2 Makani 25 - Baibo Busansulushi Bwa Libuku Ili

Amasiya mwaami wa bene Juda

¹ Amasiya wakaba mwaami kaacite myaaka makumi obilo ayosanwe. Wakalela muJelusalemu kwamyaaka makumi obilo amyaaka yosanwe ayone. Amasiya wakalinga mwanaakwe Jeoyadini mwanakashi mwine Jelusalemu.

² Wakacita shintu shiluleme pameenso a Mwaami Lesa, sombi taakalinga kushicita camoyo woonse.

³ Ono bwaami bwakwe Amasiya ndibwakashimpa, wakacaya bacinenenene abo bakacaya baishi abo bakalinga baami.

⁴ Nakubi boobo bana babo taakwe kubacaya mukukonkela bwaamba Milawo yakwe Mose ayi, “Bamashali teshi bakacaikwe ceebo ca shibiibi sha bana babo, abalo bana babo teshi bakacaikwe ceebo ca shibiibi sha bamashali babo. Muntu womwi awomwi ulaakucaikwa ceebo cakubisha kwakwe mwiine.”

Nkondo kubene Edomu

⁵ Mpeeke Amasiya wakeeta bene Juda abene Benjameni boonse. Lyalo wakabapansaanya mumakoto kweelana ashipani shabo akubikaamo bamatanjilili ba bashilumamba ba bali cuulu aba bali mwaanda. Nkokwaamba ayi basankwa boonse bakalinga kucite myaaka makumi obilo akuya peculu abo bakalinga 300,000 pantu pomwi. Bashilumamba bakabwesekwa abo, boonse bakalinga kucibwene kulwanisha masumo alimwi amayawo.

⁶ Kwiilikaawo wakatamba bashilumamba bali 100,000 ba kucishi ca Isilaeli pamweelo wa makilogilamu a silifa ali 3,400.

⁷ Sombi mulaluki wakaya kumwaami akumwaambila ayi, “Mwebo nobaami mutayi pantu pomwi abashilumamba bene Isilaeli. Mwaami Lesa taabete abashilumamba aba bene Isilaeli nabi bene Efuleemu.

⁸ Nabi mwaya mwalwana buyani cankusu, Lesa ulaakumwaaba mumaansa a balwani banu mukwiinga ngoocite nkusu shakumucafwa nabi shakumwaaba mumaansa a balwani banu.”

⁹ Lyalo Amasiya wakeepusha mulaluki ayi, “Ino citooba buyani pasilifa ngondalipilila kale bashilumamba bene Isilaeli aba?” Mulaluki wakakumbula ayi, “Mwaami Lesa ulaakumupa uunji kwiinda wooyo!”

¹⁰ Mpomunyaawo Amasiya wakaambila bashilumamba abo ayi baboolele kumishaabo. Aboobo bakaya kumishaabo kabakalalite abuumbi pabene Juda.

¹¹ Lyalo Amasiya wakaliyumyayumya akuya abashilumamba bakwe kuCinyika ca Mwiinyo. Kucinyika uko, bakacaya bene Edomu bali 10,000.

¹² Bashilumamba bene Juda bakacata busha bene Edomu bamwi bali 10,000 akubatola kukalundu kalaamfu. Mpeeke bakabawaala panshi kwaamba ayi bacaikwe kumabwe ayo akalinga panshi.

¹³ Muciindi ico bashilumamba bene Isilaeli abo Amasiya mbwaakabooshaamo ayi batayi mukulwanaako nkondo iyo, bakalwana mandabala ene Juda ayo akalinga pakati ka Samaliya aBeti Oloni. Bakacaya bantu bali 3,000 akusaala shintu shiinji.

¹⁴ Amasiya ndyaakaboola kuswa mukucayoola bene Edomu, wakaletelela ashibumbwabumbwa shabo. Mpeeke wakashiimikeemika ayi shibe balesa bakwe washifukamina akushitentela milambu.

