2 Makani 32 - Baibo Busansulushi Bwa Libuku Ili

Bene Asilya mbobakatuma beshinkombe kundabala ya Jelusalemu

¹ Pesule lya shintu isho Esekiya nshaakacita cakushomeka, Senakelibu mwaami wa bene Asilya wakaya mukulwana cishi ca Juda. Wakashinguluka mandabala anene akalinga kucite malinga kaasuni kwaamba ayi amana kwaakoma, abe aakwe.

² Ono mwaami Esekiya ndyaakabona ayi Senakelibu wesa mukulwana ndabala ya Jelusalemu,

³ wakabandika abacinenenene bakwe alimwi abamatanjilili ba bashilumamba shakushinkila tuntupu twa maanshi kunsengwe lya ndabala. Abalo bakasumina ncaakaamba.

⁴ Mpeeke bakabunganya likoto linene lya bashilumamba abo bakashinka tuntupu toonse alimwi akalonga ako kakalinga kwiinda mucishi ico. Bakalyaamboosha ayi, “Bamaami bene Asilya tabeelete kucana maanshi aanji.”

⁵ Lyalo wakasebensa cankusu kubamba lubumbu akuyaka maanda alaamfu kuli ndulo. Wakayakilaako lubumbu alumwi kunsengwe lya loolo. Wakashimpya musena uyo ngobakeelanya abulongo mbobakaleta kwicwe lya Ndabala yakwe Defedi. Wakapanga masumo aanji amayawo.

⁶ Kuswawaawo wakasala bamatanjilili ba bashilumamba ayi banokweendelesha bantu. Lyalo wakabunganya bantu boonse kunembo lyakwe pamusena ucanika bantu baanji uyo wa kumwinjililo wa ndabala iyo akubayumyayumya ayi,

⁷ “Mulyeelete kuyuma akulishoma. Mutakaloondi nabi kutyongola ceebo ca mwaami wa bene Asilya abashilumamba bakwe baanji abo mbwaali abo. Swebo tulicite bashilumamba bakali kwiinda baabo mbwaali abo.

⁸ Lakwe ulicitebo nkusu shabuntu, sombi swebo tulicite Mwaami Lesa, Lesa wesu uyo utucafwa munkondo shesu shoonse!” Lyalo bene Juda boonse bakayuminishikwa kumakani akaamba Esekiya mwaami wabo.

⁹ Ndipakeenda ciindi, Senakelibu mwaami wa bene Asilya abashilumamba bakwe boonse ndibakalinga kushingulukite ndabala ya Lakishi, wakatuma bamatanjilili bakwe ba bashilumamba kuJelusalemu kuli Esekiya mwaami wa bene Juda akubene Juda boonse ankoombe yakwaamba ayi,

¹⁰ “Senakelibu mwaami wa bene Asilya waamba ayi, ‘Ino nciinshi citoomupamya kwaamba ayi kamushiitebo muJelusalemu nabi bashilumamba bamushinguluka ayi bamulwaane?

¹¹ Ee, Esekiya wamulwiita ayi Mwaami Lesa, Lesa wanu utoomufuna kuswa mumaansa a mwaami wa bene Asilya, sombi utoomubecabo. Ulaakumulengeshabo kufwa kunsala akunyotwa.

¹² Sa teshi Esekiya mwiine wakanyonyoola misena yakulambililaako ya patulundu ashipaililo shakwe lesa uyo akwaambila bene Juda abene Jelusalemu ayi banoolambililabo kucipaililo comwi akutenta milambu kweenka uko?

¹³ “ ‘Sa tamucishi ncendakacita, nebo abamashali bangu bakulukulu kubantu boonse ba mushishi shimwi? Sa balesa babo bakakonshawo kufuna bantu babo kuswa mumaansaangu nebo nemwaami wa bene Asilya?

¹⁴ Ndilili balesa ba mushishi isho bamashali bangu nshebakanyonyoola ndibakakonshawo kupulusha bantu babo kuswa kuli ndime? Ino lakwe lesa wanu inga wamupulusha buyani kuswa mumaansaangu?

¹⁵ Ono mutaleeki Esekiya kwaamba ayi amubeece akumucenjeeka munshila iyi. Mutasumini nshaatokwaamba mukwiinga taaku lesa wa cishi cili coonse nabi bulelo buli buyani wakakonsha kupulusha bantu bakwe kuswa mumaansaangu nabi mumaansa a bamashali bangu bakulukulu. Anu ncakwiila lesa wanu uyo taakoonshi kumupulusha!’ ”

¹⁶ Lyalo bamatanjilili ba bashilumamba bakwe Senakelibu bakatolelela akwaamba shintu shibiibi kuMwaami Lesa, akuli Esekiya musebenshi wakwe.

