2 Makani 9 - Baibo Busansulushi Bwa Libuku Ili

Mwaami mwanakashi wa kuShiba mbwaakafwakashisha Solomoni

¹ Mwaami mwanakashi wa kuShiba wakanyumfwa mpuwo yakwe Solomoni mukulambila liina lya Mwaami Lesa, wakanyamuka kuswa kuJelusalemu kwisa mukumwiipusha miipusho iyumu kukumbula. Mwaami uyo wakaya abeshikumucafwa baanji alimwi angamela shakalinga kuyumwite tununkila kabotu mubuyani, shakulibotesha shamakwebo alimwi agolodi uunji. Ndyaakakumana aSolomoni, wakamwiipusha miipusho iyo yoonse njaakalinga kucite mumoyo.

² Solomoni wakeekumbula yoonsebo. Taaku mwiipusho ngwaakaalilwa kukumbula.

³ Mwaami mwanakashi wa kuShiba wakanyumfwa busongo bwakwe Solomoni alimwi wakabona ŋanda yakwe ya bwaami njaakayaka ibotu.

⁴ Wakabona shakulya isho shakalinga kubambwa patebulu yakwe, kwakalinga koona bacinenenene bakwe, misebenselo ya basebenshi bakwe bakalinga kusebensa muŋanda yakwe ashakufwala sha pancito. Wakabona basebenshi beshikumupa shakulya na kwaba shakusekelela, milambu njaakalinga kubenga muŊanda yakwe Lesa. Ne, kucana wabula acakwaamba!

⁵ Wakaambila mwaami Solomoni ayi, “Nshendakanyumfwa mucishi cangu pamilimo yanu abusongo bwanu, ndasumina nshancinencine!

⁶ Sombi nshikwe kushoma kushikila ndindakesa mukulibonena. Nshindakashimikilwa shaceyabo kulaale. Busongo bwanu buliinditewobo kulaale kweelanisha ambondakalwiitikwa.

⁷ Balicite coolwe abuumbi bantu abasebenshi banu abo bekalabo muliimfwa lyanu lyoonse kabanyumfwa kwaamba kwanu kwabusongo!

⁸ Aalumbaishikwe Mwaami Lesa, Lesa wanu! Wabonesha mbwaasangalete pali ndimwe kwiinda mukumubika pacuuna ca bwaami bwa bene Isilaeli. Mukwiinga lusuno lwakwe pabene Isilaeli teshi lukamaane alimwi mukwiinga ulisuni kubafuna lyoonse, wamupa bwaami kwaamba ayi pakati kabo pabe koombolosha kwakutanyengelela alimwi abululami.”

⁹ Mpeeke wakapa mwaami Solomoni shipo isho nshaakaleta. Wakamupa makilogilamu a golodi ali 4,000 akuya peculu pantu pomwi atununkila kabotu mubuyani ashakulibotesha shamakwebo. Mweelo wa tununkila kabotu uto twakamupa mwaami mwanakashi wa kuShiba, wakeendaawo kukomena pawooyo wa tooto ntwaakatambulaawo kale.

¹⁰ Bantu bakwe Ilamu abo bakaleta golodi kuswa kuOfi, bakaleta ashisamu sha junipa alimwi ashakulibotesha shamakwebo.

¹¹ Solomoni wakasebensesha shisamu isho kupanga matantilo a muŊanda yakwe Lesa alimwi aŋanda yakwe. Wakashisebensesha akupanga tulumbu tunene atuniini twakulisha beshikwiimba. Taaku wakabonaawo kale shintu shakalinga shibotu mbuli sheesho mucishi ca Juda.

¹² Mwaami Solomoni wakapa mwaami mwanakashi wa kuShiba shoonse shintu nshaakasenga, kutabelenga shintu shimwi nshaakapa mwaami mwanakashi uyo kweelana akwishibila kwa bene Isilaeli. Lyalo lakwe abeshikumucafwa bakaboolela kucishi ca Shiba.

Bubile bwakwe Solomoni

¹³ Golodi Solomoni ngwaakalinga kutambula pamwaaka amwaaka wakalinga kushika kumakilogilamu ali 23,000.

¹⁴ Mweelo uyo tewakalinga kubelengelaako misonko yakalinga kuswa kubasulishi, beshimakwebo, bamaami bene Alebya alimwi akubeendeleshi ba shipansha sha cishi ca Isilaeli.

