2 Makani 29 - Baibo Busansulushi Bwa Libuku Ili

Esekiya mwaami wa bene Juda

¹ Esekiya wakaba mwaami wa bene Juda kaacite myaaka makumi obilo amyaaka yosanwe. Wakalela muJelusalemu myaaka makumi obilo amyaaka yosanwe ayone. Esekiya wakalinga mwanaakwe Abija mwanaakwe Sekaliya mwanakashi.

² Wakacita shiluleme pameenso a Mwaami Lesa bweenka bwakacita Defedi mushali wakwe mukulukulu.

Ŋanda yakwe Lesa mboyakasalashikwa

³ Mumweenshi utaanshi wa mwaaka utaanshi wa bwaami bwakwe, Esekiya wakacalula shisasa sha kuŊanda yakwe Lesa akushibamba.

⁴ Wakabunganya likoto lya bapailishi abene Lefi mulubansa lwakwicwe lwa Ŋanda yakwe Lesa

⁵ akubalwiita uko ayi, “Mwebo nobene Lefi mulyeelete kulisalasha alimwi akusalasha Ŋanda yakwe Lesa, Lesa wa bamashali banu bakulukulu. Mukushe shoonse isho shitasalalite muŊanda yakwe Lesa.

⁶ Bamashali besu bakulukulu tebakalinga kushomeka kuMwaami Lesa, Lesa wesu alimwi bakacita shitaluleme pameenso akwe. Bakamukaka akufutatila musena wa bulemu bwakwe.

⁷ Bakacala shisasa sha kuŊanda yakwe Lesa, bashimya malampi akucileka kutenta tununkila kabotu nabi kubenga milambu yakutenta muŊanda yakwe Lesa, Lesa wa bene Isilaeli.

⁸ Mpeeke bukali bwa Mwaami Lesa bwakaselukila bene Juda abene Jelusalemu. Isho nshaakacita pali mbabo shakakankamika akuyoosha bantu boonse. Cikani ici mwebo mulicishi kabotu.

⁹ Paceebo ceeco bamashali besu bakulukulu bakacaikwa munkondo, abalo bamakeesu abana besu bakatolwa busha.

¹⁰ “Ono bulya ndayeeya kupanga cipangano aMwaami Lesa, Lesa wa bene Isilaeli kwaamba ayi bukali bwakwe buyoosha bumane pali ndiswe.

¹¹ Nobana bangu mutasoowi ciindi. Mwaami Lesa wakasala ndimwe ayi munoomutentela tununkila kabotu akunootanjilila bantu mukulambila nguwe.”

¹² Lyalo bene Lefi bakatalika mulimo wabo. Kuswa kubene Koati nguMaati mwanaakwe Amasayi aJowelo mwanaakwe Asaliya. Kuswa kubene Melali nguKishi mwanaakwe Abudi aAsaliya mwanaakwe Jealelelo. Kuswa kubene Geshoni nguJowa mwanaakwe Sima aEdeni mwanaakwe Jowa.

¹³ Kuswa kubamulunyungu lwakwe Elisafani nguShimili aJeiyelo. Kuswa kubamulunyungu lwakwe Asafu nguSekaliya aMataniya.

¹⁴ Kuswa kubamulunyungu lwakwe Emani nguJeiyelo aShimeyi. Kuswa kubamulunyungu lwakwe Jedutuni nguShemaya aUsiyelo.

¹⁵ Lyalo bantu aba bakabunganya bene Lefinyinaabo akulisalasha boonse kweelana aMilawo. Kuswawaawo bweenka mbuli mbwaakabaambila mwaami, bakatalika kusalasha Ŋanda yakwe Lesa kweelana aMilawo ya Mwaami Lesa.

¹⁶ Mpeeke bapailishi bakenjila muŊanda yakwe Lesa kuya mukwiisalasha. Bakakusha shintu shoonse shatakalinga kusalalite kweelana aMilawo akushibika palubansa lwa Ŋanda yakwe Lesa. Lyalo bene Lefi bakashibwesa akushitola kunsengwe lya ndabala inene kuya mukushishiya kuCinyika ca Kidiloni.

¹⁷ Mulimo uyo bakautalika pabushiku butaanshi bwa mweenshi utaanshi kushikila pabushiku bwasanu ashotatwe ndibakashika kucipinda cakwinjililaako muŊanda yakwe Lesa. Lyalo bakasebensa kwanshiku ashimwi shosanwe ashotatwe, nkokwaamba ayi kushikila pabushiku bwalikumi anshiiku shosanwe abomwi bwa mweenshi uyo, kabasalasha Ŋanda yakwe Lesa iine ayi bakanoolambililaamo.

Ŋanda yakwe Lesa mboyakabengwa

¹⁸ Mpomunyaawo bene Lefi bakaya kumwaami Esekiya mukuluula ayi, “Twamanisha kusalasha Ŋanda yakwe Lesa yoonse kweelana aMilawo. Twakasalasha cipaililo ca milambu yakutenta ashisebensesho sha ncico, tebulu yakubikaawo shimaande shipekwa kuli Lesa ashisebensesho sha njiyo.