¹⁷ Mwaami Senakelibu wakalemba ankalata yakucobola Mwaami Lesa, Lesa wa bene Isilaeli. Nkalata iyo yakalinga kwaamba ayi, “Bweenka balesa ba shishi shimwi mbobatakwe kufunawo kale bantu babo kuswa mumaansaangu, mbweeke ubo lesa wakwe Esekiya teshi akafuneewo bantu bakwe kuswa mumaansaangu.”

¹⁸ Lyalo bamatanjilili bakwe Senakelibu bakoolobesha shintu isho muciEbulu kwaamba ayi baloondeshe akutyongwesha bene Jelusalemu abo bakalinga kushiite muya lubumbu lwa ndabala inene yeenka iyo. Bakacita boobo kwaamba ayi balwane ndabala iyo akwiikoma.

¹⁹ Bene Asilya bakalinga kwaamba pali Lesa wa bene Jelusalemu bweenka mbobakalinga kwaamba pabalesa ba shishi shimwi abo bakalinga kubumbwa amaansa a bantu.

²⁰ Mpomunyaawo mwaami Esekiya amulaluki Isaya mwanaakwe Amosi bakapaila kuli Lesa akumulilila ayi abacaafwe.

²¹ Lyalo Lesa wakatuma munjelo uyo wakesa mukucaya bashilumamba bene Asilya abamatanjilili babo. Kuswawaawo mwaami wa bene Asilya wakaboolela kumishaabo kaafwite nsoni abuumbi. Ono bumwi bushiku ndyaakalinga kulambila muŋanda ya lesa wakwe, bana bakwe basankwa bamwi bakamucaya amipeeni.

²² Munshila iyi Mwaami Lesa wakafuna Esekiya abene Jelusalemu boonse kuswa mumaansaakwe Senakelibu mwaami wa bene Asilya alimwi amumaansa a balwani babo bamwi. Wakabalengesha ayi bekale muluumuno abamushishi shimwi shoonse.

²³ Bantu baanji bakalinga kuleta shipo sha Mwaami Lesa kuJelusalemu ashintu shimwi shamakwebo kuli Esekiya mwaami wa bene Juda. Kuswa ciindi ico lakwe wakalinga kulemekwa abuumbi abantu ba mumishobo yoonse.

Kuciswa kwakwe Esekiya akulisumpula

²⁴ Muciindi ico ceenka mwaami Esekiya wakaciswa cakufwabo. Wakapaila kuMwaami Lesa uyo wakamukumbula mukumupa citondesho cakwaamba ayi utooba kabotu.

²⁵ Sombi Esekiya wakalinga shicimpamya alimwi shikulisumpula. Paceebo ceeco taakwe kulumba Mwaami Lesa pasheesho nshaakamucitila. Lyalo bukali bwa Mwaami Lesa bwakaseluka pali nguwe, bene Juda alimwi abene Jelusalemu.

²⁶ Kuswawaawo Esekiya abantu ba muJelusalemu bakaliceesha. Lyalo bukali bwa Mwaami Lesa tabukwe kuseluka pali mbabo kushikila mwaami Esekiya ndyaakafwa.

Buboni abulemu bwakwe Esekiya

²⁷ Mwaami Esekiya wakabila cakwaamba ayi bantu boonse bakalinga kumulemeka. Wakayakisha maanda akusungilaamo buboni bwakwe, nkokwaamba ayi golodi, silifa, mabwe amakwebo, tununkila kabotu twa mubuyani, mayawo ashintu shimwi shamakwebo.

²⁸ Wakayaka amaanda akusungilaamo shili anga ngamaila, waini alimwi amafuta a olifi, shimpati sha ŋombe asha mbelele shakwe.

²⁹ Lesa wakamupa mbelele shiinji, ŋombe abuboni bumwi buunji cakwaamba ayi wakayaka mandabala amwi anene aanji.

³⁰ Mwaami Esekiya ngowakashinkila Kantupu ka Giyoni akulengesha maanshi kukunkila kumbo lya Ndabala ya Defedi. Wakaswitilila mushintu shoonse nshaakacita.

³¹ Beshikwiimikanina bamaami ba bene Babiloni ndibakesa mukwiipusha shacitondesho ca nkusu sha kwiculu ico cakacitika mucishi, Lesa wakamulekabo ayi acite mbwaasuni kwaamba ayi abone na inga watolelela kushomeka.

Bwaami bwakwe Esekiya mbobwakamana

³² Shintu shimwi shoonse mwaami Esekiya nshaakacita, kubikaawo kushomeka kwakwe kuMwaami Lesa, shililembetwe mulibuku lya shili anga nshiloto lyakwe Isaya mulaluki mwanaakwe Amosi alimwi amulibuku lya buumi bwa bamaami ba bene Juda abene Isilaeli.

³³ Esekiya wakafwa akubikwa mumusena wa peculu wa shuumbwe sha bamaami. Bene Juda boonse abene Jelusalemu bakamulemeka abuumbi ndyaakafwa. Lyalo Manase mwanaakwe ngowakapyana bwaami bwakwe.