2 Makani 28 - Baibo Busansulushi Bwa Libuku Ili

Aasi mwaami wa bene Juda

¹ Aasi wakaba mwaami kaacite myaaka makumi obilo. Wakalela muJelusalemu kwamyaaka likumi amyaaka yosanwe awomwi. Taakwe kukonkela bwakacita Defedi mushali wakwe mukulukulu, sombi wakacita shitaluleme pameenso a Mwaami Lesa, Lesa wakwe.

² Wakakonkela bwakacita bamaami bene Isilaeli. Wakapangisha shibumbwabumbwa sha sheela shakwe Baali.

³ Wakalinga kutenta tununkila kabotu muCinyika ca Inomu alimwi wakalinga kubenga abana bakwe ayi njimilambu yakutenta kushibumbwabumbwa. Wakalinga kucita boobo mukukonkela kwishibila kulensha bunya kwa baabo Mwaami Lesa mbwaakatanda mucishi cabo.

⁴ Aasi wakalinga kubenga milambu akutenta tununkila kabotu kumisena yakulambililaako ya patulundu alimwi munshaashisamu shicite shimfule shibotu.

Nkondo pakati ka bene Silya abene Isilaeli

⁵ Mpeeke Mwaami Lesa, Lesa wakwe wakamwaaba mumaansa a bene Silya mukwiinga wakabisha. Bene Silya bakamukoma akutola busha bantu bakwe baanji kuDamasikasi. Mwaami Lesa wakamwaaba amumaansa a mwaami wa bene Isilaeli uyo wakacaya bashilumamba bakwe baanji.

⁶ Peka, mwaami wa bene Isilaeli, mwanaakwe Lemaliya wakacaya bashilumamba bene Juda bali 120,000 mubushiku bomwi. Wakacita boobo mukwiinga bene Juda bakafutatila Mwaami Lesa, Lesa wa bamashali babo bakulukulu.

⁷ Lyalo shilumamba mwine Isilaeli wiitwa ayi Sikili wakacaya Maaseiya mwanaakwe Aasi, Asilikamu wacinenenene wa kuŋanda ya bwaami alimwi aElikana uyo wakalinga kukonkela mwaami mubweendeleshi.

⁸ Nakubi kwaamba ayi bene Juda bakalinga bamakwababo, bene Isilaeli bakacata busha banakashi, baana basankwa abanakashi abo bakalinga 200,000 boonse pantu pomwi akubatola kuSamaliya. Bakatola ashintu shiinji nshebakasaala.

Odedi mulaluki

⁹ Mulaluki umwi wa Mwaami Lesa wiitwa ayi Odedi uyo wakalinga kwikala mundabala ya Samaliya wakakumana abashilumamba bene Isilaeli abo bakalinga kuboolela abaabo mbobakacata busha kuswa kuJuda ndibakalinga pafwaafwi akwinjila mundabala ya Samaliya. Mpomunyaawo wakabaambila ayi, “Mwaami Lesa, Lesa wa bamashali banu bakulukulu wakakalala pabene Juda akulengesha ayi mwebo mubakome. Sombi wabona mbuli mbomwabacaya calunkutwe pakubalwana.

¹⁰ Ono mbulya mulisuni kwaalula busha basankwa abanakashi bene Juda abene Jelusalemu. Sa tamwishi kwaamba ayi amwebo kuli shibiibi nshimwakacita kuMwaami Lesa, Lesa wanu?

¹¹ Amukutike! Aba mbomwacata busha mbamakwabanu. Amubaleeke banooya. Kwabula boobo bukali bwa Mwaami Lesa butoosa pali ndimwe.”

¹² Lyalo bamatanjilili bamwi ba mucishi ca Isilaeli bakapikisha cakacita bashilumamba bene Isilaeli. Bamatanjilili abo nguAsaliya mwanaakwe Jeowanani, Belekiya mwanaakwe Meshilemoti, Jeisikiya mwanaakwe Shalumu alimwi aAmasa mwanaakwe Adalayi.

