2 Makani 26 - Baibo Busansulushi Bwa Libuku Ili

Usiya mwaami wa bene Juda

¹ Mpomunyaawo bantu boonse bene Juda bakasala Usiya uyo wakalinga kucite myaaka likumi amyaaka yosanwe awomwi ayi apyane bwaami bwa baishi baAmasiya.

² Usiya wakakoma akuyakulula ndabala ya Elati pesule lya kufwa kwa baishi.

³ Usiya wakaba mwaami kaacite myaaka likumi amyaaka yosanwe awomwi. Wakalela muJelusalemu kwamyaaka makumi osanwe ayobilo. Usiya wakalinga mwanaakwe Jekoliya mwanakashi mwine Jelusalemu.

⁴ Wakacita shiluleme pameenso akwe Lesa bweenka bwakacita Amasiya ishi.

⁵ Muciindi coonse ca buumi bwakwe Sekaliya uyo wakalinga kumwiishako makani akwe Lesa, wakalinga kusebensela Mwaami Lesa cakushomeka. Aboobo Lesa wakamulengesha kuswitilila.

⁶ Mpeeke Usiya wakaya mukulwana bene Filisiti. Wakapwaya lilinga lya ndabala ya Gati, Jabune alimwi alya Ashidodi. Lyalo wakayakulula mandabala amwi kufwaafwi andabala ya Ashidodi akumisena imwi ya muFilisitiya.

⁷ Lyalo Lesa wakamucafwa kuya mukukoma bene Filisiti, baAlabu bekala kuGeli Baali alimwi abene Meyuni.

⁸ Bene Amoni bakalinga kuleta musonko kuli Usiya, lyalo wakaba ankusu abulemu buunji cakwaamba ayi wakaya mpuwo kushika akucishi ca Ijipiti.

⁹ Kuswawaawo Usiya wakayaka maanda alaamfu a beshikulindilila muJelusalemu kuMwinjililo wa Likonko akuMwinjililo wa Cinyika alimwi apalikonko lya lubumbu. Maanda aya oonse wakaayakila mulilinga.

¹⁰ Wakayaka maanda alaamfu muluyanga acite malinga akukaba mikalo iinji. Wakacita boobo mukwiinga wakalinga kucite shifubwa shiinji mucishi ca tulundu ca kulubasu lwakumbo amumawesa. Ono ceebo cakwaamba ayi wakalinga kusuni kulima, wakayumyayumya bantu ayi banoolima myuunda ya minyansa mucishi ico ca tulundu akulima bulongo bwa mboleshi.

¹¹ Usiya wakalinga kucite likoto linene lya bashilumamba abo bakalinga kulibambite kulwana. Shoonse nshebakacita shililembetwe mumabuku a balembi bakwe aba, Jeiyelo alimwi aMaseiya abo bakalinga kweendeleshekwa aAnaniya uyo wakalinga wacinenenene umwi wa Mwaami.

¹² Bamatanjilili ba bashilumamba boonse bakalinga 2,600.

¹³ Bashilumamba boonse abo mbobakalinga kutanjilila bakalinga 307,500 bacibwene kulwana alimwi bakalinga kulibambite kufuna mwaami kubalwani bakwe.

¹⁴ Usiya wakapa bashilumamba bakwe mayawo, masumo, shimpoompo, shakufwala sha nkondo, mata, mifwi alimwi amabwe afupulwa kucipaya.

¹⁵ MuJelusalemu bantu bakwe bacibwene shakupangapanga, bakapanga cakuwaalisha mifwi amabwe anene kuswa pamaanda alaamfu amumakonko oonse a lubumbu lwa ndabala. Paceebo ceeco wakaya mpuwo mucishi coonse alimwi wakaba ankusu abulemu mukwiinga Lesa wakalinga kumucafwa.

Usiya mbwaakapekwa mulandu ceebo cakulisumpula

¹⁶ Mwaami Usiya ndyaakaba ankusu abulemu, wakatalika kulisumpula. Ico cakalengesha bwaami bwakwe kuboola panshi. Wakabisha kuMwaami Lesa, Lesa wakwe mukuya muŊanda yakwe akutenta tununkila kabotu pacipaililo ca ntuto.

¹⁷ Lyalo Asaliya mupailishi abapailishi bamwi bali makumi osanwe aotatwe, bayumu alimwi batacite boowa, bakakonkela mwaami

¹⁸ kuya mukumukasha. Bakamwaambila ayi, “Mwebo baUsiya, tamucite nkusu shakutenta tununkila kabotu kuMwaami Lesa. Sombibo bapailishi bamulunyungu lwakwe Aloni mbobakasalwa kucita mulimo uyo. Amusweemo mumusena usalalite uyo. Mwebo mwakalasha Mwaami Lesa, aboobo Mwaami Lesa teshi akamupeewo coolwe.”

¹⁹ Usiya wakalinga kwiimfwi muŊanda yakwe Lesa pafwaafwi acipaililo ca tununkila kabotu kaacite acakututentelaamo. Wakakalala abuumbi abapailishi abo. Lyalo manata akatalika pankumo yakwe.

²⁰ Lyalo Asaliya mupailishi munene abapailishinyina ndibakalangilisha mwaami pankumo, bakabona ayi waba amanata. Lyalo bakamukakatisha ayi aswe muŊanda yakwe Lesa. Mpeeke wakaswaamo calubilo mukwiinga Mwaami Lesa wakamupa mulandu.

²¹ Kuswawaawo mwaami Usiya wakaciswa manata kushikila bushiku ndyaakafwa. Wakalinga kwikala muŋanda yakwe eenka mulandu wa manata ayo. Bakamukasha kwinjila muŊanda yakwe Lesa mukwiinga taakalinga kusalalite kweelana aMilawo. Muciindi ico Jotamu mwanaakwe ngowakalinga kweendelesha ŋanda ya bwaami akulela bantu ba mucishi coonse.

²² Shintu shimwi shoonse shakacita Usiya kuswa kumatalikilo kushikila kumeelelesho shililembetwe mulibuku lya mulaluki Isaya mwanaakwe Amosi.

²³ Lyalo Usiya wakafwa akubikwa kumaanda a bamaami pafwaafwi abamashali bakwe bakulukulu. Sombi tabakwe kumubika kushuumbwe sha bamaami mukwiinga wakalinga kuciswa manata. Lyalo Jotamu mwanaakwe ngowakapyana bwaami bwakwe.