2 Makani 24 - Baibo Busansulushi Bwa Libuku Ili

Joashi mwaami wa bene Juda

¹ Joashi wakaba mwaami wa bene Juda kaacite myaaka yosanwe ayobilo. Wakalela muJelusalemu kwamyaaka makumi one. Joashi wakalinga mwanaakwe Sibiya, mwanakashi wakaswa kundabala ya Biyasheba.

² Wakacita shiluleme pameenso a Mwaami Lesa muciindi coonse ca buumi bwakwe Jeoiyada mupailishi.

³ Mpeeke Jeoiyada wakeebela mwaami Joashi banakashi bobilo abo bakamushalila baana basankwa abanakashi.

⁴ Mukuya kwa nshiku, Joashi wakayeeya kwaamba ayi Ŋanda yakwe Lesa ibambwe moyakalinga kufwitefwite.

⁵ Lyalo wakabunganya bapailishi abene Lefi akubaambila ayi, “Kamuya kumandabala a bene Juda mukabwese maali ayo ngobeelete kubenga pamwaaka womwi awomwi kuswa kubantu boonse kwaamba ayi tukaasebenseshe kubamba kabotu Ŋanda yakwe Lesa, Lesa wanu. Kamuya bulya bweenka.” Sombi bene Lefi tabakwe kuya bwaangu.

⁶ Lyalo wakeeta Jeoiyada mupailishi munene akumwaambila ayi, “Ino tookwe kutuminanshi bene Lefi kuya mukuleta musonko kuswa kubene Juda abene Jelusalemu uyo wakaamba Mose musebenshi wa Mwaami Lesa abantu boonse bene Isilaeli weelete kusebenseshekwa kuTente ya Cipangano?”

⁷ Ono beshikukonkela Ataliya mwanakashi mubiibi ulya, bakenjila muŊanda yakwe Lesa akusebensesha shintu shimwi shisalalite mukulambila Baali.

⁸ Mwaami wakaambila bene Lefi kwaamba ayi bapange libokoshi lya kubikilaamo maali ayo ngobakalinga kusonka akulibika kumwinjililo wa Ŋanda yakwe Lesa.

⁹ Bakatuma nkombe kubantu ba mucishi ca Juda amundabala ya Jelusalemu kwaamba ayi muntu woonse ulyeelete kuleta musonko kuMwaami Lesa uyo Mose musebenshi wakwe Lesa ngwaakataanguna kusonkesha muluyanga.

¹⁰ Ici cakakondelesha bantu alimwi abamatanjilili. Aboobo bakaleta maali kushikila libokoshi ilyo balisusha.

¹¹ Lyoonse bene Lefi bakalinga kutola libokoshi ilyo kubacinenenene ba mwaami abo bakalinga kweendelesha ncito iyo. Lyoonse na lyesula, mulembi wa mwaami alimwi ashikwiimikanina mupailishi munene bakalinga kwaasukumunaamo akuboosha libokoshi pamusena wa ndilyo. Munshila iyi bakalinga kubwesa maali aanji abuumbi.

¹² Kuswawaawo mwaami aJeoiyada bakalinga kupa maali ayo kubaabo bakalinga kweendelesha mulimo wakubamba Ŋanda yakwe Lesa. Bakenjisha ncito beshikubesa mabwe, beshikubesa mapulanga alimwi abeshikufula sheela shakubambisha Ŋanda yakwe Lesa.

¹³ Basebenshi boonse bakasebensa cankusu akumanisha kubamba Ŋanda yakwe Lesa. Yakaba bweenka mboyakalinga pakataanshi alimwi bakeeyumya abuumbi!

¹⁴ Mulimo wakubamba ndiwakamanishikwa, maali akacaala bakaapa mwaami alimwi aJeoiyada ayo ngwaakapangisha shisebensesho sha golodi asilifa, nkokwaamba ayi mbale shifongomene ashintu shimwi sha muŊanda yakwe Lesa. Mubuumi bwakwe Jeoiyada boonse, milambu yakutenta yakalinga kubengwa kuŊanda yakwe Lesa.

