2 Makani 7 - Baibo Busansulushi Bwa Libuku Ili

Kubengwa kwa Ŋanda yakwe Lesa

¹ Solomoni ndyaakamanabo kupaila, mulilo wakesa kuswa kwiculu akutenta milambu yoonse yakabengwa. Mpeeke bulemu bwa Mwaami Lesa bwakesula Ŋanda yakwe.

² Bapailishi bakaalilwa kwinjila muŊanda yakwe Lesa mukwiinga mwakesula bulemu bwa Mwaami Lesa.

³ Bene Isilaeli ndibakabona mulilo koosa panshi abulemu bwa Mwaami Lesa peculu lya Ŋanda yakwe Lesa, bakafukama cakushisha shiwa panshi akulambila alimwi akulumbaisha Mwaami Lesa mukwaamba ayi, “Amulumbe Mwaami Lesa mukwiinga uli kabotu, ee, mukwiinga lusuno lwakwe ndwamuyayaya.”

⁴ Lyalo mwaami Solomoni abantu bakwe boonse bakabenga milambu kuMwaami Lesa.

⁵ Mwaami Solomoni wakabenga ŋombe shili 22,000 ambelele shili 120,000 ayi njimilambu ya bwanabwankashi. Munshila iyo mwaami abantu boonse bakabenga Ŋanda yakwe Lesa.

⁶ Bapailishi boonse bakeemikana mumisena yabo njibakapekwa kabalangene abene Lefi. Bene Lefi bakalinga kulumbaisha Mwaami Lesa ashakulisha isho mwaami Defedi nshaakabamba, kabeemba lwiimbo lwakwaamba ayi, “Lusuno lwakwe ndyamuyayaya!” Bakacita boobo kweelana abwakabalwiita Defedi. Bapailishi abalo bakalinga kulisha mapeenga bene Isilaeli boonse kabeemfwi.

⁷ Lyalo Solomoni wakasalasha musena wa pakati ka lubansa lwa Ŋanda yakwe Lesa wakalinga kunembo lya njiyo. Lyalo wakabengelaako milambu yakutenta aya banyama bakabumbulu. Wakabenga ashipo sha fulaulo alimwi amafuta a banyama ayi njimilambu ya bwanabwankashi. Wakacita boobo mukwiinga cipaililo cakapangwa abulonse cakaceya kwaamba ayi babengelewo milambu yoonse iyi.

⁸ KuŊanda yakwe Lesa uko, Solomoni abantu boonse bene Isilaeli bakaba akusekelela kwa Shimpaka kwanshiku shili shosanwe ashobilo. Kwakalinga bantu baanji bakaswa kulaale mbuli kumwinjililo wa kuAmati kumatwa akumanyinsa a Ijipiti kumalenge.

⁹ Kusekelela kubengwa kwa cipaililo kwakatola nshiku shosanwe ashobilo kubikaawo akusekelela kwa Shimpaka uko kwakatola nshiku ashimwi shosanwe ashobilo. Pabushiku bwakweelaako, bakaba akusekelela kwakucala.

¹⁰ Ngayi pabushiku bwamakumi obilo ashotatwe, mumweenshi wasanu ayobilo wakapalanganya bantu ayi baye mwabo mwabo. Bakaya kabakondetwe akusangalala mumyoyo ceebo ca shintu Mwaami Lesa nshaakacitila Defedi, Solomoni alimwi abantu bakwe bene Isilaeli.

Mwaami Lesa mbwaakaboneka kuli Solomoni alimwi

¹¹ Mpeeke Mwaami Solomoni ndyaakamana kuyaka Ŋanda yakwe Lesa aŋanda yakwe ya bwaami, kumanisha shoonse nshaakalinga kuyeeya kucita,

¹² Mwaami Lesa wakaboneka kuli nguwe mashiku akumwaambila ayi, “Ndanyumfwa mupailo wako alimwi ndasumina kwaamba ayi Ŋanda iyi ibe musena mweshi munoobengela milambu kuli ndime.

¹³ Kulilabo na ndacata mfula, nabi na ndatuma cisoshi kwisa mukulya shishango, nabi na ndatuma mwaalu pabantu bangu,

¹⁴ ono na bantu bangu beetwa muliina lyangu balibombya, bapaila, banambila akusanduka kuswa kushibiibi shabo, lyalo nebo ndaakubanyumfwa kwiculu, kulekelela shibiibi shabo akulengesha cishi cabo kubila alimwi.

¹⁵ Ndaakunoolama Ŋanda yangu iyi alimwi akunoonyumfwa mipailo iyo njeshi mukanoopaila muli njiyo.

¹⁶ Ndeesala akwiisalasha ayi ube musena uyo ngweshi mukanoonambililaamo lyoonse alyoonse. Ndaakunooilama akwiitabilila ciindi coonse.

¹⁷ Na ukanoonsebensela cakushomeka alimwi cakubula kampenda mubuumi bwako mbuli iso Defedi, alimwi na ukanookonkela milawo yangu akucita shoonse nshendakwaambila,

¹⁸ ndaakucita kweelana ambondakashomesha iso Defedi ndindakamulwiita ayi bene Isilaeli bananoolelwabo abamulunyungu lwakwe lyoonse.

¹⁹ Sombi na webo nabi bamulunyungu lwako bakacileeke kunyumfwila, ee, kucileka kukonkela milawo amilasho njindakakupa nabi kutalika kulambila balesa bamwi,

²⁰ ingayi ndaakumutanda mucishi ncendakamupa. Ndaakufutatila Ŋanda iyo njendasalasha kwaamba ayi noolambililwaamo. Bantu kuli koonse balaakwiiseka akwiibona ayi taaku mboibete.

²¹ “Bulya Ŋanda yakwe Lesa ilalemekwa abuumbi, sombi bantu boonse beshi bakanokwiinda pafwaafwi anjiyo balaakunookankamana akwiipusha ayi, ‘Ceebonshi Mwaami Lesa wakacita bobulya cishi ici aŊanda yakwe iyi?’

²² Bantu balaakunookumbula ayi, ‘Mukwiinga bakafutatila Mwaami Lesa, Lesa wabo uyo wakakusha bamashali babo bakulukulu kuswa muIjipiti. Bakatalika kulemeka balesa bamwi akubalambila. Nceceeco Mwaami Lesa ncaalengeshela ayi kunyonyooka uku kucitike pali mbabo.’ ”