2 Makani 22 - Baibo Busansulushi Bwa Libuku Ili

Aasiya mwaami wa bene Juda

¹ BaAlabu bamwi bakaya mukusaala, mpeeke bakacaya baana boonse ba mwaami Jeolamu kushiyakobo Aasiya shikeela. Lyalo bene Jelusalemu bakabika Aasiya pabwaami mumusena wa baishi.

² Aasiya wakaba mwaami kaacite myaaka makumi obilo ayobilo. Wakalela muJelusalemu kwamwaaka womwi. Aasiya wakalinga mwanaakwe Ataliya mwishikulu wakwe Omuli mwanakashi.

³ Alakwe wakalinga kucita bweenka bwakalinga kucita bamuŋanda yakwe Aabu mukwiinga banyina bakalinga kumuyumyayumya kucita shintu shibiibi.

⁴ Wakabisha pameenso a mwaami Lesa mukwiinga kuswa paciindi baishi ndibakafwa, bamuŋanda yakwe Aabu bamwi bakaba beshikumupandako maano. Ici cakalengesha ayi aalilwe kutolelela kulela.

⁵ Mukukonkela maano ngobakalinga kumupandaako, mwaami Aasiya wakaya pantu pomwi aJolamu mwaami wa bene Isilaeli mukulwana Asayelo mwaami wa bene Silya kuLamoti Gilyadi. Mpeeke Jolamu wakayaswa kubene Silya.

⁶ Lyalo Jolamu wakaboolela kundabala ya Jesiliilu kwaamba ayi shilonda shakwe isho shiye shikooshe. Ono Aasilya mwanaakwe Jeolamu wakaya kuJesiliilu mukumubona.

⁷ Lesa wakasebensesha kufwakasha uku kwakwe Aasiya kuli Jolamu kwaamba ayi bwaami bwakwe Aasiya bumane. Aasiya kaacili kooko, lakwe aJolamu bakapolelwa musankwa wiitwa ayi Jewu mwanaakwe Nimushi uyo Mwaami Lesa ngwaakasala ayi anyonyoole bamuŋanda yakwe Aabu.

⁸ Jewu ndyaakalinga kunyonyoola bamuŋanda yakwe Aabu, wakacana likoto lya bamatanjilili ba bene Juda abaana ba beshikamukowa wakwe Aasiya abo bakamushindikila. Mpeeke Jewu wakabacaya boonsebo.

⁹ Lyalo wakaya mukuyandoola Aasiya. Basankwa bakwe bamwi bakamucana mucishi ca Samaliya kaayubite akumucata. Mpeeke bakamutola kuli Jewu akumucaya. Sombi bakamubika mukwiinga mwaami Jeoshafati nkambiyakwe wakalinga kusebensela Mwaami Lesa camoyo woonse. Tekwakalinga nabi womwi wamuŋanda yakwe Aasiya wakacaalaawo uyo wakalinga kucite nkusu shakulela cishi ico.

Ataliya mwaami mwanakashi wa bene Juda

¹⁰ Ono Ataliya banyina mwaami Aasiya ndyaakabona ayi mwanaakwe musankwa bamucaya, wakaamba ayi boonse bamuŋanda ya bwaami bwa bene Juda bacaikwe.

¹¹ Aasiya wakalinga kucite nankashi yakwe wa mubanyina bamwi wiitwa ayi Jeosheba uyo wakalinga kweebetwe kumupailishi wiitwa ayi Jeoiyada. Wakafuna mwanaakwe Aasiya musankwa wiitwa ayi Joashi cabushishi. Wakamukusha pabanaamwaami bamwi boonse abo bakalinga kweelete kucaikwa akumushisa kucipinda cakoonaamo muŊanda yakwe Lesa pantu pomwi amwanakashi shikumulela. Munshila iyo wakamushisa kuli Ataliya kwaamba ayi atacaikwi.

¹² Joashi wakalinga kushisitwe kwamyaaka yosanwe awomwi muŊanda yakwe Lesa mweenka umo. Paciindi ico Ataliya ngowakalinga kulela cishi.