Bene Juda mbobakaleka nshila ibotu yakwe Jeoiyada

¹⁵ Lyalo wakacembela abuumbi akufwa kaacite myaaka ili mwaanda amyaaka makumi otatwe.

¹⁶ Bakamubika kushuumbwe sha bamaami muNdabala yakwe Defedi ceebo ca shintu shibotu nshaakacitila bene Isilaeli, Lesa aŊanda yakwe.

¹⁷ Sombi Jeoiyada ndyaakafwa, bamatanjilili bene Juda bakanyengelela mwaami Joashi ayi anoonyumfwila mbabo.

¹⁸ Mpeeke bantu boonse bakacileka kulambila Mwaami Lesa, Lesa wa bamashali babo bakulukulu muŊanda yakwe Lesa akutalika kulambila shibumbwabumbwa ashikoshanyo shakwe Ashela lesa mwanakashi. Mulandu wa shibiibi isho wakasonkomona bukali bwa Mwaami Lesa kwisa pabene Juda abene Jelusalemu.

¹⁹ Lyalo Mwaami Lesa wakatuma balaluki kwaamba ayi bacenjeshe bantu abo ayi baboolele kuli nguwe, sombi bantu abo tabakwe kubanyumfwila.

²⁰ Mpomunyaawo Mushimu wa Mwaami Lesa wakaselukila Sekaliya mwanaakwe Jeoiyada mupailishi. Mpeeke wakeemikana kunembo lya bantu boonse akwaamba ayi, “Lesa utoomwiipusha ayi, ‘Nciinshi calengesha ayi mukake kukonkela milawo yangu? Mwaliletela mapensho pamitwi yanu! Ceebo cakwaamba ayi mwamfutatila, anebo ndamushiya!’ ”

²¹ Sombi bantu abo bakabukila Sekaliya. Lyalo mukutumwa kumwaami Joashi, bakamuuma mabwe mulubansa lwa Ŋanda yakwe Lesa akumucaya.

²² Ono mwaami Joashi wakaluba shintu shibotu nshakamucitila Jeoiyada ishi Sekaliya akucaya mwanaakwe. Mwanaakwe uyo pakufwa wakaamba ayi, “Mwaami Lesa aabone ncemutoocita akumupa mulandu.”

Bwaami bwakwe Joashi mbobwakamana

²³ Mainsa ndyaakamana, bashilumamba bene Silya bakaya mukulwana bene Juda alimwi abene Jelusalemu. Bakacaya bamatanjilili boonse basaala shintu shiinji shiinji akushitola kumwaami wabo kuDamasikasi.

²⁴ Nabi bene Silya bakalinga baniini mumweelo, Mwaami Lesa wakabalengesha kukoma bashilumamba baanji bene Juda mukwiinga balo bakafutatila Mwaami Lesa, Lesa wa bamashali babo bakulukulu. Munshila iyi Joashi wakapekwa mulandu.

²⁵ Bene Silya bakaboolela akushiya mwaami Joashi kaacisitwe abuumbi. Mpeeke bacinenenene bakwe bakamubukila akumusaulula kaalete mubulo bwakwe mukuboosha cishole ceebo cakucaya mwanaakwe Jeoiyada mupailishi. Lyalo bakamubika muNdabala yakwe Defedi, sombi kuteshi mushuumbwe sha bamaami.

²⁶ Abo bakamubukila nguSabadi mwanaakwe Shimeyati mwanakashi mwine Amoni aJeosabadi mwanaakwe Shimiliti mwanakashi mwine Moabu.

²⁷ Mubusansulushi bwa libuku lya buumi bwa bamaami, mulilembetwe makani a bana bakwe Joashi, bulaluki bwapali nguwe alimwi ambuli mbwaakabamba Ŋanda yakwe Lesa. Lyalo Amasiya mwanaakwe ngowakapyana bwaami bwakwe.