2 Makani 2 - Baibo Busansulushi Bwa Libuku Ili

Mbobakalibambila kuyaka Ŋanda yakwe Lesa

¹ Mwaami Solomoni wakayeeya kuyaka Ŋanda yakwe Lesa yakumulambililaako akuliyakila ŋanda ya bwaami ibotu.

² Wakasala beshikubwesa shintu shakuyakisha bali 70,000, beshikubesa mabwe bali 80,000 alimwi abeshikweendelesha mulimo uyo bali 3,600.

³ Solomoni wakatuma nkombe kumwaami Ilamu wa kuTaya ayi, “Atusebensele pantu pomwi bweenka mbomwakalinga kusebensa abata baami baDefedi ndimwakoolisha shisamu sha sida shakuyakisha ŋanda yabo ya bwaami.

⁴ Ntooyaka Ŋanda yakwe Lesa yakulambililaamo Mwaami Lesa, Lesa wangu. Ilaakuba ŋanda isalalite uko nebo abantu boonse nkweshi tukanoobalambila mukutenta tununkila kabotu kunembo lyakwe akupa shipo sha shimaande shisalalite kuli nguwe lyoonsebo. Ncakwiila uko nkweshi tukanoobengela milambu yakutenta macuunsa amacolesha, pabushiku abushiku bwa kookesha bwa Cibelu alimwi apanshiku shakusekelela Mweenshi Upya kubikaawo anshiiku shimwi shakusekelela mukupa bulemu Mwaami Lesa, Lesa wesu. Ici cilaakunoocitika kwalyoonse alyoonse kweelana abwakaamba Mwaami Lesa.

⁵ Ŋanda yakwe Lesa iyo njeshi nkayake ilaakuba yabulemu mukwiinga Lesa wesu ulicite bulemu kwiinda balesa bamwi boonse.

⁶ Sombi taaku muntu weenga wayakila Lesa Ŋanda mukwiinga nabibo liculu lyaceyabo kulaale kwaamba ayi ekaleemo. Ono nebo inga ndakonsha buyani kuyakila Lesa Ŋanda? Sa te inga ndayakabo musena wakutentelaako tununkila kabotu pameenso akwe?

⁷ “Ono amuntumine muntu ucishi kusebensesha golodi, silifa, bulonse alimwi anshimbi. Ulyeelete kunoocishi kutunga shisani shifubelafubela, shisalala pyu alimwi ashiboneka anga ndiculu kubikaawo alushibo lwa kutala. Lakwe uyo ulaakunoosebensa abantu bene Juda alimwi abene Jelusalemu bacishi milimo iyo abo bata baDefedi mbobakasala.

⁸ “Amuntumine ashisamu sha sida, sha mapaini alimwi asha Junipa isho shiswa kuLebanoni mukwiinga ndishi ayi bantu banu mbobacishi kutimbula shisamu isho. Ndilibambite kutuma bantu bangu kwaamba ayi bese bacafwane abaanu

⁹ pakutimbula mapulanga aanji. Ntoocita boobo mukwiinga Ŋanda yakwe Lesa iyo njentooyaka ilaakuba inene alimwi yabulemu buunji.

¹⁰ Basebenshi banu beshikutimbula shisamu ndaakubapa makilogilamu a witi ali 2,000,000, makilogilamu a bale ali 2,000,000, malita a waini ali 400,000 alimwi amalita a mafuta a olifi ali 400,000.”

¹¹ Ilamu mwaami wa kuTaya wakakumbula Solomoni munkalata. Wakalemba ayi, “Ncakwiila nceebo cakwaamba ayi Mwaami Lesa ulisuni bantu bakwe, ncaakubikila pabwaami kwaamba ayi ube muleli wabo.

¹² Aalumbaishikwe Mwaami Lesa, Lesa wa bene Isilaeli wakalenga liculu acishi ca panshi! Wapa mwaami Defedi mwaana musongo, uswite lushibo mumilimo iinji, uyo utooyanda kutalika kumuyakila Ŋanda alimwi akuliyakila ŋanda ya bwaami.

¹³ Ntookutumina Ulamu musankwa uyo ucishi milimo yoonse.

¹⁴ Banyina mbene Dani, baishi mbene Taya. Ulicishi kupanga shintu kuswa kugolodi, silifa, bulonse, nshimbi, mabwe alimwi amapulanga. Ulicishi akutunga shisani shifubelafubela, shiboneka anga ndiculu, shisalala pyu alimwi ansaalu shiteshimite. Ulicite lushibo lwakutala kwa mishobo yoonse alimwi ulakonsha kukonkela cikoshanyo cili coonse capekwa kuli nguwe. Leka asebense abantu banu bacibwene shakupangapanga kubikaawo abaabo bakalinga kusebensela baishiwanu baami baDefedi.

¹⁵ “Ono sobasebenshi bako bulya tutumine witi, bale, waini alimwi amafuta a olifi isho nshewakashomesha.

¹⁶ Mutulundu twa muLebanoni tulaakutimbula shisamu shoonse sha sida nshoosuni akushaanga pantu pomwi mumilwimilwi akushiseelesha mulweenge kushikila akuJopa. Kuswa kooko inga mwashibwesa akushitola kuJelusalemu.”

Ŋanda yakwe Lesa mboyakatalikwa kuyakwa

¹⁷ Mpomunyaawo Solomoni wakatalika kubelenga baswamashi abo bakalinga kwikala mucishi ca Isilaeli bweenka bwakacitawo baishi baDefedi. Baswamashi bakacanika mucishi ca Isilaeli bakalinga 153,600.

¹⁸ Mpeeke bali 70,000 pakati kabo wakabapa mulimo wakunyamuna shintu shakuyakisha, bali 80,000 kubesa mabwe mutulundu akusala beshikweendelesha mulimo uyo bali 3,600.