwe Lesa palwaakwe mwiine.

²¹ Mukwiinga balaluki bakulukulu tebakalinga kwaamba shakaswa mukuyanda kwabo beene, sombi bakalinga kutanjililwa aMushimu Usalashi ndibakalinga kwaamba maswi akwe Lesa.