2 Makani 34 - Baibo Busansulushi Bwa Libuku Ili

Josiya mwaami wa bene Juda

¹ Josiya wakaba mwaami wa bene Juda kaacite myaaka yosanwe ayotatwe. Wakalela muJelusalemu myaaka makumi otatwe awomwi.

² Josiya wakacita shiluleme pameenso a Mwaami Lesa mukukonkela shoonse isho shakalinga kucita Defedi mushali wakwe mukulukulu. Wakalinga kukonkela milawo yoonse yakwe Lesa cakutapusa.

Josiya mbwaakakasha kulambila balesa bamwi

³ Mumwaaka wasanu ayotatwe wa bwaami bwakwe, lakwe kacilibo mwanike, wakatalika kulambila Lesa wakwe Defedi mushali wakwe mukulukulu. Lyalo mumwaaka walikumi ayobilo wa bwaami bwakwe, wakatalika kunyonyoola misena yakulambililaako ya patulundu, shikoshanyo shakwe Ashela lesa mwanakashi ashibumbwabumbwa shimwi shoonse mucishi ca Juda amundabala ya Jelusalemu.

⁴ Bakamwayulula shipaililo shakwe Baali kweelana ambwaakabaambila Josiya. Bakapwayoola ashipaililo sha tununkila kabotu shakalinga pafwaafwi anshisho, shikoshanyo shakwe Ashela alimwi ashibumbwabumbwa shimwi shoonse. Lyalo bakasanseela busu bwa nshisho pashuumbwe sha baabo bakalinga kubenga milambu kuli nshisho.

⁵ Josiya wakatenta mafuwa a bapailishi bakunsengwe pashipaililo shabo. Munshila iyi wakasalasha cishi ca Juda andabala ya Jelusalemu kweelana aMilawo.

⁶ Wakacita shintu sha mushobo uyu mumandabala oonse a mucishi cakwe Manase, Efuleemu aSimyoni kuya mukushika akuNafutali kubikaawo amatongo akalinga kwaashingulukite.

⁷ Nkokwaamba ayi mubwaami bwakumatwa wakamwayulula shipaililo, shikoshanyo shakwe Ashela lesa mwanakashi, kupwayoola shibumbwabumbwa shimwi ayi shibe busu akupwayoola shipaililo sha tununkila kabotu. Lyalo wakaboolela kuJelusalemu.

Libuku lya Milawo mbolyakacanwa

⁸ Mumwaaka walikumi amyaaka yosanwe ayotatwe wa bwaami bwakwe, ndyaakamana kusalasha cishi aŊanda yakwe Lesa, Josiya wakatuma Shafani mwanaakwe Asaliya musankwa, Maaseiya mweendeleshi wa ndabala ya Jelusalemu alimwi aJowa mwanaakwe Joayasi wacinenenene kuya kuŊanda yakwe Lesa, Lesa wakwe mukwiibambabamba.

⁹ Maali ayo beshikulindilila bene Lefi ngobakabwesa muŊanda yakwe Lesa bakaatola kuli Ilikiya mupailishi munene. Maali ayo akabwesekwa kubene Efuleemu, bene Manase alimwi abantu bamwi boonse bakacaalaawo mucishi ca Isilaeli, pantu pomwi abene Juda, bene Benjameni alimwi abene Jelusalemu.

¹⁰ Maali ayo akapekwa kubasankwa botatwe abo bakalinga kweendelesha mulimo wakubamba Ŋanda yakwe Lesa. Abalo bakafolesha

¹¹ beshikupala mapulanga alimwi abeshikuyaka kwaamba ayi banokuulamo mabwe akubesa alimwi amapulanga ayi babambisha maanda ayo bamaami bene Juda ngobakalekelela ayi awe.

¹² Basankwa abo bakalinga kucita mulimo uyo bakalinga kushomekete abuumbi. Bakalinga kweendeleshekwa abene Lefi bone, nkokwaamba ayi Jaati aObadiya bamucipani cakwe Melali alimwi aSekaliya aMeshulamu bamucipani cakwe Koati. Bene Lefi boonse abo bakalinga beshikulisha bacibwene

¹³ mbobakalinga kuyumuna shintu shakuyakisha akunokweendelesha basebenshi bakalinga kucita milimo ipusenepusene. Bene Lefi bamwi bakalinga balembi, bamwi bakalinga beshikulindilila.

¹⁴ Ono ndibakalinga kukusha maali ayo kuswa muŊanda yakwe Lesa, Ilikiya wakacana libuku lya Milawo lya Mwaami Lesa, nkokwaamba ayi Milawo iyo Lesa njaakapa Mose.

¹⁵ Lyalo wakaambila Shafani mulembi ayi, “Libuku lya Milawo ndalicana muno muŊanda yakwe Lesa.” Mpeeke wakalipa Shafani.

