2 Makani 20 - Baibo Busansulushi Bwa Libuku Ili

Bene Juda mbobakalwana bene Edomu

¹ Ndipakeenda ciindi bashilumamba bene Moabu alimwi abene Amoni pantu pomwi abene Meyunimu bamwi bakaya mukulwana bene Juda.

² Mpomunyaawo beshinkombe bakesa kuli Jeoshafati akumwaambila ayi, “Bashilumamba baanji baanji kuswa kuEdomu kwitala lya Lweenge lwa Mwiinyo batoosa mukumulwana. Bakoma kale ndabala ya Asasoni Tama.” Ili ndyeliina limwi lya Eni Gedi.

³ Mpeeke Jeoshafati wakafwa boowa akutalika kupaila kuMwaami Lesa kwaamba ayi amutanjilile. Lyalo wakaambila bantu boonse mucishi ayi balikaashe kulya.

⁴ Bantu ba mumandabala oonse a mucishi ca Juda bakaya kuJelusalemu mukusenga lucafwo kuMwaami Lesa.

⁵ Mpeeke mwaami Jeoshafati wakeemikana pakati ka bene Juda abene Jelusalemu kuŊanda yakwe Lesa kunembo lya lubansa lupya

⁶ akupaila cakoolobesha ayi, “NoBaami baLesa, baLesa ba bamashali besu bakulukulu. Mulalela kwiculu apacishi coonse ca panshi. Mulicite nkusu shoonse abulemu buunji. Ncakwiila taaku weenga wakonsha kumulwana.

⁷ Mwebo ndimwe baLesa besu. Bene Isilaeli ndibakesa muno mucishi, mwakatandaanya bantu abo bakalinga kwikalaamo. Lyalo mwakapa cishi cabo kubamulunyungu lwakwe Abulaamu, shicibusa wanu, ayi cibe caabo kwalyoonse aLyoonse.

⁸ Bakekalaamo akuyaka Ŋanda yanu mukumulemeka

⁹ akwaamba ayi, ‘Na mapensho akatupolele, nkokwaamba ayi nkondo, mwaalu nabi nsala, tulaakwisa mukwiimikana pameenso anu kunembo lya Ŋanda yakwe Lesa iyi uko kuli bulemu bwanu. Tulaakumulilila mubuumba bwesu, lyalo mwebo mulaakunyumfwa kusenga kwesu akutufuna.’

¹⁰ “Ono bulya bene Amoni, bene Moabu abene Edomu besa mukutulwana. Bamashali besu bakulukulu ndibakalinga kuswa muIjipiti, mwakabakasha kulwana shishi ishi. Aboobo bakabaseesha alimwi tabakwe kubanyonyoola.

¹¹ Ono amubone cishole ncebatootubooshesha! Besa mukututandaanya mucishi ico ncemwakatupa.

¹² Mwebo ndimwe baLesa besu! Amubape mulandu mukwiinga swebo tatukoonshi kulwana bashilumamba baanji aba. Tatucishi cakucita, sombi tutoolanga kuli ndimwe ayi mutucaafwe.”

¹³ Paciindi ico basankwa boonse bene Juda, bamakaabo abana babo bakalinga kwiimfwi kuŊanda yakwe Lesa.

¹⁴ Lyalo Mushimu wa Mwaami Lesa wakesa pamwine Lefi wakacanika mulikoto ilyo. Liina lyakwe nguJaasiyelo mwanaakwe Sekaliya. Jaasiyelo wakalinga wamucipani cakwe Asafu. Asafu wakashala Mataniya, Mataniya wakashala Jeiyelo, Jeiyelo wakashala Benaya, lyalo Benaya wakashala Sekaliya.

¹⁵ Mpeeke Jaasiyelo wakaamba ayi, “Nobaami amwebo nobene Juda abene Jelusalemu, Mwaami Lesa waamba ayi, ‘Mutatyongoli nabi kuloonda ceebo ca bashilumamba baanji aba. Nkondo teshi yanu, sombi njakwe Lesa.

¹⁶ Ciilo mukaye mukabalwaane kumwinjililo wa Sisi. Mulaakubeensha kweela cinyika kufwaafwi aLuyanga lwa Jeluwelo.

¹⁷ Teshi ndimwe mweshi mukalwane nkondo iyi, sobwe. Mwebo mukeemikanebo mumisena ya nkondo akulindila. Lyalo mulaakubona Mwaami Lesa mbweshi akamukomeneeko nkondo iyo. Nobene Juda anobene Jelusalemu, mutatonshi nabi kuloonda. Kamuyabo mukalwaane, Mwaami Lesa ulaakuba amwebo!’ ”

¹⁸ Mpomunyaawo mwaami Jeoshafati wakafukama cakushisha ciwa panshi. Abalo bantu boonse bakafukama akulambila Mwaami Lesa.

