2 Makani 35 - Baibo Busansulushi Bwa Libuku Ili

Mwaami Josiya mbwaakasekelela bushiku bwa Pasika

¹ Mwaami Josiya wakasekelela bushiku bwa Pasika bwakwiibaluka kusotokela mukulemeka Mwaami Lesa mundabala ya Jelusalemu. Bana ba mbelele ba kusekelela uko bakacaikwa pabushiku bwalikumi ashone bwa mweenshi utaanshi.

² Lyalo bapailishi wakababika mumilimo yabo akubayumyayumya ayi basebensele kabotu Mwaami Lesa muŊanda yakwe.

³ Wakalwiita bene Lefi abo bakalinga kwiisha bene Isilaeli boonse abo bakasalashikwa ayi basebensele Mwaami Lesa ayi, “Mubike Libokoshi lya Cipangano muŊanda yakwe Lesa iyo mwaami Solomoni mwanaakwe Defedi njaakayaka. Tamweelete kwiilonshalonsha pashifushi shanu, sombi munanoosebensela Mwaami Lesa, Lesa wanu abantu bakwe bene Isilaeli.

⁴ Amulibambile kucita milimo yanu muŊanda yakwe Lesa mushipani shanu alimwi amumakoto anu kweelana amilasho yakalemba Defedi mwaami wa bene Isilaeli alimwi ayakalemba Solomoni mwanaakwe.

⁵ Amwiimikane mumisena yanu muŊanda yakwe Lesa cakwaamba ayi likoto lya bene Lefi inga lyacafwa bamuŋanda yomwi ayomwi ya bene Isilaeli.

⁶ Amucaye bana ba mbelele ba bushiku bwa Pasika bwakwiibaluka kusotokela. Ono mwebo amulisalashe kweelana aMilawo akubambila bene Isilaelinyinaanu bana ba mbelele ayi bacite kweelana ashakaamba Mwaami Lesa kwiinda muli Mose.”

⁷ Mwaami Josiya wakapa bantu mbelele, bana ba mbelele atwana twa mpongo ayi njimilambu ya bushiku bwa Pasika. Shifubwa isho shoonse shakalinga 30,000. Wakabapa abacende bakalinga 3,000. Ishi shoonse shakaswa pabuboni bwakwe Josiya.

⁸ Abalo bacinenenene bakwe Josiya bakapa bantu, bapailishi abene Lefi cakulyaaba. Ilikiya, Sekaliya alimwi aJeiyelo abo bakalinga beshikweendelesha milimo muŊanda yakwe Lesa, bakapa bapailishi shifubwa shili 2,600, nkokwaamba ayi bana ba mbelele alimwi atwana twa mpongo. Wakabapa abacende bali 300 ayi njimilambu yakusekelela.

⁹ Bamatanjilili ba bene Lefi, nkokwaamba ayi Konaniya, Shamaya, Netanelo mukwabo, Ashabiya, Jeiyelo alimwi aJosabadi bakapa shifubwa shili 5,000, nkokwaamba ayi bana ba mbelele atwana twa mpongo. Bakabapa abacende bali 500 ayi bene Lefi boonse babenge milambu.

¹⁰ Ndibakamana kubamba shakusekelela uko, bapailishi abene Lefi bakeemikana mumisena yabo bweenka bwakaamba mwaami.

¹¹ Ono ndibakamana kucaya bana ba mbelele atwana twa mpongo, bene Lefi bakashifunda abalo bapailishi bakasanseela bulowa pacipaililo.

¹² Lyalo bakabaanya shifubwa sha milambu yakutenta kubantu kweelana abamumaandaabo kwaamba ayi bashibeenge kweelana amilasho amilawo yakwe Mose.

¹³ Bene Lefi bakayoka milambu ya bushiku bwa Pasika bwakwiibaluka kusotokela pamulilo kweelana amilasho. Lyalo bakateleka milambu isalalite mumipika, mumpoto alimwi amushikaye akwaabila bantu cakufwambaana.

¹⁴ Ndibakamana kucita boobo, bene Lefi bakalibambila nyama akubambila bapailishi bamulunyungu lwakwe Aloni. Bakacita boobo mukwiinga bapailishi bakalinga kubenga milambu yakutenta ashipansha sha mafuta kushikila kwashiya.