¹⁵ Solomoni wakapanga amayawo anene agolodi wakapampamikwa ali myaanda yobilo. Liyawo lyomwi alyomwi lyakatola golodi ulema makilogilamu ali 3.5.

¹⁶ Wakapanga amayawo aniini a golodi wakapampamikwa ali myaanda yotatwe. Lyomwi alyomwi lyakatola golodi ulema makilogilamu ali 2. Wakabika mayawo oonse ayo muCipinda ca Musaansa wa Lebanoni.

¹⁷ Lyalo mwaami Solomoni wakapanga acuuna cinene ca meeca a nsofu ico ncaakananika golodi wiine wiine.

¹⁸ Cuuna ico cakalinga kucite matantilo osanwe aobilo. Kwakuyaamina kwakalinga kubulungene anga ngumutwi wa mucende mwaana. Kumbasu shobilo shoonse cakalinga kucite mwakutula maansa ankalamu yakubumba kayiimfwi kulubasu lwa mwakutula maansa komwi akomwi.

¹⁹ Kwakalinga nkalamu shakubumba shili likumi ashobilo, nkokwaamba ayi kweela citantilo koonse koonse kwakalinga nkalamu yomwi yomwi. Taaku mwaami umwi wakalinga kucitewo cuuna ca bwaami ca mushobo uyo.

²⁰ Nkomeshi shoonse shakwe Solomoni shakapangwa a golodi. Mbale shoonse shakalinga kubikwa muCipinda ca Musaansa wa Lebanoni shakapangwa agolodi wiine wiine. Taaku shakapangwaawo asilifa mukwiinga ciindi ico cakwe Solomoni silifa teyakalinga kucite makwebo.

²¹ Solomoni wakalinga kucite maato eenda palweenge ayo akalinga kweendela pantu pomwi amaato akwe Ilamu. Lyoonse na peenda myaaka yotatwe akalinga kuboola kaayumwite golodi, silifa, meeca a nsofu, bankontwe abasokwe.

²² Mwaami Solomoni wakalinga kwiinditeewo bubile abusongo pamwaami uli woonse.

²³ Bamucishi coonse ca panshi bakalinga kusuni kuya mukunyumfwa busongo ubo Lesa mbwaakamupa.

²⁴ Muntu uli woonse wakalinga kwisa kuli Solomoni, wakalinga kuletelela acipo. Bamwi bakalinga kuleta shintu sha silifa asha golodi, bamwi mingaanjo, bamwi shakulwanisha, bamwi tununkila kabotu mubuyani, bamwi maaki abamwi shifubwa shili anga nimbongolo. Bakalinga kucita boobo pamwaaka amwaaka.

²⁵ Solomoni wakalinga kucite amaanda ali 4,000 a maaki alimwi ashikoci. Wakalinga kucite maaki a nkondo ali 12,000. Shimwi pasheeshi wakalinga kushisungila mundabala inene ya Jelusalemu, shimwi wakalinga kushisungila mumandabala amwi.

²⁶ Wakalinga kulela bamaami boonse mucishi coonse kuswa kuMulonga wa Yufuletisi kuya mukushika kucishi ca bene Filisiti akumanyinsa a cishi ca Ijipiti.

²⁷ Paciindi ndyaakalinga kulela, silifa teyakalinga kulangoolwa mundabala inene ya Jelusalemu. Yakalingabo pali poonse mbuli mabwe. Ashalo shisamu sha sida shakalingabo mbwee bweenka mbuli mikuyu munshaatulundu twine Juda.

²⁸ Solomoni wakalinga kuula maaki kuswa kucishi ca Ijipiti alimwi akucishi cimwi cili coonse.

Shakulela kwakwe Solomoni mubufwaafwi

²⁹ Shintu shoonse shimwi shakacita Solomoni mubwaami bwakwe kuswa kumatalikilo kushikila kumeelelesho, shililembetwe mulibuku lyakwe Natani mulaluki, mulibuku lya bulaluki bwakwe Aija wa kuShilo alimwi amulibuku lya shili anga nshiloto lyakwe Ido mulaluki. Mulibuku mulilembetwe abuumi bwakwe Jeloboamu mwanaakwe Nebati.

³⁰ Solomoni wakalela bene Isilaeli boonse muJelusalemu kwamyaaka makumi one.

³¹ Wakafwa akubikwa muNdabala yakwe Defedi, lyalo Leoboamu mwanaakwe musankwa ngowakapyana bwaami bwakwe.