2 Makani 4 - Baibo Busansulushi Bwa Libuku Ili

Shintu sha muŊanda yakwe Lesa

¹ Mwaami Solomoni wakayaka cipaililo ca bulonse cakalinga mamita ali 9 mumbasu shoonse alimwi amamita 4.5 kuya mwiculu.

² Wakapanga cingomo ca bulonse ico cakalinga kulaampa mamita ali 2.2 kuswa panshi kushika peculu, mamita ali 4.4 kucilinganya pakati napakati, alimwi amamita ali 13.2 kucishinguluka.

³ Pafwaafwi apeculu lya cingomo ico, mweela cakalinga kushingulukitwe mindando yobilo ya bacende ba bulonse abo bakapangilwa pomwi acingomo. Mumusa wa mita bakalinga kubaamo likumi.

⁴ Cingomo ico cakatulwa pamisana ya bacende ba bulonse bali likumi abobilo abo bakalinga kwiimfwi cakupaana shitako. Nkokwaamba ayi bacende botatwe bakalinga kulangite kumatwa, botatwe kumbo, botatwe kumalenge abotatwe kwicwe.

⁵ Cingomo ici cakalinga kucite mutika wa mamilimita ali 75. Pamulomo pancico pakalinga anga ngumulomo wa nkomeshi wakabumbwa anga ngamatewu a liluba lya cinkwewa. Cingomo ico cakalinga kwisula malita a maanshi ali 60,000.

⁶ Wakapanga ambale shifongomene shakalinga likumi, shosanwe bakashibika kulubasu lwa kumalenge lwa Ŋanda yakwe Lesa alimwi ashimwi bakashibika kumatwa. Ishi mbale bakashibika ayi mwakusanshisha shipansha sha nyama isho shakalinga kutentwa ayi njimilambu. Maanshi ayo akalinga mucingomo akalinga a kusamba bapailishi.

⁷ Wakapanga ashakubikaawo malampi sha golodi kweelana amboshakaambwa ayi shibe akushibika muŊanda yakwe Lesa. Shosanwe bakashibika kulubasu lwakumalenge ashimwi shosanwe kumatwa.

⁸ Wakapanga matebulu ali likumi akwaabika muŊanda yakwe Lesa, osanwe kulubasu lwakumalenge, amwi osanwe kulubasu lwakumatwa. Wakapanga ambale shifongomene sha golodi shili mwaanda shakusebensesha pakusanseela.

⁹ Wakapanga lubansa lwa bapailishi alimwi alubansa lumwi lunene ashisasa sha kumilyango ya lubansa ulo akushinanika bulonse.

¹⁰ Kufwaafwi alikonko lya Ŋanda yakwe Lesa lyakumalenge lya kwicwe, wakabikako cingomo.

^11-16 Ulamu wakapanga amipika, mafosholo alimwi ambale shifongomene. Wakamanisha mulimo wakwe kuli Solomoni wa kuŊanda yakwe Lesa. Nshaakapanga nsheeshi: Macinko obilo Shitwi shobilo sha peculu lya macinko shili anga nimbale Ncetani shakooswa caandaŋombe pacitwi comwi comwi Mapomegilaneti abulonse ali 400 akalinga mumindando yobilo, womwi kaucite ali mwaanda kushingulusha ncetani pashitwi isho shakalinga peculu lya macinko Shikoci likumi Mbale shili likumi Cingomo cinene Bacende bali likumi abobilo bakubumba apo pakekala cingomo ico Mipika, mafosholo ashakusubushako nyama Shoonse ishi Ulamu nshaakapangila mwaami Solomoni sha muŊanda ya Mwaami Lesa shakapangishikwa abulonse ubekabeka.

¹⁷ Shintu shoonse ishi mwaami Solomoni wakashipangishila pamusena wakubumbilaawo wakalinga pakati ka ndabala ya Sakoti aSaletani muCinyika ca Joodani.

¹⁸ Shintu shoonse Solomoni nshaakapangisha shakafula abuumbi cakwaamba ayi bulonse tewakalinga kukonsheka kupimwa.

¹⁹ Solomoni wakapanga ashakubotesha shimwi sha golodi muŊanda yakwe Lesa. Wakapanga cipaililo atebulu apo pakalinga kubikwa shimaande shipekwa kuMwaami Lesa.

²⁰ Wakapanga shakubikaawo sha golodi wiine wiine amalampi a nshisho ayi kaanyaka kunembo lya Musena Usalalite Wiindaawo kweelana ambocakaambwa.

²¹ Wakapanga amaluba, malampi amano sha golodi wiine wiine,

²² shakushimisha malampi, mbale shifongomene, mbale shinene shakubikaamo tununkila kabotu ashikaye shakulapwitaawo mulilo. Shoonse ishi shakapangishikwa agolodi wiine wiine. Shisasa sha Ŋanda yakwe Lesa asha kucipinda ca Musena Usalalite Wiindaawo, shoonse shakananikwa golodi.