2 Makani 30 - Baibo Busansulushi Bwa Libuku Ili

Esekiya mbwaakasekelela Pasika

¹ Esekiya wakatuma nkombe kubene Isilaeli abene Juda alimwi wakalemba makalata kubene Efuleemu akubene Manase. Wakabeeta ayi bese kuŊanda yakwe Lesa muJelusalemu mukusekelela bushiku bwa Pasika bwakwiibaluka kusotokela mukulemeka Mwaami Lesa, Lesa wa bene Isilaeli.

² Mwaami, bamatanjilili bakwe abantu boonse muJelusalemu bakayeeya kusekelela bushiku bwa Pasika bwakwiibaluka kusotokela mumweenshi wabili.

³ Tabakwe kusekelela paciindi ceelete mukwiinga bapailishi bakalisalasha kweelana aMilawo bakalinga baniini alimwi bantu tabakwe kubungana muJelusalemu.

⁴ Muyeeyo uyo wakasangalasha mwaami abantu boonse.

⁵ Aboobo bakeeta bene Isilaeli boonse kuswa kuDani tibili akuBiyasheba ayi babungane muJelusalemu mukusekelela bushiku bwa Pasika bwakwiibaluka kusotokela. Kwakaba bantu baanji baanji kukusekelela uko kwiinda bakasekelelawo kale kataanshi kweelana amyeelo yakalembwa.

⁶ Beshinkombe bakanyamuka kweelana ambobakatumwa amwaami alimwi abacinenenene bakwe kuya mucishi coonse ca bene Isilaeli aca bene Juda ankoombe yakwaamba ayi, “Nobene Isilaeli, mwebo nomwakapuluka kuswa mumaansa a bene Silya, amuboole kuMwaami Lesa, Lesa wakwe Abulaamu, Isaki alimwi wakwe Jakobo, alakwe utoobola kuli ndimwe.

⁷ Mutabi anga mbamashali banu bakulukulu abene Isilaelinyinaanu abo batakwe kushomeka kuMwaami Lesa, Lesa wabo. Bukali bwakwe bwakabaselukila kweelana ambomwishi kale noonse.

⁸ Mutabi beshicimpamya mbuli bwakalinga bamashali banu bakulukulu, sombi amunyumfwile Mwaami Lesa. Kamwisa kuŊanda yakwe Lesa muJelusalemu iyo njaakasalasha kwalyoonse alyoonse. Kamusebensela Mwaami Lesa, Lesa wanu kwaamba ayi bukali bwakwe bumane pali ndimwe.

⁹ Na muboole kuMwaami Lesa, abo bakatola bamakwabanu busha balaakubanyumfwila nkumbu akubaleka ayi baboolele kumishaabo. Mwaami Lesa ngushinkumbu alimwi ulicite luse. Na muboole kuli nguwe, ncakwiila utoomutambula.”

¹⁰ Beshinkombe bakaya mumandabala oonse mucishi ca bene Efuleemu aca bene Manase akuya mukushika akucishi ca bene Sebuluni kumatwa. Sombi bantu bakalinga kubaseka akubaweluluka.

¹¹ Nakubi boobo bamwi kuswa mumukowa wa bene Asha, bene Manase alimwi awa bene Sebuluni bakalibombya akusumina kuya kuJelusalemu.

¹² Amwalo muJuda Lesa wakalinga kucite mulimo wakubacatanya pantu pomwi kwaamba ayi bacite kweelana amaswi a Mwaami Lesa mukukonkela shakaamba mwaami Esekiya abacinenenene bakwe.

Mbobakasekelela bushiku bwa Pasika

¹³ Mpeeke mumweenshi wabili bantu baanji baanji bakabungana muJelusalemu mukusekelela bushiku bwakulya Cimaande.

¹⁴ Lyalo bakakusha shipaililo shoonse nshebakalinga kusebensesha muJelusalemu pakubenga milambu akutenta tununkila kabotu. Kuswawaawo bakaya mukushisowa muCinyika ca Kidiloni.

