2 Makani 31 - Baibo Busansulushi Bwa Libuku Ili

Esekiya mbwaakasandula shintu

¹ Kusekelela ndikwakamana, bene Isilaeli boonse bakalingaako bakaya kumandabala oonse ene Juda mukumwayulula macinko asalalite akutimboola shikoshanyo shakwe Ashela lesa mwanakashi. Bakanyonyoola misena yoonse yakulambililaako ya patulundu ashipaililo sha mucishi ca Juda coonse, ca Benjameni, ca Efuleemu alimwi aca Manase. Lyalo boonse bakaboolela mwabo mwabo.

² Mwaami Esekiya wakabusha makoto a bapailishi amakoto a bene Lefi kweelana amilimo yabo. Milimo yabo imwi yakalinga nkubenga milambu yakutenta amilambu ya bwanabwankashi, kusebensela muŊanda yakwe Lesa pakulambila, kulumba akwiimba nyimbo shakulumbaisha Lesa kuminjililo ya Ŋanda yakwe Lesa.

³ Mwaami Esekiya wakapa shifubwa kuswa mumatanga akwe ayi shibe milambu yakutenta ya macuunsa amacolesha, panshiku shakookesha sha Cibelu, pakusekelela kwa Myeenshi Ipya alimwi apanshiku shimwi shakusekelela isho shakalembwa muMilawo ya Mwaami Lesa.

⁴ Kuswawaawo Esekiya wakaambila bene Jelusalemu ayi kabaletela bapailishi abene Lefi shipo isho nshebakalinga kweelete kupekwa kwaamba ayi beelibalebo kucita shiyanda Milawo ya Mwaami Lesa.

⁵ Ingayi bene Isilaeli banyumfwebo shakaamba mwaami, bakaleta nsomo sha shili anga ngamaila, waini, mafuta a olifi, buuci alimwi ashintu shimwi shiswa mumyuunda. Bakaleta ashalikumi sha buboni bwabo boonse.

⁶ Bene Isilaeli boonse abene Juda abo bakalinga kwikala mumandabala a muJuda bakaleta shalikumi sha ŋombe shabo ambelele kubikaawo ashalikumi sha shintu shisalalite isho nshebakabenga kuMwaami Lesa, Lesa wabo. Mpeeke bakashibunjika mumilwi.

⁷ Bakatalika kucita boobo mumweenshi watatu kushikila mumweenshi wasanu ayobilo.

⁸ Lyalo Esekiya abacinenenene bakwe ndibakabona milwi iyo bakalumbaisha Mwaami Lesa abantu bakwe bene Isilaeli.

⁹ Kuswawaawo mwaami Esekiya wakabandika abapailishi alimwi abene Lefi pamilwi ya shintu iyo.

¹⁰ Alakwe Asaliya mupailishi munene, wamulunyungu lwakwe Sadoki wakamwaambila ayi, “Bantu ndibakatalika kuleta shipo shabo kuŊanda yakwe Lesa, twaba ashakulya shiinji, nkokwaamba ayi shimwi shitoocaalakobo. Twaba ashintu ishi mukwiinga Mwaami Lesa wapa coolwe bantu bakwe.”

¹¹ Mpomunyaawo mwaami Esekiya wakalwiita bantu kwaamba ayi bayake maanda akusungilaamo shintu mulubansa lwa Ŋanda yakwe Lesa.

¹² Bakalinga kuleta shipo shabo, shalikumi ashipo shakabengwa kuMwaami Lesa. Konaniya mwine Lefi ngowakalinga kweendelesha mulimo wakulama shintu isho, mukwabo Shimeyi ngowakalinga wabili kuli nguwe pancito iyo.

¹³ Mpeeke kwakasalwa bene Lefi likumi ayi babe bamanene mumulimo uyo, sombi kabatanjililwa aKonaniya alimwi aShimeyi. Meena abo ngaaya: Jeiyelo, Asasiya, Naati, Asaelo, Jelimoti, Josabadi, Eliyelo, Isimakiya, Maati alimwi aBenaya. Ishi shoonse shakacitika kwiinda mukupekwa nkusu kuswa kuli Esekiya aAsaliya mupailishi munene.

¹⁴ Kole mwanaakwe Imuna mwine Lefi, shikulindilila Mwinjililo wa Kwicwe ngowakalinga kutambula shipo shakulyaaba isho shakalinga kupekwa kuli Lesa akubaanya shipo shoonse shakabengwa kuMwaami Lesa.

¹⁵ Bakalinga kumucafwa mumandabala umo mwakalinga kwikala bapailishi bamwi nguEdeni, Miniyamini, Jeshuwa, Shemaya, Amaliya alimwi aShekaniya. Bakalinga kumucafwa cakushomeka kubaanya shakulya kubene Lefinyinaabo kweelana amakoto abo, cakutapusanya bamanene abanike.

¹⁶ Kwiilika waawo, bakalinga kubaanya shakulya kubasankwa bacite myaaka makumi otatwe akuya peculu abo bakalinga kweelete kwinjila muŊanda yakwe Lesa mukucita mulimo wabo wa bushiku abushiku kweelana amakoto abo.

¹⁷ Bapailishi bakapekwa milimo kweelana ashipani shabo, sombi bene Lefi bakalinga kucite myaaka makumi obilo akuya peculu bakalinga kulembwa kweelana amilimo yabo mumakoto abo.

¹⁸ Boonse bakalinga kulembwa abamakwababo, bana babo alimwi ambobakalinga kwikalaabo. Ici cakacitwa kwaamba ayi ciindi coonse kabalibambite kucita mulimo wabo usalalite.

¹⁹ Ono pabapailishi bamulunyungu lwakwe Aloni abo bakalinga kwikala mumishi yakalinga kushingulukite mandabala abo, bakasala basankwa bashomeka. Bantu abo bakalinga kwaabanya shakulya kubasankwa boonse ba mumikowa ya bapailishi akubaabo boonse bakalinga kulembetwe mumabuku a shipani sha bene Lefi.

²⁰ Mwaami Esekiya wakacita shiluleme alimwi shisangalasha Mwaami Lesa, Lesa wakwe mucishi coonse ca Juda.

²¹ Wakaswitilila mukwiinga shoonse nshaakacita paŊanda yakwe Lesa nabi pashakukonkela Milawo, wakashicita cakushomeka kuli Lesa alimwi camoyo woonse.