2 Makani 5 - Baibo Busansulushi Bwa Libuku Ili

¹ Mpeeke mwaami Solomoni ndyaakamanisha ncito yakuyaka Ŋanda yakwe Lesa yoonse, wakaleta shintu shoonse isho Defedi ishi nshaakabenga kuli Lesa. Wakashibika mucipinda cakusungilaamo shintu. Pakalinga golodi, silifa ashimwi shiinji.

Libokoshi lya Cipangano mbolyakaletwa kuŊanda yakwe Lesa

² Lyalo kuJelusalemu mwaami Solomoni wakeeta bamaloba bamatanjilili ba mikowa aba shipani sha bene Isilaeli kuleta Libokoshi lya Cipangano kuŊanda yakwe Lesa kuswa kuSiyoni, muNdabala yakwe Defedi.

³ Boonse bakabungana muciindi cakusekelela kwa Shimpaka.

⁴ Bamatanjilili boonse ndibakabungana bene Lefi bakanyamuna Libokoshi lya Cipangano

⁵ akulitola kuŊanda yakwe Lesa. Bapailishi alimwi abene Lefi abalo bakanyamuna Tente ya Cipangano ashitabatisho sha moomo shoonse akushitola muŊanda yakwe Lesa.

⁶ Mwaami Solomoni abene Isilaeli boonse bakabungana kunembo lya Libokoshi lya Cipangano akubenga mbelele aŋombe shiinji shitabelengeki.

⁷ Lyalo bapailishi bakanyamuna Libokoshi lya Cipangano akulitola muŊanda yakwe Lesa akulibika muMusena Usalalite Wiindaawo muunshi lya mapapaminwa a bakelebu.

⁸ Mapapaminwa a bakelebu abo akafwekelela Libokoshi ili alimwi ashisamu nshebakalinga kulinyamushaako.

⁹ Kweela kwa shisamu shakunyamwisha kwakalinga kukonsha kuboneka kumuntu uli woonse weenga weemikana kunembo kwiine kwa Musena Usalalite Wiindaawo kuleka lubasu lumwi luli loonse. Ishi shisamu mposhili abobulya.

¹⁰ Mukati muLibokoshi lya Cipangano mwakalingabo mabwe obilo apampamene alya Mose ngaakabikaamo kuKalundu ka Sinayi. Uko Mwaami Lesa wakapanga cipangano abene Isilaeli ndibakalinga kuswa kuIjipiti.

Shabulemu bwa mwaami Lesa muŊanda yakwe

¹¹ Mpeeke bapailishi boonse bakaswa muMusena Usalalite Wiindaawo. Bapailishi boonse bakalinga kooko bakalisalasha nabi tebakalinga mucipani cakalinga pabulishi.

¹² Beshikwiimba boonse bene Lefi mbuli Asafu, Emani a Jedutuni kubikaawo abana babo abamakwababo bakeemikana kulubasu lwakwicwe lya cipaililo bakafwala shisani shiteshimite kabalisha tusenke twakulisha, tulumbu tunene atuniini. Pakalinga abapailishi bali 120 bakalinga kulisha mapeenga.

¹³ Beshikulisha mapeenga abeshikwiimba bakalinga kwiimba cakucatana pantu pomwi anga ngumuntu womwi kabalumbaisha Mwaami Lesa. Uku mapeenga, tusenke ashimwi shakulisha kashilishikwa, bakeemba amaswi apeculu mukulumbaisha Mwaami Lesa ayi, “Amulumbaishe Mwaami Lesa mukwiinga uli kabotu, ee, mukwiinga lusuno lwakwe ndwamuyayaya.” Lyalo Ŋanda ya Mwaami Lesa yakesula likumbi lya bulemu bwakwe Lesa.

¹⁴ Mpeeke bapailishi bakaalilwa kucita mulimo wabo mukwiinga muŊanda yakwe Lesa mwakesula likumbi lya bulemu bwa Mwaami Lesa.