2 Makani 27 - Baibo Busansulushi Bwa Libuku Ili

Jotamu mwaami wa bene Juda

¹ Jotamu wakaba mwaami kaacite myaaka makumi obilo amyaaka yosanwe. Wakalela muJelusalemu kwamyaaka likumi amyaaka yosanwe awomwi. Banyina bakalinga mba Jelusha mwanaakwe Sadoki.

² Wakacita shiluleme pameenso akwe Lesa bweenka bwakacita Usiya ishi, sombi taakwe kubisha bwakacita ishi mukutenta tununkila kabotu muŊanda yakwe Lesa. Nakubi boobo balo bantu tabakwe kucilekaawo micito yabo ibiibi.

³ Jotamu ngowakayakulula Mwinjililo wa Peculu wa Ŋanda yakwe Lesa alimwi akusebensa milimo iinji pakuyaka lubumbu lwa mundabala mumusena wa kuJelusalemu wiitwa ayi Ofelo.

⁴ Mutulundu twa muJuda wakayaka mandabala anene alimwi amumusaansa wakayaka malinga amaanda alaamfu.

⁵ Wakalwana mwaami wa bene Amoni abashilumamba bakwe akubakoma. Lyalo wakabakakatisha kunoolipila musonko wa makilogilamu a silifa ali 3,400, makilogilamu a witi ali 1,000,000 alimwi amakilogilamu a bale ali 1,000,000. Musonko uyo bakaulipila kwamyaaka yotatwe.

⁶ Jotamu uyo wakaba ankusu abulemu mukwiinga wakalinga kushomeka kuMwaami Lesa, Lesa wakwe akumunyumfwila.

⁷ Shintu shimwi shoonse shakacita Jotamu mubwaami bwakwe, nkondo nshaakalwana, milawo yabweendeleshi bwakwe shililembetwe mulibuku lya buumi bwa bamaami ba bene Isilaeli abene Juda.

⁸ Jotamu wakaba mwaami kaacite myaaka makumi obilo amyaaka yosanwe. Wakalela muJelusalemu kwamyaaka likumi amyaaka yosanwe awomwi.

⁹ Wakafwa akubikwa muNdabala yakwe Defedi. Lyalo Aasi mwanaakwe ngowakapyana bwaami bwakwe.