¹⁶ Lyalo Shafani wakalitola kumwaami akuluula ayi, “Twaciita shintu shoonse nshemwakatwaambila.

¹⁷ Twabwesa maali ayo akalinga kubikitwe muŊanda yakwe Lesa akupa basebenshi abeshikubeendelesha.”

¹⁸ Lyalo Shafani mulembi wakalwiita mwaami ayi, “Ndicite alibuku ilyo Ilikiya ndyaampa.” Lyalo wakalibelengela mwaami.

¹⁹ Mpomunyaawo mwaami ndyaakanyumfwa maswi a muLibuku lya Milawo ilyo, wakakwamoona shakufwala shakwe mubuumba.

²⁰ Lyalo wakaambila Ilikiya mupailishi, Ayikamu mwanaakwe wakwe Shafani musankwa, Akibo mwanaakwe Mikaya, Shafani mulembi alimwi akuli Asaya shikucafwa mwaami ayi,

²¹ “Kamuya mukeepushileko ndime abene Juda boonse kuMwaami Lesa pasheesho shilembetwe mulibuku lya Milawo ili lyacanikwa. Mwaami Lesa ulikalalite abuumbi pali ndiswe mukwiinga bamashali besu bakulukulu tabakwe kukonkela maswi a Mwaami Lesa mukutacita kweelana asheesho shoonse shilembetwe mulibuku ili.”

²² Lyalo Ilikiya abaabo mbwaakatumwaabo, bakaya mukwiipusha kuli Ulida, mulaluki mwanakashi wakalinga kwikala mucipansha cipya ca Jelusalemu. Shalumu mwanaakwe Tikifwa mwishikulu wakwe Ayasi wakalinga ngoibaye. Shalumu wakalinga kulama shisani sha muŊanda yakwe Lesa. Mpeeke bakamulwiita isho shakacitika.

²³ Lyalo wakabaambila ayi baboolele kumwaami akumulwiita ayi,

²⁴ “Mwaami Lesa waamba ayi, ‘Ntoopa Jelusalemu mulandu pantu pomwi abantu boonse bekalaamo bweenka mbocilembetwe mulibuku ilyo mwaami ndyaabelengelwa.

²⁵ Bakankaka alimwi bakalinga kubenga milambu kubalesa bamwi, ono bulya basonkomona bukali bwangu ceebo ca shintu nshebakacita. Bukali bwangu pandabala ya Jelusalemu mbunene abuumbi alimwi teshi bukamaane.

²⁶ Sombi mulwiite mwaami wa bene Juda uyo wamutuma ayi mwiipushe kuli ndime neMwaami Lesa, ayi nebo neMwaami Lesa, Lesa wa bene Isilaeli, ndaamba ayi webo wakutika shakalembwa mulibuku.

²⁷ Wasanduka kuswa kushibiibi shako akulibombya pameenso angu kwiinda mukukwamoona shakufwala shako akulila ndiwakanyumfwa mbondakalinga kupinga kupa mulandu kundabala ya Jelusalemu abantu bekalaamo. Ono ndanyuumfwa kusenga kwako.

²⁸ Aboobo mwebo mulaakufwabo muluumuno kaantana kupa mulandu ndabala ya Jelusalemu.’ ” Lyalo basankwa abo bakaboolela kumwaami Josiya amakani ayo.

Josiya mbwaakapanga cipangano aMwaami Lesa

²⁹ Mwaami Josiya wakeeta bamaloba boonse bene Juda alimwi abene Jelusalemu.

³⁰ Lyalo bakaya boonse muŊanda yakwe Lesa, kubikaawo bapailishi, bene Lefi alimwi abantu boonse babile abakandu. Mpeeke kunembo lya bantu boonse abo, mwaami wakabelenga libuku lyoonse lya cipangano ilyo ndibakacana muŊanda yakwe Lesa.

³¹ Mpomunyaawo mwaami wakeemikana pafwaafwi alicinko lya bwaami akupanga cipangano aMwaami Lesa. Wakashomesha kumunyumfwila akukonkela milawo amilasho yakwe camoyo wakwe woonse abuumi bwakwe boonse. Wakashomesha akucita kweelana amaswi a mucipangano alembetwe mulibuku ilyo.

³² Mpomunyaawo wakalengesha bene Jelusalemu alimwi abene Benjameni kushomesha kukonkela cipangano ico. Bene Jelusalemu bakasumina kukonkela cipangano cakwe Lesa, Lesa wa bamashali babo bakulukulu.

³³ Kuswawaawo Mwaami Josiya wakanyonyoola shibumbwabumbwa shilensha bunya shoonse isho shakalinga mucishi coonse ca bene Isilaeli. Wakalengesha bantu boonse ba mucishi ca Isilaeli kusebensela Mwaami Lesa, Lesa wabo. Mubuumi bwakwe boonse tabakwe kwaalilwaawo kukonkela Mwaami Lesa, Lesa wa bamashali babo bakulukulu.