¹⁵ Beshikwiimba bamulunyungu lwakwe Asafu bakalinga kwiimfwi mumisena yabo kweelana abwakaamba mwaami Defedi. Beshikwiimba abo nguAsafu, Emani alimwi aJedutuni mulaluki wa mwaami. Beshikulindilila minjililo tabakwe kuswaako kumilimo yabo mukwiinga bene Lefinyinaabo bakababambila sha bushiku bwa Pasika bwakwiibaluka kusotokela.

¹⁶ Aboobo paciindi ico mulimo woonse wa Mwaami Lesa wakacitwa, nkokwaamba ayi bakasekelela bushiku bwa Pasika bwakwiibaluka kusotokela. Bakabenga milambu yakutenta pacipaililo ca Mwaami Lesa bweenka mwaami Josiya mbwaakalasha.

¹⁷ Bene Isilaeli abo bakalingaako bakasekelela bushiku bwa Pasika paciindi ceenka ico akubamba kusekelela kwakulya Cimaande kwanshiku shosanwe ashobilo.

¹⁸ Kusekelela kwa bushiku bwa Pasika takuna kucitikaawo munshila iyo muIsilaeli kuswa kuciindi cakwe Samwelo mulaluki. Taaku mwaami nabi womwi wa bene Isilaeli wakasekelelawo kale bushiku bwa Pasika ca mushobo uyo mbuli bwakasekelela mwaami Josiya, bapailishi, bene Lefi, bene Juda, bene Isilaeli alimwi abene Jelusalemu.

¹⁹ Bushiku bwa Pasika bwakwiibaluka kusotokela ubo bwakasekelelwa mumwaaka wa likumi amyaaka yosanwe ayotatwe wa bwaami bwakwe Josiya.

Kufwa kwakwe Josiya

²⁰ Ono mwaami Josiya ndyaakamana kucita shoonse ishi muŊanda yakwe Lesa, Neko mwaami wa bene Ijipiti wakanyamuka abashilumamba bakwe kuya mukulwana kuKakemishi kuMulonga wa Yufuletisi. Josiya alakwe wakaya mukumukumanya ayi balwane.

²¹ Sombi Neko wakatumina Josiya maswi akwaamba ayi, “Omwaami wa bene Juda, webo toobeteko lubasu kunkondo iyi. Nshikwe kwisa mukulwana ndiwe, sombi abalwani bangu. Lesa wandwiita ayi mfwambaane. Aboobo Lesa uli anebo, ono utamulwaani. Na ucite boobo, utookunyonyoola.”

²² Nakubi boobo Josiya wakalinga kusuminite kulwana. Taakwe kunyumfwa shakalinga kwaamba Lesa kwiinda mumwaami Neko. Aboobo wakalilubyalubya akuya mukumulwana muCinyika ca Megido.

²³ Ndibakalinga kulwana beshimata bene Ijipiti bakayasa mwaami Josiya. Lyalo wakaambila bamatanjilili bakwe ba bashilumamba ayi, “Amunkushewo pano, ndayasikwa abuumbi!”

²⁴ Mpeeke bakamukusha mucikoci cakwe akumubika mucikoci cimwi cakalinga pafwaafwi akumutola kuJelusalemu. Wakafwita nkomunya uko akubikwa mushuumbwe sha bamaami. Bene Juda abene Jelusalemu boonse bakamulila abuumbi.

²⁵ Mpomunyaawo Jelemiya mulaluki wakapanga lwiimbo lwakulila mwaami Josiya. Bulya cakashibila beshikwiimba mucishi ca Isilaeli, basankwa abanakashi, kwiimba lwiimbo ulo ciindi coonse ndibamulila. Lwiimbo ulo lulacanika mumabuku anyimbo sha malila.

²⁶ Shintu shimwi shoonse isho shakacita Josiya kubikaawo akushomeka kwakwe kuMwaami Lesa, kukonkela Milawo yakwe Lesa kwakwe

²⁷ alimwi abuumi bwakwe boonse kuswa kumatalikilo kushikila kumeelelesho, shililembetwe mulibuku lya buumi bwa bamaami ba bene Isilaeli abene Juda.