2 Makani 19 - Baibo Busansulushi Bwa Libuku Ili

Mulaluki mbwaakalalila Jeoshafati

¹ Lyalo Jeoshafati mwaami wa bene Juda wakaboolelabo kabotu kuŋanda yakwe ya bwaami muJelusalemu.

² Mpeeke Jewu mulaluki mwanaakwe Anani, wakaya mukukumanya mwaami akumwaambila ayi, “Sa mutooyeeya ayi cililuleme kucafwa bamucita shibi akulwana kulubasu lwa bantu bapatite Mwaami Lesa? Ici ncemwacita calengesha bukali bwa Mwaami Lesa kwisa pali ndimwe.

³ Nakubi boobo nkoshili shimwi shibotu nshemwacita. Mwakanyonyoola shikoshanyo shakwe Ashela lesa mwanakashi isho bantu nshebakalinga kulambila alimwi mwakeelesha kukonkela kuyanda kwakwe Lesa.”

Jeoshafati mbwaakasandula shintu

⁴ Nacibi kwaamba ayi mwaami Jeoshafati wakalinga kwikala kuJelusalemu, wakalinga kweenda lyoonse pakati ka bantu kuswa kuBiyasheba kumalenge kuya mukushika akucishi ca tulundu ca Efuleemu kumatwa. Wakacita boobo kwaamba ayi anokwiita bantu kwisa kuMwaami Lesa, Lesa wa bamashali babo bakulukulu.

⁵ Wakasala moomboloshi mundabala yomwi ayomwi paayo akalinga kucite malinga muJuda.

⁶ Wakabaambila ayi, “Kamucenjela pakoombolosha milandu mukwiinga tamutokoomboloshela muntu, sombi mutokoomboloshela Mwaami Lesa uyo uli amwebo pakoombolosha.

⁷ Kamuloonda Mwaami Lesa akoombolosha kabotu mukwiinga Mwaami Lesa, Lesa wesu taamusuminishi kucita shintu shitaluleme, kasalulushi nabi kutambula makulo.”

⁸ Lyalo muJelusalemu Jeoshafati wakasala bene Lefi bamwi, bapailishi bamwi alimwi abamatanjilili ba bamumaandaabo bamwi ayi banokoombolosha milandu yakusotoka Milawo ya Mwaami Lesa akumana kupusana pakati ka bantu abo bakalinga kwikala muJelusalemu.

⁹ Wakabaambila ayi, “Mulyeelete kuloonda Mwaami Lesa, kumusebensela camyoyo yoonse akushomeka kuli nguwe mushintu shoonse nshemucita.

¹⁰ Na bene mishaanu ba kundabala imwi baleta mulandu wakucaya muntu nabi mulandu umwi wakusotoka milawo nabi milasho, mulyeelete kubacenjesha kwaamba ayi batabishishi Mwaami Lesa pakoombolosha. Na mwabula kucita boobo, mwebo abene mishaanu mulaakunyumfwa cilemeneshi ca bukali bwa Mwaami Lesa. Sombi na munoocita boobo, teshi mukabeewo amulandu.

¹¹ Amaliya mupailishi munene ngweshi akanoomweendelesha mukoombolosha milandu ikumya kuMwaami Lesa, alakwe Sebadiya mwanaakwe Ishimaeli, mweendeleshi wa bene Juda ulaakunoomweendelesha mukoombolosha milandu ikumya kumwaami wanu. Bene Lefi balo balicite mulimo wakubona ayi shintu shaambwa munkuta shitokweenda kabotu. Kamucita shintu cakubula boowa akucita kweelana amilasho iyi. Mwaami Lesa aabe abaabo bacita shiluleme!”