2 Makani 8 - Baibo Busansulushi Bwa Libuku Ili

Shintu shimwi shakacita Solomoni

¹ Solomoni cakamutolela myaaka makumi obilo kuyaka Ŋanda yakwe Lesa alimwi aŋanda yakwe ya bwaami.

² Wakayakulula mandabala anene akamupa mwaami Ilamu. Lyalo wakatuma bene Isilaeli bamwi kuya mukwikalaamo.

³ Mpeeke Solomoni wakaya wakoma ndabala ya Amati Soba.

⁴ Wakayaka lilinga mundabala ya Tadimoli muluyanga. Wakayakulula mandabala anene oonse a cishi ca Amati umo mobakalinga kusungila shintu.

⁵ Lakwe Solomoni wakayakulula mandabala aya: Beti Oloni wa patulundu alimwi aBeti Oloni wa munkunamo. Oonse akalinga ngamandabala akayakwa amalinga akalinga kucite minjililo yakalinga kucalwa akupingwa,

⁶ kubikaawo andabala inene ya Baalati, mandabala akusungilaamo shintu alimwi amandabala umo mobakalinga kubika maaki ashikoci shakwe. Wakayaka cili coonse ncaakalinga kusuni kuyaka mundabala ya Jelusalemu, mucishi ca Lebanoni amucishi coonse ico ncaakalinga kulela.

⁷ Mpeeke bantu batakalinga bene Isilaeli, nkokwaamba ayi Bene Iti, bene Amoli, bene Pelisi, bene Ifi alimwi abene Jebusi abo bakacalaawo.

⁸ Ee, bamulunyungu lwabo bakalinga kucili mucishi cabo abo bene Isilaeli mbobatakwe kunyonyoola, Solomoni wabacata cibalu. Ncakwiila bacili bacibalu asunu.

⁹ Sombi Solomoni taakwe kucataawo cibalu bene Isilaeli. Sombi bakalinga kubabo bashilumamba, bacinenenene, bamatanjilili ba bashilumamba, bamatanjilili ba bashilumamba ba kushikoci sha maaki abaabo beshikweensha maaki akwela shikoci.

¹⁰ Kwakalinga bacinenenene bali 250 bakalinga kutanjilila bantu bacibalu mumisena mwakalinga milimo yakwe Solomoni yakuyaka.

¹¹ Lyalo Solomoni wakaleta mwanaakwe Falawo mwanakashi kumukusha kuNdabala ya mwaami Defedi kumutola kuŋanda iyo njaakamuyakila mukwiinga wakaamba ayi, “Mukaangu taaelete kwikala muŋanda yakwe Defedi mwaami wa bene Isilaeli mukwiinga musena uli woonse Libokoshi lya Cipangano molyakeenda mulisalalite.”

¹² Mpomunyaawo Solomoni wakabenga milambu yakutenta kuMwaami Lesa pacipaililo ico ncaakayaka kunembo lya Ŋanda yakwe Lesa.

¹³ Wakabenga milambu yakutenta iyo kweelana aMilawo yakwe Mose yakubenga nshiku shakookesha sha Cibelu, bushiku bwa Mweenshi Upya anshiiku shimwi shakusekelela sha pamwaaka amwaaka mbuli bushiku bwakusekelela kulya Cimaande, bushiku bwakusekelela Kutebula alimwi abushiku bwakusekelela kwa Shimpaka.

¹⁴ Mukukonkela bwakamulwiita baishi baDefedi, Solomoni wakabika bapailishi mumakoto makoto ayi banoosebensa mumalishi malishi pantu pomwi abene Lefi ayi banoocita mulimo wakulumbaisha Lesa akunoocafwa bapailishi mumilimo yabo ya lyoonse. Wakapanga amakoto a beshikulindilila mwinjililo womwi awomwi ceebo Defedi, muntu wakwe Lesa, mbwaakaamba ubo.

¹⁵ Milasho yoonse yakapa Defedi pabapailishi, pabene Lefi apamaanda akulaminaamo buboni bakeecita kweelana amboyakalinga kweelete.

¹⁶ Paciindi ici, shoonse shakalinga kweelete kucita Solomoni shakacitwa. Mulimo wakuyaka Ŋanda yakwe Lesa, kuswa kulwiimbi kushikila akwiculu, wakaswitilila. Munshila iyo Ŋanda yakwe Lesa yakamana kuyakwa.

¹⁷ Mpeeke Solomoni wakaya kuEsiyoni Geba akuElati, mandabala a muloombe lwa Lweenge Lusalala mucishi ca Edomu.

¹⁸ Mwaami Ilamu wakamutumina maato akalinga kweendeleshekwa abamatanjilili bakwe mwiine alimwi abeshikweensha maato bacibwene. Aba abeshikweensha maato bakwe Solomoni bakaya kucishi ca Ofi akuletaako makilogilamu a golodi ali 15,000 akwiindilila akuupa Solomoni.