¹⁹ Mpeeke bene Lefi bamucipani cakwe Koati alimwi acakwe Kola bakeemikana akulumbaisha Mwaami Lesa, Lesa wa bene Isilaeli cakoolobesha.

²⁰ Macuunsacuunsa bushiku bwakaboolaawo bantu bakaya kuLuyanga lwa Tekowa. Ndibakalinga kutalika kweenda, Jeoshafati wakaamba ayi, “Nobene Juda abene Jelusalemu! Amucinke manungo muMwaami Lesa, Lesa wanu, mulaakwiimikanabo nta. Kamushoma shimulwiita balaluki, mulanooswitilila.”

²¹ Jeoshafati ndyaakamana kwiipusha bantu, wakasala beshikwiimba akubaambila ayi bafwale shakufwala shisalalite sha bwiimbi alimwi akunooya ceendela kunembo lya bashilumamba kabaya ciimba ayi, “Amulumbe Mwaami Lesa mukwiinga uli kabotu, ee, mukwiinga lusuno lwakwe ndwamuyayaya.”

²² Mpeeke ndibakatalika kwiimba, Mwaami Lesa wakalengesha shimfulunganya pakati ka bashilumamba bene Amoni, bene Moabu abene Edomu, aboobo bakakomwa.

²³ Bene Amoni abene Moabu bakatalika kulwana bene Edomu akubanyonyoola cakutashiyaawo nabi womwi. Ono ndibakamana kucaya bene Edomu, bakabukilana akucayana beene abeene.

²⁴ Lyalo bene Juda ndibakashika kuŋanda ilaamfu ya beshikulindilila ya muluyanga, bakabonabo balwani babo balibo mpinsampinsa. Bakamana kufwa cakubula muntu nabi womwi wakaloboka.

²⁵ Kuswawaawo Jeoshafati abashilumamba bakwe bakaya mukusaala shintu sha balwani babo. Bakacanaako ŋombe shiinji, shakulya, shakufwala ashintu shimwi sha makwebo. Cakabatolela nshiku shotatwe kababwesa shintu, sombi shakalinga shiinji cakwaamba ayi tabakwe kukonsha kushibwesa shoonse.

²⁶ Pabushiku bwane bakabungana muCinyika ca Belaka akulumbaisha Mwaami Lesa pashintu shoonse nshaakacita. Nceceeco cinyika ico asunu nceciciitilwa ayi Belaka.

²⁷ Jeoshafati wakatanjilila bashilumamba bakwe kuboolela kuJelusalemu kabasangalete mukwiinga Mwaami Lesa wakakoma balwani babo.

²⁸ Ndibakashika mundabala ya Jelusalemu bakeendililabo kuŊanda yakwe Lesa kabaya cilisha tulumbu tunene atuniini alimwi amapeenga.

²⁹ Ono mushobo woonse wakanyumfwa Mwaami Lesa mbwaakabakomenaako balwani ba bene Isilaeli, wakaloonda abuumbi.

³⁰ Mpeeke Jeoshafati wakalela muluumuno alimwi Lesa wakamupa luumuno kumbasu shoonse.

Bwaami bwakwe Jeoshafati mbobwakamana

³¹ Jeoshafati wakaba mwaami wa bene Juda kaacite myaaka ili makumi otatwe amyaaka yosanwe. Wakalela muJelusalemu kwamyaaka ili makumi obilo amyaaka yosanwe. Jeoshafati wakalinga mwanaakwe Asuba uyo wakalinga mwanaakwe Shili mwanakashi.

³² Wakacita shiluleme pameenso a Mwaami Lesa bweenka bwakacita baishi baAsa bataanshi pali nguwe.

³³ Sombi misena yakulambililaako ya patulundu taikwe kumwayoolwa. Paceebo ceeco bantu tebakalinga kulambila Lesa wa bamashali babo bakulukulu camyoyo yoonse.

³⁴ Shintu shoonse shimwi shakacita Jeoshafati mubwaami bwakwe kuswa kumatalikilo kushikila kumeelelesho, shililembetwe mulibuku lyakwe Jewu mwanaakwe Anani. Libuku ili ncipansha ca libuku lya buumi bwa bamaami ba bene Isilaeli.

³⁵ Pesule Jeoshafati mwaami wa bene Juda wakapanga bushicibusa aAasiya mwaami wa bene Isilaeli uyo wakalinga kucita shintu shibiibi shiinji.

³⁶ Pacito ca Esiyoni Geba bakapanga maato anene ayo eenda palweenge.

³⁷ Sombi Eliyesa mwanaakwe Dodafawu wa kundabala ya Malesha, wakaambila Jeoshafati ayi, “Mukwiinga webo wapanga bushicibusa aAasiya, Mwaami Lesa utoonyonyoola maato ngomwapanga.” Mpeeke maato akanyonyoolwa, aboobo taakwe kweendaawo.