¹⁵ Pabushiku bwa likumi ashone mumweenshi wabili, bakacaya bana ba mbelele ba bushiku bwa Pasika bwakwiibaluka kusotokela. Bapailishi abene Lefi abo batakalinga kusalalite kweelana aMilawo, bakafwa nsoni akulisalasha. Lyalo bakaleta milambu yakutenta kuŊanda yakwe Lesa.

¹⁶ Kuswawaawo bakeemikana mumisena yabo kweelana abwakalembwa muMilawo yakwe Mose, muntu wakwe Lesa. Bapailishi bakasanseela bulowa pacipaililo ubo bwakabapa bene Lefi.

¹⁷ Ono ceebo cakwaamba ayi bantu baanji tabakwe kulisalasha kweelana aMilawo, bene Lefi mbobakabacaila bana ba mbelele ba bushiku bwa Pasika akubenga bana ba mbelele abo kuMwaami Lesa.

¹⁸ Nakubi kwaamba ayi bantu baanji bakaswa kumukowa wakwe Efuleemu, Manase, Isaka alimwi awakwe Sebuluni tabakwe kulisalasha, bakalyaako bana ba mbelele ba bushiku bwa Pasika. Sombi tabwishi mbocakalinga kulembetwe ubo. Paceebo ceeco Esekiya wakabapaililaako ayi, “NoBaami baLesa, kwiinda mububotu bwanu, amulekelele boonse

¹⁹ abo babika myoyo yabo kukuyanda ndimwe noBaami baLesa, Lesa wa bamashali babo bakulukulu. Mubalekelele nabi tabana kulisalasha kweelana aMilawo.”

²⁰ Lyalo Mwaami Lesa wakanyumfwa mupailo wakwe Esekiya, lyalo taakwe kubacisa.

²¹ Kuswawaawo bantu bakalinga kubungene muJelusalemu, bakasekelela bushiku bwakulya Cimaande kwanshiku shili shosanwe ashobilo cakusangalala. Bene Lefi abapailishi bakalinga kwiimbila Mwaami Lesa bushiku abushiku akulisha nshebakalinga kulisha pakulumbaisha Mwaami Lesa.

²² Esekiya wakaamba maswi akuyumyayumya bene Lefi boonse abo bakaboneka ayi balicite lushibo lwiindaawo lwa mulimo wabo kuMwaami Lesa. Kwanshiku shosanwe ashobilo bakalinga kulya shipansha shabo akubenga milambu ya bwanabwankashi alimwi akulumbaisha Mwaami Lesa, Lesa wa bamashali babo bakulukulu.

²³ Lyalo likoto lyoonse lyakasumina kwaamba ayi banungeeko nshiku ashimwi shosanwe ashobilo. Mpeeke bakasekelela cakusangalala abuumbi kwanshiku isho.

²⁴ Mpomunyaawo Esekiya mwaami wa bene Juda wakapa bacende bali 1,000 alimwi ambelele ampongo shili 7,000 ayi bantu balye. Abalo bacinenenene bakapa bacende bali 1,000 alimwi ambelele ampongo shili 10,000. Muciindi ico bapailishi baanji bakalisalasha kweelana aMilawo.

²⁵ Likoto lyoonse lya bene Juda lyakakondwa akusangalala kubikaawo abapailishi, bene Lefi, bantu boonse bakaswa kuIsilaeli, alimwi abaswamashi bakalinga kwikala mucishi ca Isilaeli amucishi ca Juda.

²⁶ Mundabala ya Jelusalemu, mwakaba kusangalala kunene mukwiinga kuswabo kuciindi cakwe Solomoni mwanaakwe Defedi mwaami wa bene Isilaeli, takuna kucitikaawo kale cintu ca mushobo uyu.

²⁷ Lyalo bapailishi pantu pomwi abene Lefi bakeemikana ayi basengele coolwe bantu boonse. Lesa wakanyumfwa kusenga kwabo kwiculu uko nkwaakala akukukumbula.