¹⁹ Twaboosha akusalasha shintu shoonse isho mwaami Aasi nshaakalinga wakushaamo ceebo cakutashomeka kwakwe kuli Lesa. Ono bulya shoonse shili panembo lya cipaililo ca Mwaami Lesa.”

²⁰ Macuunsacuunsa bushiku bwakaboolaawo mwaami Esekiya wakabunganya bamatanjilili ba mundabala akuya kuŊanda yakwe Lesa.

²¹ Bantu bakaleta bacende bosanwe abobilo, mbelele shisankwa shosanwe ashobilo, bana ba mbelele basankwa bali bosanwe abobilo alimwi ampongo shisankwa shosanwe ashobilo. Mpeeke bakashibenga ayi ngumulambu wakulekelelwa shibiibi sha bamuŋanda ya mwaami abantu boonse bene Juda alimwi ayi ngumulambu wakusalasha Ŋanda yakwe Lesa. Mwaami wakaambila bapailishi, bamulunyungu lwakwe Aloni, ayi babenge banyama boonse abo pacipaililo ca Mwaami Lesa.

²² Bakataanguna kucaya bacende, kuboolaawo bakacaya mbelele shisankwa, nkokwisa bana ba mbelele basankwa. Lyalo bakabwesa bulowa bwa banyama abo akubusanseela pacipaililo.

²³ Kuswawaawo bakatola mpongo sha mulambu wakulekelelwa shibiibi kumwaami akubamwi boonse bakalinga kulambila abalo bakabikaawo maansaabo pali nshisho.

²⁴ Lyalo bapailishi bakacaya mpongo isho akutila bulowa bwa nshisho pacipaililo ayi ngumulambu wakulekelelwa shibiibi sha bantu boonse. Bakacita boobo mukwiinga mwaami wakaambilisha ayi bene Isilaeli boonse babengelwe milambu yakutenta alimwi ayakulekelelwa shibiibi.

²⁵ Mwaami wakakonkela milasho iyo Mwaami Lesa njaakapa mwaami Defedi kwiinda muli Gadi mulaluki wakwe amumulaluki umwi Natani. Wakeemika bene Lefi muŊanda yakwe Lesa kabacite tusenke twakulisha atulumbu tunene atuniini.

²⁶ Aboobo bene Lefi bakeemikana ashakulisha isho mwaami Defedi nshaakalinga kusebensesha. Bapailishi abalo bakeemikana kweenka uko kabacite mapeenga.

²⁷ Mpomunyaawo Esekiya wakaambilisha ayi mulambu wakutenta ubengwe pacipaililo. Ndibakamana kubenga mulambu uyo bakatalika kwiimbila Mwaami Lesa, kabalisha mapeenga ashakulisha shimwi isho Defedi mwaami wa bene Isilaeli nshaakalinga kusebensesha.

²⁸ Lyalo bantu boonse bakakotamina panshi akulambila, beshikwiimba kabeemba abalo beshikulisha mapeenga kabalisha. Kwiimba uko kwakatolelela kushikila kubenga mulambu wakutenta ndikwakamana.

²⁹ Mpeeke ndibakamana kubenga mulambu uyo, mwaami Esekiya abantu boonse mbwaakalingaabo bakafukama panshi akulambila Lesa.

³⁰ Lyalo mwaami Esekiya abamatanjilili bakwe bakaambila bene Lefi ayi balumbe Mwaami Lesa mumaswi akwe Defedi aakwe Asafu mulaluki. Mpomunyaawo bakeemba nyimbo shakulumbaisha cakusangalala kabafukeme alimwi kabalambila Lesa.

³¹ Kuswawaawo Esekiya wakaamba ayi, “Ono bulya mwalisalasha kweelana aMilawo. Anu amulete milambu ashipo shakulumba Mwaami Lesa.” Mpeeke bantu boonse bakaleta milambu ashipo shakulumba Lesa. Bamwi bakaleta amilambu yakutenta cakulyaaba beene.

³² Bakaleta bacende bali 70, mbelele shisankwa shili 100 alimwi abana ba mbelele basankwa bali 200 ayi njimilambu yakutenta kuMwaami Lesa.

³³ Bakaleta bacende bali 600 ambelele shili 3,000 ayi njimilambu yakulya bantu.

³⁴ Paciindi ici tekwakalinga bapailishi bakalinga kukonsha kucaya banyama abo boonse. Aboobo bene Lefi bakabacafwaako kushikila mulimo woonse wamana. Muciindi ico bapailishi abamwi bakalisalasha kweelana aMilawo. Bene Lefi bakalinga kwiindaawo kushomeka mukwikala kabasalalite kweelana aMilawo kwiinda bapailishi.

³⁵ Kwakalinga milambu yakutenta iinji pantu pomwi amafuta amilambu ya bwanabwankashi alimwi ashipo sha cakunwa isho shakalinga kupetwa pantu pomwi amilambu yakutenta. Munshila iyi kulambila kwakatalika muŊanda yakwe Lesa alimwi.

³⁶ Lyalo Mwaami Esekiya abantu bakwe boonse bakasangalala mukwiinga Lesa wakabacafwa kwaamba ayi bamanishe mulimo uyo cakufwambaana.