¹⁵ Mwaami Lesa wakakalalila Amasiya. Lyalo wakatuma mulaluki kuli nguwe mukumwaambila ayi, “Ino utoolambililanshi balesa ba bantu abo, balesa abo batakwe kukonsha kupulusha bantu babo kuswa mumaansaako?”

¹⁶ Ono mulaluki kaacaamba, mwaami wakamwaambila ayi, “Umuna! Twakakusala lili kuba shikupanda maano mwaami? Cileke kwaamba kaantana kukucaisha!” Mulaluki kaatana kucileka kwaamba, wakaamba ayi, “Ono ndeshiiba kwaamba ayi Lesa ulishinishite kumucaya mukwiinga mwebo mwaciita cintu ca mushobo uyu alimwi tamukwe kunyumfwila nshendaamba.”

Nkondo yakaba pa bene Isilaeli

¹⁷ Kuswawaawo Amasiya mwaami wa bene Juda abeshikumupandako maano bakapangana kwaamba ayi baye mukulwana bene Isilaeli. Lyalo wakatuma nkombe kuli Jeoyashi mwaami wa bene Isilaeli uyo wakalinga mwanaakwe Jeowasi alimwi wakalinga mwishikulu wakwe Jewu yakumulwiita ayi, “Use tukunkane akubona musankwa.”

¹⁸ Sombi Jeowashi wakakumbula Amasiya ayi, “Kwakalinga cikupu ca myuumfwa muLebanoni ico cakatuma nkombe kucisamu ca sida ayi, ‘Suminisha mwanaako mwanakashi ayi njebele mwanaangu musankwa.’ Mpomunyaawo munyama wa muluundu wakacilyatoola cikupu ca myuumfwa cilya.

¹⁹ Ncakwiila webo Amasiya wakoma bene Edomu, aboobo ici cakupa kulisumpula abuumbi. Kondwa mukukoma kwako, sombi koshiitebo kuŋanda yako. Ceebonshi utooyanda kulibushisha mapensho ayo eshi akalengeshebo webo abene Juda kukomwa?”

²⁰ Nacibi boobo Amasiya lakwe taakwe kukutika cikani ico. Kukomwa kwakwe Amasiya wakalinga ngumuyeeyo wakwe Lesa mukwiinga wakalinga kulambila shibumbwabumbwa sha bene Moabu.

²¹ Aboobo Jeowashi mwaami wa bene Isilaeli wakanyamuka akuya mukulwana Amasiya mwaami wa bene Juda. Bakatalika kulwana kuBeti Shemeshi mucishi ca Juda.

²² Bashilumamba bene Juda bakakomwa alimwi boonse bakamana kucicila kumishaabo.

²³ Jeowashi wakatola busha Amasiya kundabala ya Jelusalemu. Lyalo wakamwaya lubumbu lwa njiyo kuswa kumwinjililo wa Efuleemu kuya mukushika kumwinjililo wa Likonko, mushinso wa mamita ali mpashi 200.

²⁴ Kuswawaawo wakabwesa golodi asilifa kubikaawo ashintu shimwi sha muŊanda yakwe Lesa isho Obedi Edomu nshaakalinga kulama pantu pomwi abuboni bwakalinga muŋanda ya bwaami akushitola kuSamaliya. Wakatolelela abasha ndyaakaboolela kuSamaliya.

²⁵ Amasiya mwanaakwe Joashi mwaami wa bene Juda wakalela myaaka ili likumi ayosanwe kuswa pabushiku ndyaakafwa mwaami Jeoyashi mwanaakwe Jeowasi, mwaami wa bene Isilaeli.

²⁶ Shintu shimwi shoonse shakacita Amasiya shililembetwe mulibuku lya buumi bwa bamaami ba bene Juda abene Isilaeli.

²⁷ Kuswa paciindi Amasiya ndyaakashukila Mwaami Lesa, abalo bene Jelusalemu bakamubukila. Aboobo wakaloboka akuya kundabala ya kuLakishi. Sombi balwani bakwe bakamukonkela uko akumucaya.

²⁸ Bakaboosha mubili wakwe kuJelusalemu paliaki akuya mukuubika kushuumbwe sha baami muNdabala yakwe Defedi.