¹³ Bakaamba ayi, “Mutaleti basha abo kuno! Swebo twakabisha kale kuMwaami Lesa akumukalasha cakweelela kupekwa mulandu. Ono sa mulisuni kwiilikaawo ashimwi.”

¹⁴ Mpomunyaawo bashilumamba bakatula basha abo ashintu nshebakasaala mumaansa a bantu abamatanjilili babo.

¹⁵ Lyalo bamatanjilili abo bone bakapekwa mulimo wakubona kwaamba ayi basha abo bapekwa shakufwala kuswa pashintu isho shebakasaala. Bakapa shakufwala ankwabilo, shakulya ashakunwa alimwi akubabika mafuta a olifi pashilonda. Abo batakalinga kucikonsha kweenda, bakababika pambongolo. Lyalo basha boonse abo bakabatola kucishi ca bene Juda mundabala ya Jeliko, Ndabala ya Tupukupuku. Kuswawaawo bene Isilaeli bakaboolela kuSamaliya.

Aasi mbwaakasenga lucafwo kucishi ca Asilya

¹⁶ Paciindi ico mwaami Aasi wakasenga lucafwo kuli Tigilati Pilesa mwaami wa bene Asilya.

¹⁷ Bene Edomu bakesa alimwi mukulwana bene Juda akucata busha bantu baanji.

¹⁸ Bene Filisiti abalo bakaya mukulwana mandabala a mutulundu alimwi amuNegefu kuJuda. Bakaya bakoma ndabala ya Beti Shemeshi, Aijaloni, Gedeloti, Soko, Timina alimwi aya Gimuso pantu pomwi amishi yakalinga kwaashingulukite. Lyalo bakekalaamo.

¹⁹ Mwaami Lesa wakaleta mapensho kubene Juda mukwiinga Aasi mwaami wa bene Isilaeli wakaleka bene Juda ayi batolelele kubisha alimwi taakalinga kunyumfwila Mwaami Lesa.

²⁰ Lyalo Tigilati Pilesa mwaami wa bene Asilya wakesa kuli Aasi, sombi lakwe mumusena wakumucafwa, wakamupensha.

²¹ Kuswawaawo Aasi wakabwesa shintu shimwi sha muŊanda yakwe Lesa, muŋanda yabwaami alimwi akumaanda a bamatanjilili ba bantu akushipa mwaami wa bene Asilya. Sombi taaku lucafwo ndwaakabona kuswa kuli nguwe.

Kubisha kwakwe Aasi

²² Ono Aasi ndyaakalinga mumapensho anene, wakeendilisha kubisha kuMwaami Lesa.

²³ Wakabenga milambu kubalesa ba bene Damasikasi abo bakamukoma mukwiinga wakayeeya ayi, “Balesa ba bamaami bene Silya bacafwa bantu aba, aboobo ntoobenga milambu kuli mbabo kwaamba ayi anebo bancafweeko.” Sombi ici cakaleta mapensho pali nguwe apabene Isilaeli boonse.

²⁴ Peculu lya waawo wakabwesa shintu shoonse sha muŊanda yakwe Lesa akushipwayoola. Lyalo kuŊanda yakwe Lesa wakacalaako akuyaka shipaililo mumisena moonse mwakalinga kupetukila nshila sha muJelusalemu.

²⁵ Mpeeke mumandabala anene oonse amumishi yoonse mucishi ca Juda, wakayakaamo misena yakulambililaako ya patulundu ayi munootentelwa milambu kubalesa beensu. Munshila iyo, wakaliletela bukali bwa Mwaami Lesa, Lesa wa bamashali bakwe bakulukulu.

²⁶ Shintu shimwi shoonse shakacita Aasi mubwaami bwakwe, kuswa kumatalikilo kushikila kumeelelesho shililembetwe mulibuku lya buumi bwa bamaami ba bene Juda abene Isilaeli.

²⁷ Lyalo wakafwa akubikwa mundabala ya Jelusalemu, sombi taakwe kubikwa mushuumbwe sha bamaami ba bene Isilaeli. Lyalo Esekiya mwanaakwe ngowakapyana bwaami bwakwe.